1 TAWARIKH 16 - Allah Wene Fano Wene Hupla Inane

¹ Peti Wene Warek a'nogo re at Daud en o sabu Peti faget iluk obalik halfesikheba a'nogo fei kwisukwa. Fei kwisukwasik he iren wam Allah endawimo agaiyek hoageluk mene inom, nen fanot ninabuageluk mene inom, At obaget hilingiti logolik warogo noletukwa.

² Iren wam omanogo warogo nolhukwasik he at Daud en Tuhan enuba afuni mondogat inoba fanoet fisikhi logolik,

³ nunggu mene it inebe mondogat a'nogo inoba sumburogo wogisasikhe. It afuni andem welagaukwa mene aremnogo re inebe lombok ap inom, hemi inom wam weragongge kurik misik inom, roti inom kue kismis inom misiktek higik sumburisilik lagaukwa.

⁴ A'nogo hilingitukwasik he, at Daud en it ap Lewi mene inebe wenagaisogo Peti Wene warek a'nogo era'lu andem en afuni Israel mene ineisena Tuhan Allah a'nogo obaget hilingisuogeluk wuni watik, fogeratik hilingitunem melalinabuageluk menfisasikhe.

⁵ Kepala hakhogo re hun Asaf menfesikhe, nen at a'ma re hun Zakharia menfesikhe, nen it pinggong kecapi a'nogo wati logouwageluk he, hun Yeiel, Semiramot, Yehiel, Matica, Eliab, Benaya, Obed-Edom, menfisasikhe. Nen, at Asaf he simbal a'nogo kweng eti logouwageluk menfesikhe.

⁶ Nen it imam inebe pire, hun Benaya inom, Yahaziel inom he Peti Wene Warek a'nogo era'lu aremnogo nen trompet a'nogo futugu mondok logouwageluk fisasikhe.

⁷ Fem attak-attak at Daud en it hun Asaf agaila'lak inom, wuni Tuhan fogeratarek awuni wasuageluk menfisasikhe mene re a'nogo andi.

Hun Asaf agaila'lak inomen wuniba Allah fogeratukwa mene re yi

⁸ Iren wuni wati logolik he yi'nogo ikhi lagaukwa: Nineisena Tuhan hai wasuogo, i At ebe hokho agun werek a'nogo fagerasi we'ni oi, Aren hilingiterek mene andoma afuni inunggulenu lombok inanggelekwe tindeli lani o.

⁹ Wuni Tuhan obaget wa'ni, e hu Aran elalin aple hilingiterek mene andoma fagesi lani, e hu

¹⁰ At he, Tuhan Enu Mondok Lego welagarek mene, e hu, Nit ninebe re At onggwarek mene welago andi nen he hinagaiyegeti logoni, e hu It mondogat At apne wili'lagwi mene andoma re inagaiyegeti logouwak, e hu

¹¹ At omame werek a'nogo oba kino yagati logoni, e hu At hundik-handik fogerati logoni, e hu

^12-13 Yago! Hit Allah amingmingengge Yakub eisok erokwe mene yi, e hu Yogo! Hit Israel en tagongge mene hineisena Tuhan nen tegelogo hinobagaisikhe mene yi, e hu Aren elalin mene hilingiti laga mene omanogo wenggel hikhi logoni, e hu Aren yi'nogo hilingiti logogun iluk tekhogo isikhe mene omanogo hinonggoragub, e hu

¹⁴ At andi re nit nineisena Tuhan Allah a'nogo, e hu Aren wene tekhogo ikhe mene andi re o kweangma yoma mondogat faget, e hu

¹⁵ Aren wene wa'nisikhe mene andi re Eberek mondok werek, e hu Aren wene wa'nisikhe mene andi re mondok-mondok logogin mene, oi

¹⁶ Wene wa'nisikhe mene andi re Abraham inom watikhe, e hu Hobuk he Ishak inom watikhe, e hu

¹⁷ Andi nen wene andiba at Yakub inomat omamet fesikhe, e hu Wene warisasikhe mene andi re it afuni Israel mene faget mondok-mondok logogin iluk isikhe, e hu

¹⁸ Wene andi warisikhi logolik, e hu ”O Kanaan kweang andi re hit wokhisagain, e hu Wokhisamo re hit hinonggwarek hinanggweang mene asigin, e hu,” iluk yagaisasikhe.

¹⁹ Omanggum he Tuhan againafuri re ap pok mene hakhogo o andoma welagaukwa. It inebe seberogo re we endebengge nek welagaukwa.

²⁰ It inebe re ap inunggulenu ekhe mene were'ma nen he, inunggulenu ekhe mene were'ma ya kwigik ta kwigik nikhi lagaukwa, o ekhema nen ekhema lagik hilingirik nikhi lagaukwa.

²¹ Oba nen he ap ekhe nen it sebelinabuageluk Tuhan nen obogerisikhi lagaikhe lek. It inili waganogo re Aren it inogogwi raja-raja omanogo inendawimo kagalogo iluk yagaisikhi lagaikhe,

²² Yagaisikhi logolik he, ”Afuni An nen wenaginafi mene andoma inagap palinafik, yi'nogo ti'nogo iluk ogo ekhe hilingfigik u fuk, Namlogomi nabi An nane yagaisugu mene andoma inoba weak ekhe hilingfisa fuk,” iluk yagaisikhi laga.

²³ O kweangma yoma mondogaren he Tuhan faget enek awuni wasuogo, Aren nit ninagap telninafe iluk he, linggene hundik-hundik fano wene andi nek fagati logoni o.

²⁴ At mondok along werek aple a'nogo afuni inunggulenu welagaikharekwe andoma tindelik lani o, At obabut fulu polanhogo hilingiri'lago mene andoma At againafuri inoba tindeli lani o.

²⁵ At Tuhan andi ebe hokho agun hilingi'mo legeisogo fugu mondok welagaikharek. Afuni nen kembu dewa ba inailo anggagarek andi re maben hak oba nen he At oba re mondok alonghogo ninailo anggikhi logogun.

²⁶ It afuni inunggulenu amu mene nen inanggembu dewa andoma re we ilirenggerogo alik hilingik werek, Oba nen he Tuhan enek he pogot honggolek kweang honggolek werek mene oma elalhe agun.

²⁷ At ebere anggiluk hokho mene were'ma ombak-bak hokho mene werek, At aiba andoma omame peterogo were'ma re inagaiyek hokho mene werek.

²⁸ Hit Tuhan againafuri mene nen he, At enek fogera'ni o! At anggiluk werek andi faget inom, omame hokho andi faget inom, fogera'ni o.

²⁹ At enu mondok ombak-bak werek mene andi nek fogera'ni o, Wam warogo At obaget hilingitu mene re waluk At awi wuri'mo kwini. Tuhan apne wanhi logolik he, su Allah obaget hilingisuogeluk labetarek asu a'nogo labet fuluk apne wanini o!

³⁰ Yago, hit afuni o kweangma yoma mondogat, At elokhoma nen hinoak leigeti logoni! Kweang hambuk lele warek mene re abolok u lek hak.

³¹ Hit pogot inom kweang inom he hinagaiyege'ni! Tuhan andi ebe re raja o, iluk he afuni inunggulenu lombok omanogo inoba yagaisikhi logoni!

³² Hit i laut inom, yi mene ti mene i elema welagarek mene andoma inom hinele age fun-fan eti logoni. Hit lei inom yi mene ti mene wulibik mene inom ogo hinagaiyege'ni!

³³ E ogoimo wulibik mene nen ogore, hinagaiyegeti logoni, At Tuhan ebe o kweangma raja logolik melalinafi logogin waganggere.

³⁴ Tuhan andi re mondok fani-fanore'ma re hai wati logoni o, Aren endawi hundik hilinginaferek mene andi re mondok-mondok logogin mene o.

³⁵ Hiren ikhi logolik he, ”Allah nineisena, ninagap telninafi lagen mene, it afuni inunggulenu amu mene inomameba sebelninarek werek mene inoba nen telninabimbik misi'mo andogorogo ninobagai me o, A'nogo hilingninafunem niren Hat hai wathafi logolik, Henu horek welagendek mene a'nogo foget hafi logogun o!” Iluk yagaisasikhe.

³⁶ Allah afuni Israel mene ineisena andi nek fogerati logoni, Yogondak inom hobuk inom mondok-mondok Arenek fogerati logoni o. A'nogo yagaisasikhemo it afuni Israel mene mondogaren he ”Amin”, iluk Tuhan fogeratukwa.

Tuhan apne wanhuba o Yerusalem inom Gibeon inom welagaikhe mene a'nogo

³⁷ A'nogo hilingitukwasik he, at raja Daud en he, it hun Asaf inom, ap Lewi inap fena inom he Peti Tuhan nen wene warek a'nogo o fisogo were'ma andoma nen Tuhan fogerati logolik hilingitu mene faget hundik-handik halhi logouwageluk menfisasikhe.

³⁸ It a'nogo hilingitunem he, at Obed-Edom hun Yedutun amlogo a'nogo inom, ap amu mene at unggulenu werekwe mene inebe 68 nen inom leberisikhi lagaukwa. At Obed-Edom inom Hosa inom he kwe ambe palek hokho mene kwi wagaikharek oba faget kagalek welagaukwa.

³⁹ Oba nen he at Zadok inom, it imam fena inom he, o Gibeon Tuhan fogeratuba andoma faget hundik-hundik hilingiti logouwageluk fisasukwa.

⁴⁰ Wene melalek Tuhan nen it afuni Israel mene inoba wogisasikhe mene a'nogo higithogo re hubet inom, hu'mokwe inom, hundik-hundik wam yi mene ti mene Tuhan faget noletuba omanogo nen noleti lagaukwa.

⁴¹ At imam Zadok a'nogo inom, it imam fenakwe omanogo inom he, Tuhan en endawi hundik hilinginafu mene andi mondok-mondok logogin iluk, wuni Tuhan fogeratu awuni ikhi logouwageluk wenagaisogo fisasikhe mene re, hun Heman inom Yedutun inom it ap fenakwe amu mene inom andi nen leberinafi lagaukwa.

⁴² At Heman inom Yedutun inom he, iren trompet inom simbal inom kwengeti lagaukwa mene andi inom, pinggong amu mene inom, wuni Tuhan fogeratu awuni watunem andi watu logouwageluk fisasikhe. It inunggulenu Yedutun mene nen agoromi a'nogo re kwe ambe palek hokho mene kwi wagaikharek kwe omanogo kagalek logouwageluk fisasikhe.

⁴³ A'nogo hilingitukwasik it afuni omanogo mondogat inawi lombok pugulhu kwelek, at Daud ogore, againafuri ninggi'nogo were'ma isagain iluk, aiba lagaikheat.