1 SAMUEL 4 - Allah Wene Fano Wene Hupla Inane

Peti Wene Warogo Allah nen wo'ninafikhe iluk hilingik a'nogo afuni Filistin mene nen telogo waluk lagaukwa wene

¹ At Samuel ane it Israel mene mondogat a'nogo yagaisikhi lagaikhe andem sambul he, ap Filistin mene nen afuni Israel mene inom weim yabuogeluk inagoromi tentara mene mondogat esa logalogo wagaukwa. A'nogo wagaukwa andi nen, ap tentara Israel mene inebe weim yafarek oba lagaukwasik, it ap tentara Filistin mene o tenda meneba o Afek andoma wutukwasik werek kwelek, it ap tentara Israel mene o su mene o Eben-Haezer andoma era'lu horokhogo wutukwa.

² A'nogo wutukwasik, it ap tentara Filistin mene weim yabuogoluk isukwasik, weim mondok aninirogo yafi logolik, ap tentara Israel mene mabenet fisasukwasik, inebe 4.000 hangge inoatukwa.

³ A'nogo inoatukwama, it ap ineluk poloksek inawi tenda mene wurikwe wagaukwama, it inogogwi nen mel isukwa: ”Nineisena Tuhan nen ap ninaselei mene Filistin mene nen ninoasuagaluk hera'ninobagaikhemo ninoata andi nenahalok nogo? Nineisena Tuhan nen nit ap Filistin mene nen ninoasinogoluk telninabuagen he Peti Wene Warogo Allah wo'ninafikhe iluk hilingik a'nogo, o Silo nen wani lambik waluk wesuogo,” iluk isukwa.

⁴ A'nogo isukwasik, Peti Wene Warogo nineisena Tuhan Omame Mondok Hokho mene nen wo'ninafikhe iluk hilingik a'nogoba Allah ebe tulem welagarek iluk era'lu fena-fena malaikat inebe pire inalik waganek welagaikhe. Andi nen he, Peti a'nogo waluk loageluk ap ekhe inayonggo fesukwasik o Silo lakfisa wagaukwa. A'nogo lakfisa wagaukwama, wanhukwasik he, ap Eli againafuri inebe pire, Hofni inom, Pinehas inom, inomen peti a'nogo waluk lagaukwa.

⁵ Peti andi a'nogo waluk laga lagaukwasik, o su mene wuri'mo fei lagaukwama re, ap Israel mene inane ami'mit hokhorogo sup isukwama kweang mondogat abolok leik isikhe.

⁶ A'nogo sup ugunem inane ap Filistin mene inesanggo holhukwaat. A'nogo holhukwasik he, mel isukwa: ”It ap Ibrani mene andi inawi tenda wuri'mo nen inane ami'mit sup ili'lagwi andi nenahalok,” iluk isukwa. A'nogo isukwa meneat he, afuni nen he, ”Peti afuni Ibrani mene ineisena Tuhan nen wene warogo woginafikhe, iluk hilingik mene a'nogo it inawi tenda wuri'mo waluk wagaikhama nen ili'lagwi o,” iluk isukwama inelu agaukwasik,

⁷ inailo hokhorogo agaukwasik he, mel isukwa: ”It ineisena dewa fogeratarek mene it inawi tenda wuri'mo wagama o. Andi nen he, attak ekhe a'nogo hilinglagunem higi'lek mene hilinglaga andi ninailo e. Nit weaget ninabugun o.

⁸ Eberogoat weaget ninabugun o! Halok he, it ineisena dewa fogeratarek mene omame hokho andi nen ninoasinogoluk sa nen telninabigin anggegep? It ineisena fogeratarek mene andi nen endamat ap Mesir mene o leimo afuni le'ma nen wulil tagalogo inoatikhe lek nogo? Eberogoat inoatikhe aro.

⁹ Andi halok he, nagoromi Filistin mene yi. Hinendawinggen hambukhogo logoni o. Hinebe ap mondok logolik, weim yabino o. A'nogo hilinglasugun lek halok, afuni Ibrani mene attagat hiren hinamingmingengge higit ferinarek welagagip a'nogo hak, yogondak hit iren inamingmingenggge higit fethinarek logogun o. Andi nen he, hit hinendawinggen hambukhogo hinailo'lek logolik, weim yabino o,” iluk yagaisasukwa.

¹⁰ A'nogo isukwasik, it ap Filistin mene a'nogo weim mondok aninirogo yafi logolik, ap tentara Israel mene mabenet fisasukwasik inoatukwa. A'nogo inoatukwama, ap Israel mene heise inawi tenda wurikwe lombok wagaukwa. Weim andi yafi logolik, ap tentara Israel mene mondok mabenet fisasukwasik, inebe mondok hokhorogo 30.000 nen inoatukwa.

¹¹ A'nogo inoati logolik, ap Eli againafuri inebe pire, Hofni inom, Pinehas inom, aremnogo inomat inoati logolik, Peti Wene Warogo Allah nen wo'ninafikhe iluk hilingik mene a'nogo it inaselei mene nen telogo helaluk lagaukwa.

Ap Eli ebe wa'lagaikhe wene

¹² A'nogo hilingitukwama, ap ekhe unggulenu Benyamin mene, weim yafukwaba nen humusek o Silo hari andibaat wagaikhe. A'nogo waga logolik, inoatama nen endawimo weak agasik waga higi, iluk futfouwagaluk asu laberek mene libik-labakhogo nen he, fesi ungguloba yugulogo wagaikhe.

¹³ A'nogo hilingitu kwelek he, at Eli re oba mondok lebelek agaikhesik,” Eige, Peti Wene Warogo Allah nen wo'ninafikhe iluk hilingik mene waluk lagaikha a'nogo fano waluk wesugun a? Athe, ninggi'nogo hilingfuluk wesugun e,” iluk he, kwe esanggoma kursi ba hurek logolik menenei ebeti lagaikhe. Nen, at a'nogo ebetu kwelek ap wagaikhe mene a'nogo nen it Israel mene inebe mondogat mul inoatukwama re, inalong lek agaukwa mene a'nogo tindeli wagaikhemo re, afuni o silikwe werek mene omanogo mondogat lenggu fesukwa.

¹⁴ A'nogo lenggu fugunem at hun Eli a'nogo nen esanggo holhasikhesik heinok wogisikhi logolik he, ”Inane hokhorogo ili'lagwi andoma re nenahalok?” iluk heinok wogisugu kwelek he, ap wagaikhe mene a'nogo humusek hun Eli ambit wagaikhesik, wene mondok weak mene a'nogo yagasi wagaikhe.

¹⁵ At hun Eli ebe umur 98 tahun agaikhemo eilenggen mondok mum agaikhesik welagaikhe.

¹⁶ Were'ma, ap a'nogo nen ikhi logolik, ”An he, weim yafaba nen humusek yogondak yaat wagarigo,” iluk yagatikhemo, at Eli nen he, mel yagatikhe: ”Namlogo wene re ninggi'nogo,” iluk heinok wokhasikhe.

¹⁷ A'nogo yagatikhemo, ap wene waluk wagaikhe mene a'nogo nen he, mel yagatikhe: ”Ap Israel mene re it Filistin mene nen muginarek wulifi logolik he, nit fikhit mene re ap warek enek kabok ikhemo re, nit mondok maben ago o. Ninebe mondok hokhorogo ninoati logolik, hat hamlogomi inebe pire, Hofni inom, Pinehas inom, aremnogo emberegat inoata o. A'nogo inoati logolik, Peti Wene Warogo Allah nen wo'ninafikhe, iluk hilingik a'nogo selei mene nen helaluk lagaikha aro,” iluk yagatikhe.

¹⁸ Ap andi nen he, ”Peti Wene Warogo Allah nen wo'ninafikhe iluk hilingik a'nogo yi'nogo hilingita,” iluk yagatu kwelek aremnogoat, ap Eli ebe leget pa'leget ambe pale'ma era'lu andoma hurek welagaikhengge a'nogo tamakhogo ambot lenggak pisikhe. A'nogo pikhi logolik he, at ebe arat yaman agaikhesik ebe mondok lumbuk helarogo hilingfesikhemo nogo nen he, ot lumbukhogo pinggi wa'lagaikhe. At ebe eluk logolik, afuni Israel mene 40 tahun ferinarek welagaikhe.

Ap Pinehas agwe sogwe wa'lagaikhe wene

¹⁹ A'nogo hilinglagaikhe andem sambul he, ap Eli eamalhe, Pinehas agwe a'nogo omalik a'ma agaikhesik, arat tasigin horok agaikhemo were'ma, afuni nen he, ”Peti Wene Warogo Allah nen wo'ninafikhe iluk hilingik a'nogo telogo waluk lagaikha, nen, hat hagun inom, heisena inom arat wa'lagaikha o,” iluk isukwama esanggo holhu kwelek aremnogoat he, omalik a'nogo tasigiluk ambol heinet watikhesik, ebe aninurogo welagi'legat takhikhe.

²⁰ Omalik a'nogo tak-tak ebe arat wa'lasigiluk ugu kwelek, it hemi ekhe at lebethikhi lagaukwa mene nen mel yagatukwa: ”Heak ap takhegen andi nen he, hendawinggen hambukhogo logoin o,” iluk yagatukwa meneat he, aren onggo igi'lek obakhenene kamo isikhe.

^21-22 A'nogo kamo isikhesik, Peti Wene Warogo Allah nen wo'ninafikhe, iluk hilingik a'nogo telogo waluk lagik, at eisena inom, agun inom, emberek inebe inoatik, aga andi nen, ”Allah fogeratorek mene a'nogo ninanggele'ma nen longgoikhemo o,” iluk u hak, eak enu, ”Ikabod,” salhikhe. A'nogo salhi logolik mel isikhe: ”Peti Wene Warogo Allah nen wo'ninafikhe iluk hilingik a'nogo telogo waluk lagaikha andi nen, Allah fogeratorek mene a'nogo ninanggele'ma nen longgoikhemo o,” iluk isikhe.