1 TAWARIKH 10 - Allah Wene Fano Wene Hupla Inane

Raja Saul a'nogo ebe wa'lagaikhe wene

¹ Afuni Israel mene inom it ap Filistin mene inom he o Gilboa tomkwe omanogo weim yafukwa. Andoma weim yafi logolik he, it Israel mene hokhorogo inoatukwama wa'lagaukwa, nen, fena re at raja Saul a'nogo inom at onggwarek againafuri omanogo inom he heise wilifukwa.

² Oba nen he it ap Filistin omanogo inombo'ne muginarek waga logolik he at amlogomi inebe henaganet engge, abo Yonatan inom, Abinadab inom, Malkisua inom aremnogo inoatukwa.

³ At Saul welagaikhe kwe a'nogo re weim mondok omame-omame laga logolik he, at Saul ebe a'nogo it aselei mene nen tok watukwama re, tok a'nogo nen at oba enggin agaikhe.

⁴ A'nogo watukwama at Saul en ap souge mene at asikhe waluk laga lagaikhe mene a'nogoba ikhi logolik he, ”It ap Filistin inap Tuhan inonggot mene andi nen an nane ying nabi nogore, hat henggarok ari lisogo wanimbik an nebe talogo noasin o,” iluk yagatikhe. A'nogo yagatikheba nen he at souge mene a'nogo ailo nen he wati'lek herak fesikhe. Andi ba re at Saul a'nogo enggarok onggwaregen lisogo wanhikhesik he, karok a'nogo enggaroba teisalogo warasikhe.

⁵ Andi nen ap souge mene a'nogo eilenggen kwelakhasikhe re hun Saul a'nogo mondogat wa'lagaikhemo hasikhesik he, at abo a'nogo ogo re, onggwaregen enggarok a'nogo ambisangma teisalogo warasikhemo arat wa'lagaikhe.

⁶ A'nogo hilingitukwasik at Saul inom amlogomi inebe henagan aremnogo inom inoatukwama wa'lagukwama re huli andiba nen he raja Saul eisok erokwe mene omanogo raja ekhe hilinglaga lagaukwa lek.

⁷ It Israel mene o Yizreel tonggo kwe welagaukwa inap omanogo nen inesanggo holhugunemen he it Israel mene sikhe fisogo inap omanogo mondogat wulifa, nen at hun Saul inom, amlogomi inom enek he mondogat inoatama wa'lagaikha o, ugunem inesanggo holhukwasik he, irogo inawi kota omanogo herakfuluk wulifukwa. Herakfuluk wilifukwama re it Filistin inaben o kota omanogo sebeli kwisukwa.

⁸ Ohealekwe weirogo re it ap Filistin mene nen it Israel mene inebe warek omanogo helogoin iluk wagunemen he, at Saul inom amlogomi inebe henagan aremnogo inom o Gilboa tom oba andoma warek were'ma heraginafukwa.

⁹ A'nogo were'ma hasukwasik he iren at Saul asu weim yafi logolik labeti lagaikhe mene a'nogo nonggoligik, nen at unggul tekhogo wanhik hilingitukwasik helaluk lagaukwa. A'nogo waluk lagaukwasik he iren wene o sili mondogat omanogo inunggulenu werek higit-higit inom, it inanggembu dewa ba inom wene fano mene andi wialik lagaukwa.

¹⁰ Hun Saul asu weim yafi logolik labeti lagaikhe mene inom, tok kwepalengge aweim tok omanogo inom, a'nogo re kembu aiba iren mene a'nogo ba fesukwa, nen at unggul palek a'nogo re it inanggembu dewa enu Dagon a'nogo awi wuri'mo andoma kologo fesukwa.

¹¹ A'nogo fesukwama it afuni Yabes inap o Giliad welagaukwa mene omanogo nen holhugunemen he, ”It afuni Filistin inaben he at Saul a'nogo ba a'nogo hilingita ugunem holhukwasik he,”

¹² it ap inailo lek mene nek folhigik he at Saul ebe warek a'nogo inom, at amlogomi warek omanogo inom, woginabi lagaukwasik waluk he o Yabes wagaukwa. Wagaukwasik he iren andoma e hokho mene ekhe wulibik were'ma a'ma andoma salinafukwasik, it inebe fong watu inenggi sabiren sumburu heang fesukwasik welagaukwa.

^13-14 Saul ebe wa'lagaikhe andi re, aren Tuhan oba tiphogo hilingiti'lek, Nen Aren awene melalek yi'nogo hilingiti logoin o, ti'nogo hilingiti logoin o, iluk yagatikhe mene a'nogo hologo hilingiti lagaikhe lek andi nen. Nen, ekhe re at Saul en an ninggi'nogo hilingisigin iluk, At Tuhan nen yaganesuageluk, kino igi'legengge re, aren it ap wa'lagaukwa mene inaheimenggeba kino ilaga lagaikhe. Andiba re, at Tuhan nen wene oba fesikhesik he at raja mendek logolik welagaikhe ba obali'mo a'nogo re hun Isai amlogo Daud a'nogoba wogetikhe.