1 TAWARIKH 12 - Allah Wene Fano Wene Hupla Inane

It inunggulenu Benyamin mene Daud inom nikhi lagaukwa mene a'nogo

¹ At Daud hun raja Saul a'nogo ailo nen wulifikhesik he o Ziklag andoma lagaikhe. At andoma lagaikhesik were'ma re it ap fena hokhorogo sikhe fisogo inap mondok tiphogo nek hilingiti lagaukwa inap inom, weim yafarek aple inelu-pinelurek inap inom, at oba sebesi wagaukwa.

² It andi re at Saul hakhogo inunggulenu Benyamin mene. it inebe re tok inoatu aple inom, helep oba inoatu aple inom andi re inenggi ebekwe nen ogo harekwe nen ogo inenggi pagat mondok weak welagaukwa.

^3-7 It inogogwi melalinafi lagaukwa mene re hun Ahiezer inom, Yoas inom, hun Semaa amlogomi inawi Gibea mene andem inom. It ap Daud inom hilingiti lagaukwa inap andi inebe re yi: Yeziel, Pelet, hun Azmawet amlogomi andem inom. Nen Berakha, Yehu, inawi Anatot mene andem inom, Yismaya awi Gibeon mene weim mondok anini agun it ap Tridasawira esa misik ekhe faget kepala welagaikhe agun andi inom. Yeremia, Yehaziel, Yohanan, Yozabad, inawi Gedera meneandem inom. Eluzai, Yerimot, Bealya, Semarya, Sefaca inom, inawi Harufi mene andem inom. Elkana, Yisia, Azareel, Yoezer, Yasubam Korah ineisok erokwe mene andem inom. Yoela, Zebaja, hun Yeroham amlogomi inawi Gedor mene andem inomen hilingiti lagaukwa.

It inunggulenu Gad mene Daud inom hilingiti lagaukwa mene a'nogo re yi

⁸ At Daud o leimo tom leget hakhogo waganek welagaikheba omanogo were'ma nen he, it inunggulenu Gad mene nen, it ap Daud obaget hilingiti lagaukwa inap, ap inenu weinam mene, weim yafu aple mondok inelu-pinelurek mene hokhorogo at were'ma sebesi wagaukwa. It ap andoma re sige wanhu aple inom, weim kwe palengge wanhu aple inom he, mondok hibilhebelsek logolik inelu-pinelurek inap welagaukwa. It inebe re mene singa ailo lek andi hakhogo logolik, iren hilingitunem he no rusa tomkwe helalue wilik wagarek andi hakhogo ineisok a'ne weak hilingitarek inap welagaukwa.

^9-13 It inebe pangkat hilingik welagaukwa higit-higit inenu palek welagaikhe mene re yi: Ezer, Obaja, Eliab, Mismana, Yeremia, Atai, Eliel, Yohanan, Elzabat, Yeremia, Makhbanai inom andem.

¹⁴ It Gad inap andi mene fenakwe re it sikhe fisogo mene inogogwi perwira lego mene inendawinggen wurik hak mene re inebe esa 1.000 nen mene faget inogogwi kepala hakhogo melalinafu welagaukwa. Nen it ekhe perwira inagoromi hak mene re it esa 100 nen faget inogogwi kepala logolik melalinafu welagaukwa,

¹⁵ It ap andi nen he, yi'nogo ekhe hilingitukwa: tugi misik oba re i Yordan a'nogo fu wagu kwelek it ap perwira omanogo i palisaluk wulifukwasik he afuni o tonggo mo liabi wagarek fikhit welagaukwa mene inom. mo ubuk ikherek fikhit welagaukwa mene omanogo inom, mondogat mugusogo wulaginafukwa.

It inunggulenu Benyamin mene inom Yehuda mene inom Daud inom nikhi lagaukwa mene a'nogo.

¹⁶ Linggene ekhe sambul he it ap inunggulenu Benyamin mene inom, Yehuda mene inom esa misik ekhe at Daud were'ma tom helep leget hakhogo wagane'ma omanogo ambit lagaukwa.

¹⁷ Ambit lagaukwama re at Daud it inom ambi agaukwasik yagaisikhi logolik he mel yagaisasikhe, ”Hit he nit ninagaila'lak mene an lebetneogoin iluk wagep halok he, nit ninom sebesi we'ni. Niren he hit ninendawimo ninagaiyek oba wokhinafi lago. Oba nen he, hiren ambi an lalogo it naselei mene inenggim nobagagun iluk nanggomo kagalogo wagep halok he, an nen hit hinoba iluk ogo weak hilingiti lek aple andi re At Allah nit nineisugwi nen fogerati lagaukwa mene a'nogo nen ogo mondok elurek ma re, Aren hit hinoba wene fagain o,” iluk yagaisasikhe.

¹⁸ A'nogo yagaisasikhemo it inanggele'ma aremnogo nen ap misik enu Amasai, hun andi hobuk it ap esa Tridasawira inoe kepala asigin mene a'nogo nen re, Allah areagun oba louk isikhesik aren ikhi logolik he, ”Daud hun Isai amlogo yi! Nit he hat hebikhit mene wago o! At Allah hat hebikhit werek andi nen he, hat hebe inom, hat hagoromi lebethiili'lagwi mene andoma inomen hilingiti lagep mene andoma re ambisangma fano mene nek aga logouwago,” iluk yagatikhe. A'nogo yagatikhemo re, at Daud en it a'nogo woginafikhesik agoromi perwira weim yafu mene faget inogogwi logouwageluk menfisilik lagaikhe.

It inunggulenu Manasye ba nen Daud inom nikhi lagaukwa mene a'nogo

¹⁹ At Daud inom, it Filistin inap inom seberogo at raja Saul a'nogo werek fikhit weim yabi lagunem he, it inunggulenu Manasye mene ap sikhe fisogo inap fenakwe omanogo re at Daud ebikhit asi wagaukwa. Nen, ebe eberogo mene re, at Daud en he, it ap Filistin inap andi re, leberinafi lagaikhe lek oba nen. It Filistin inap inogogwi melalinafi lagaukwa mene omanogo nen he, at Daud raja Saul werek fikhit asi lambik lalninabinogoluk inailo nen he, hat he o Ziklag andoma laga logoin, iluk yagatukwa.

²⁰ A'nogo yagatukwama at Daud a'nogo o Ziklag lagain iluk ebe khalem lagunem en he, it inunggulenu Manasye mene weim yafi lagaukwa a'nogo at Daud oba sebesi wagaukwa mene a'nogo inenu re yi: Adnah, Yozabad, Yediael, Mikhael, Yozabad, Elihu, Ziletai inom andem. It andi inebe lombok he, ap weim yafarek mene inebe 1.000 nen higik inogogwi kepala logolik halinafi lagaukwa.

²¹ It ap andi re, Daud faget hilingitu mondok logolik, ninghogo hilingiti lagaukwa inap, it inoba lik louksek logolik ap o weagerogo filik nikhi lagaukwa inap omanogo inom yabuogeluk Daud lebethikhi lagaukwa inap. Hobugen he, it ap aremnogo it Israel mene inoba andoma weim mene inogogwi perwira hilinglagaukwa.

²² Linggene hundik-hundik ap inelokhe ket mene at Daud oba sebesuogeluk ekhe wagik, ekhe wagik ugu were'ma, at Daud agoromi weim yafu mene omanogo re esa mondok hokhorogo hilinglagaukwa.

At Daud ebikhit mene agoromi weim yafu inap welagaukwa mene a'nogo

^23-37 At Daud a'nogo o Hebron were'ma re, ap weim yafu mene faget ninghogo hilingiti lagaukwa inap omanogo re, at Daud ebikhit asi waga lagaukwa. Iren he, Tuhan en abok ikhi logolik, ’Daud raja menlasigin,’ iluk isikhe higithogo at Saul obali'mo raja menlasuageluk lebetha waga lagaukwa. It inebe lambulogo esa logalek welagaukwa mene re yi: It inunggulenu Yehuda mene re ap inebe 6.800 nen tok kwe palengge inom, sige inom tomogethigik fisogo welagaukwa. It inunggulenu Simeon mene re ap inebe 7.100 nen mondok melalek mene welagaukwa. It inunggulenu Lewi mene re inebe 4.600 nen welagaukwa. Hun Yoyada Harun ambisangma mene a'nogo agoromi inebe 3.700 nen welagaukwa. Alage souge mene misik ekhe ailo mondok lek mene enu re Zadok ogogwi agoromi re ap inebe 22 nen welagaukwa. It inebe mondogat he, it ineisok erokwe mene faget inogogwi kepala welagaukwa. Nen it inunggulenu Benyamin mene (at raja Saul a'nogo unggulenuba mene) andi nen he ap inebe 3.000 nen welagaukwa. It inunggulenu Benyamin mene inebe hokhorogo re at Saul faget hilingiti lagaukwa. It inunggulenu Efraim mene re ap inebe 20.800 nen andem inebe lombok he ap enu werek inap enek welagaukwa. It inunggulenu Manasye mene o Yordan mo ubuk ikherek fikhit welagaukwa mene omanogo re ap inebe 18.000 nen at Daud raja menfogoin mene faget obaget hilingiti logouwageluk wenagaisogo fisasukwa. It inunggulenu Isakhar mene re ap inebe 200 nen inom, inogogwi inom welagaukwa. It inogogwi andi nen he, afuni Israel mene linggene higithogo hilingiti logogun mene iluk penogo fikhi lagaukwa. It inunggulenu Zebulon mene re, weim yafu aple faget inom, sikhe sige wanhu aple faget inom, inelu pinelurek logolik, hambukhogo hilingitu inap welagaukwa. It inunggulenu Naftali mene re, inogogwi inebe 1.000 mene inom, ap sikhe fisogo mene inangge tokwe palengge lik-louksek inap inebe 37.000 nen inom welagaukwa. It inunggulenu Dan mene re, ap inebe 28.600 nen mondok melalek mene nek welagaukwa. It inunggulenu Asyer mene re, ap inebe 40.000 nen weim yabi kugu aple faget mondok fik-fouksek inap welagaukwa. It inunggulenu fena i Yordan mo liabi wagarek fikhit mene re, Ruben mene inom, Gad mene inom, it inunggulenu Manasye mene fena minggirogo inom he inebe 120.000 nen welagaukwa. Nen it andi re sikhe yiginik-tiginik wanu higit mene nek welagaukwa.

³⁸ It ap Daud obaget hilingiti lagaukwa mene omanogo re at Daud ebe afuni Israel mene inobaget inoe raja men fogoin iluk hilingitukwa sambul andi re inebene inalilingge lik-loukhogo o Hebron andogotukwa. Nen it afuni Israel mene fena mondogat omanogo re, inendawinggen misik agaukwasik iren we misik aple andi nek hilingisugun anggasukwa.

³⁹ Inenggi henagan inukhogo andi re, it ap Daud faget hilingiti lagaukwa inap omanogo re at Daud inom omanogo logolik pesta seni isatik, afuni Israel mene fena omanogo nen it faget i inom, sumburu inom, foukhogo fesukwa mene omanogo inom ninggik, hilingitu logolik andoma welagaukwa.

⁴⁰ It inunggulenu fena abel utara fikhit welagaukwa mene mondok yatma inap it inunggulenu Isakhar mene inom, Zebulon mene inom, Naftali mene inom, omanogo re wam keledai, untah, bagal, sapi, inom oba nenggarek engge, tepung inom, e ara enggen inom, kismis inom anggur, zaitun amusu inom, ambol oba mondok hokhorogo liak fuluk waluk wagaukwa. It ap andoma nen he, wam sapi inom, domba inom, senggeluk nunggu mene iluk, waluk wagaukwaat. A'nogo hilingitunem he it afuni Israel mene o ekhema-ekhema werek mene omanogo nen he inagaiyek mondok hokhorogo hilingiti lagaukwa.