1 TAWARIKH 14 - Allah Wene Fano Wene Hupla Inane

Daud o Yerusalem logolik hilingiti lagaikhe wene

¹ Hun Hiram raja o Tirus agun a'nogo nen he, hun Daud awi sili halogo wusuageluk agoromi lakfisa waga logolik he, ap inebe o e meneba wutu mene inom, nen helep oba wutu mene inom lakfisa wagaikhe.

² A'nogo lakfisa wagaikhe andiba re, Daud endawimo nen he An he Tuhan nen it afuni Israel mene inobaget eberogoat mennobagaikhesik, Tuhan againafuri halinafi logouwageluk an raja logolik melalinafi logogin oba (kerajaan) a'nogo omamerari'lagwi yi higi, iluk endawimo eberogo anggasikhe.

³ O Yerusalem andoma logolik he at Daud en agagwi fena ekhe woginafikhesik at againafuri fena taginafikheat.

⁴ At amlogomi o Yerusalem en ta'lagaukwa mene inenu re: Syamua inom, Sobab inom, Natan inom, Salomo inom,

⁵ Yibhar inom, Elisua inom, Elbelet inom,

⁶ Nogah inom, Nefeg inom, Yafia inom,

⁷ Elisama inom, Beelyada inom, Elifelet inom, taginafikhe.

It afuni Filistin mene inoba nen inomame agaukwa mene a'nogo

⁸ It Filistin inap omanogo inesanggo holhunemen he at Daud a'nogo re it afuni Israel mene mondogat faget raja menfaga o, ugunem holhukwasik he, at ebe senesugun iluk wagaukwa. A'nogo wagu aple nen he at Daud a'nogo it inom weim yabugun iluk wulibi lagaikhe.

⁹ A'nogo wulibi lagu kwelek aremnogo re it Filistin inap he o Lembah Refaim omanogo asi wagaukwasik he tonggo a'nogo it mondogat telasukwa.

¹⁰ A'nogo hilingita ugunem at Daud esanggo holhikhesik he, at Daud en Allah ba heinok wokhikhi logolik he, ”Tuhan neisena, an nen ap Filistin inap andi re inoasi lagain fano a? Nen neisena Haren an nomamet nobagagin a, lega?” iluk heinok wokhasikhe. Heinok wokhasikhemo re Tuhan nen onggo ikhi logolik he, ”An nen hat hoba homame asuageluk wokhesigin o,” iluk yagatikhe.

¹¹ A'nogo yagatikhemo re at Daud inom, it agoromi sikhe fisogo inap omanogo inom he, it ap Filistin inap a'nogo o Baal-Perasim omanogo inoasi logoin iluk lagaukwasik he it inomame legaphogo fisasukwa. A'nogo hilingisogo fisasukwama at Daud en ikhi logolik he, ”I fu waga logolik yi mene ti mene misigam felelenghogo waluk lagarek a'nogo hak he, at Allah nen an naselei mene inomame were'ma a'nogo puleli kuageluk an nebeba nomamet nobagaikhemo o,” iluk isikhe. Andi ba re obuluk andoma re enu Baal-Perasim iluk salhukwa andi.

¹² It Filistin inap a'nogo inailo nen pupa ikhi logolik he, inanggembu awi wurik omanogo lin-lin wilifukwama re at Daud en he kembu oak wurik omanogo endu noluageluk yagaisasikhe.

¹³ A'nogo hilingitukwasik welagaukwasigen, aninurogo welagi'legat nekhengge it Filistin inap omanogo o Lembah Refaim a'nogo telogoin iluk wagaukwa.

¹⁴ A'nogo wagaukwama re nekhengge at Daud en Allah ba yaganesuageluk heinok wokhasikhemo re, ”Haren he yi fikhiren it inoasi kwigin iluk hilingisu fuk, at he lambik he haningisogo e (murbei) wilibik fikhit horokhogo andoma lambigen inoasi kwi weno o.

¹⁵ Hat hesanggo holek were'ma nen ambi e andoma erembul fikhit andoma nen ap era'luk ineisok abolok tabetu halok he, An he it ap Filistin inap sikhe fisogo mene andi inomame legaphogo feigeluk helokhoma laga-logogin engge re harogo lano o,” iluk yagatikhe.

¹⁶ A'nogo yagatikhemo re, At Daud a'nogo Allah nen wene melalek yagatikhe mene a'nogo higithogo hilingitikhe. At inom agoromi sikhe fisogo mene inomen he it Filistin inap inasikhe fisogo mene omanogo inoarik-inoarik he o Gibeon andoma nen erotukwasik he o Gezer huli fei lagaukwa.

¹⁷ A'nogo hilingitukwasik he at Daud enu a'nogo yi kwe ti kwe saga ugunem he, At Tuhan nen it afuni inunggulenu amu-amu mene omanogo nen ogo Daud oba inailo anggikhi logouwageluk hilingfisasukwa.