1 TAWARIKH 13 - Allah Wene Fano Wene Hupla Inane

Peti Tuhan nen Wene warek a'nogo o Kiryat-Yearim en waluk wagaukwa wene

¹ At raja Daud a'nogo nen it ap sikhe fisogo mene inogogwi kaindek perwira ap inebe esa 1.000 nen melalinafu mene inom, nen esa 100 nen melalinafu mene inom, wene inane seberogo matukwa.

² A'nogo matukwasik he aren it ap omanogo inoba ikhi logolik he, ”Nagaila'lak hiren ogo fano anggikhi lagep halok, nen at nineisena Tuhan Allah nen ogo fano anggikhe halok he, niren ap Lewi inap inom, it imam o esanggo-esanggo werek mene omanogo inom, it nit ninunggulenu mene amu mene mondagat omanogo inom, ninambit yoma andogosi wesuageluk inayonggo feni o.

³ It a'nogo andogosi wesumo re nit ninebe mondogat Peti Allah nen Wene warogo wo'ninafikhe mene a'nogo hun raja Saul en melalinafunem aremnogo fanorogo afe halhi'lek hesanggema herakfisagama werek mene andi wani logoin o,” iluk yagaisasikhe.

⁴ A'nogo yagaisasikhemo re it afuni Israel mene mondogat kabogesi wagaukwa mene a'nogo nen he, hun Daud en ikhe mene andi re fano ikhe, iluk inagaiyegetukwa.

⁵ A'nogo hilingitukwama re at Daud en afuni Israel mene o yi awi ti awi werek mene omanogo mondogat abel a'ma selatan fikhit he o Mesir huli, nen ambolkwe utara fikhit he o Hamat kwe lagaikharek huli werek mene omanogo mondogat Peti Wene warek o Kiryat-Yearim werek mene andi o Yerusalem fei wesugun iluk andogerinafikhe.

⁶ A'nogo kabogerinafukwasik he at Daud a'nogo it afuni omanogo inom he o kota Baala nen Kiryat-Yearim agarek oba, wilayah it inunggulenu Yehuda meneba andoma Peti Allah nen Wene warek mene a'nogo wanugun iluk lagaukwa. Peti andi enu re, ”Tuhan Ebe Kerub andi amboloba hurek werek,” iluk salhukwa.

⁷ It a'nogo o Baala arat asi lagaukwasik Peti Wene Warek a'nogo o hun Abinadab aiba nen wanhukwasik he, kereta ket mene misik ekheba liakfesukwasik hun Uza inom, Ahyo inomen he, waluk lagaukwa.

⁸ Nen, at Daud inom it afuni Israel mene inom he, fogoil hilik inagaiyek oba wuni wulagaisogo hilingirik laga logolik he, Allah legeisogo fikhi lago iluk he pinggong enu kecapi, rebana, simbal, trompet omanogoba warik laga lagaukwa.

⁹ A'nogo hilingirik lagaukwasik he it a'nogo o hun Kidon nen gandum enggen sagalhi lagaikheba omanogo asi lagaukwasik hilingitunemen he, kereta li'luk laga lagaikhe mene a'nogo eisok tungetikhemo re, at Uza nen he Peti Wene warek a'nogo pi nogo iluk enggi nen fak fesikhe.

^10-11 Fak fesikhemo nen aremnogoat he at Uza nen hilingitikhe mene andi re Tuhan enu sebelogo fou hakhogo hilingitemo re Tuhan a'mage hun Uza ba fesikhe. A'nogo a'mage fesikhesik aremnogoat ebe pinggi watikhe. A'nogo hilinglagaikhemo re obalik andem faget he enu ”Peres-Uza” ikhi lagaukwa. At Uza a'nogo Tuhan nen watikhe mene andi faget he Daud a'mage lagasikhe.

¹² Oba nen he at Daud ogo Allah ba ailo agaikhesik ikhi logolik he, ”Yogondak he an nen Peti Wene warek arire ninggi'nogo waluk lagain he?” iluk isikhe.

¹³ Andiba re, at Daud en Peti a'nogo o Yerusalem waluk lagu aple herakfuluk he hun Obed-Edom unggulenu Gad agun a'nogo aiba andoma fesikhe.

¹⁴ A'nogo fesikhemo Peti a'nogo andoma tugi henagan inukhogo were'ma, Tuhan nen he Obed-Edom a'nogo eisok erokwe mene inom, angge yi mene ti mene mondogat inom fanot fisikhi lagaikhe.