1 SAMUEL 7 - Allah Wene Fano Wene Hupla Inane

¹ A'nogo yagaisasukwama, afuni o Kiryat-Yearim welagaukwa mene nen Peti Wene Warogo Allah nen wo'ninafikhe iluk hilingik a'nogo waluk wagaukwasik he, ap enu Abinadab awi punuba wurik were'ma andoma fesukwa. A'nogo fesukwasik, peti andi serogo logouwageluk ap Abinadab amlogo Eleazar unggul sebelogo menfesukwa.

Samuel en afuni Israel mene ferinarek welagaikhe wene

² Peti Wene Warogo nineisena Tuhan nen wo'ninafikhe iluk hilingik mene a'nogo fei wagaukwama, o Kiryat-Yearim andoma 20 tahun aninurogoat welagaikhe. Andem sambul he, it afuni Israel mene mondogaren nineisena Tuhan nen telninabin o, iluk inane hokhorogo yagati lagaukwa.

³ A'nogo yagati lagaukwama, at Samuel en he, mel yagaisasikhe: ”Hit nineisena Tuhan oba hinambotkwe wesimbik, hinendawinggen misik a'luk Arenek fogerati logogun halok he, afuni endakwe mene inandugwi kembu he mene enu Asytoret andi oba fogerati lagep mene andi herakfisaluk, hinebe nineisena Tuhan amuat wogo'no o. At faget enek hilingiti logogun halok, hit hinebe afuni Filistin mene nen fethinarek werek andi Aren telhinabigin o,” iluk yagaisasikhe.

⁴ A'nogo yagaisasikhemo, it afuni Israel mene nen he, it afuni inandugwi kembu enu Baal mene inom, enu Asytoret mene inom, omanogo herakfisasukwasik, Tuhan amuat fogerati lagaukwa.

⁵ A'nogo hilingitunem, at Samuel en he, mel yagaisasikhe: ”Hit hinunggulenu Israel mene mondogat o Mizpa andogosi we'no o. A'nogo andogosi wagunem, an nen hit faget nineisena Tuhan ayonggo fagain o,” iluk yagaisasikhe.

⁶ A'nogo yagaisasikhemo, it inebe mondogat o Mizpa andoma andogotukwa. Andogotukwasik, yi mene ti mene nineisena Tuhan wogosu hak, i hinatukwasik he, at eilhanem kweisalogo lakfesukwasik, andi sambul lingge misik inukhogo sumburu ninggi'lek sambanat ugu mondok logolik, mel isukwa: ”Nit nineisena Tuhan ane sagalogo weak hilingito o,” iluk fageti lagaukwa. (O Mizpa andoma nen at Samuel en afuni Israel mene yi wene ti wene minggilik awene inoba welagaikhe mene eroba nen pilingisogo legetfikhi lagaikhe.)

⁷ A'nogo hilingitunem, afuni nen ikhi logolik he, ”Afuni Israel mene o Mizpa arat andogorogo kwaga o,” iluk isukwama, afuni Filistin mene inesanggo holhukwasik he, inogogwi raja inebe 5 nen aremnogo inom, inagoromi tentara mene inom he, afuni Israel mene inoasuogoluk wagaukwa. A'nogo wagaukwama, afuni ekhe nen he, ”Ap Filistin mene ninoasuogoluk weri'lagwi o,” iluk isukwama, inesanggo holhukwasik he, inailo agaikhe.

⁸ A'nogo inailo agaikhesik, Samuel mel yagatukwa: ”Nineisena Tuhan afuni Filistin mene nen ninoasinogoluk telninabuagen he, kamo igi'lek ayonggo fugu mondok logoino o,” iluk yagatukwa.

⁹ A'nogo yagatukwa andi nen he, at Samuel en wam domba eak oan mene misik ekhe wanhikhesik he, senggelogo Tuhan endawimo agaiyek hoageluk obaget warogo noletikhe. A'nogo arat noletikhesik he, afuni Israel mene telinabuagaluk Allah ayonggo fesikhemo, ane esanggo holhikhe.

¹⁰ A'nogo holhikhemo, at Samuel wam a'nogo oan noletunem ap Filistin mene nen Israel mene arat inoasuogoluk horok-horok kwi wagaukwa. Kwi wagaukwama, aremnogoat Tuhan nen ap Filistin mene inunggulmo higit unggunggu ane hokhorogo pak uagaluk hilingitikhesik he, inobabut mondok nong-honghogo hilingfisasikhemo, inobakheindok palagaukwasik heise wulifukwa.

¹¹ A'nogo lagunem, ap Israel mene o Mizpa nen wulifukwasik he, it ap Filistin mene muginarek inoarik-inoarik huli o yatmaat Bet-Kar horokhogo fisa lagaukwa.

¹² A'nogo hilingitukwasik, at Samuel en helep ekhe o Mizpa honggolek Sen honggolek tulem andoma menegeisogo fesikhe. A'nogo menegeisogo fesikhesik he, mel isikhe: ”Nineisena Tuhan nen yaba elok lebetnisikhe,” isikhesik he, helep a'nogo enu, Lebetnisikhe helep u hak, Eben-Haezer salhikhe.

¹³ Afuni Filistin mene mabenet fisasukwasik inoatukwa re, a'nogo. A'nogo inoatukwama, at Samuel ebe eluk werek kwelek, Tuhan nen ap Filistin mene re it afuni Israel mene inaiba wesinogo iluk kwe palinarek were'ma, waga lagaukwa mondok lek.

¹⁴ Afuni Filistin mene inaiba o kota Ekron inom Gat inom tulem huli-hulimo andoma, afuni Israel mene inaiba kota hokhorogoat it Filistin mene nen sebelhukwasik, ferinarek welagaukwa mene omanogo re, inambotkwe inonggwarek sebelasukwa. A'nogo sebelasukwasik, afuni Israel inom Amori mene inom fano seberogo logolik lioksek mondok welagaukwa.

Samuel ebe eluk logolik wene pilingisogo halhu mene welagaikhe wene

¹⁵ A'nogo werek kwelek enek, at Samuel ebe eluk logolik aren mondok ferinarek welagaikhe.

¹⁶ A'nogo ferinarek logolik, yi tahun ti tahun o Betel, Gilgal, Mizpa oba andoma eilenggen isilik laga lagaikhe. Laga logolik, afuni Israel mene yi wene ti wene minggilik awene inoba were'ma pilingisogo legetfisikhi lagaikhe.

¹⁷ A'nogo hilingiti la'luk ambotkwe aiba o Rama waga lagaikhe. Andoma logolik, aren afuni Israel mene yi wene ti wene inoba were'ma pilingisogo legetfikhi logolik, wam Tuhan faget warogo noleti logogun oba obalik Mezba ekhe wutikheat.