1 SAMUEL 31 - Allah Wene Fano Wene Hupla Inane

Saul againafuri inom inoatukwa wene

¹ A'nogo hilingitu kwelek, ap Filistin mene nen it Israel mene inoasuogeluk o Gilboa andoma wagaukwa. Wagaukwasik, inom weim yafi logolik, ap Israel mene inebe hokhorogoat andoma inoatukwa. A'nogo inoatu kwelek, it ap fena Saul againafuri inom heise poloksek wulifukwa.

² A'nogo wulifukwa meneat he, ap Filistin mene nen he, inombo'ne muginarek waga logolik, Saul againafuri inebe henagan, Yonatan inom, Abinadab inom, Malkisua inom aremnogo, inoasi wagaukwaat.

³ A'nogo inoarik waga logolik at Saul werekwe a'nogo re weim mondok inaninirogo inoarik waga logolik, at Saul ebe tok mondok fanoma watukwama enggin tung isikhe.

⁴ A'nogo hilinglagaikhemo, at Saul agot alage mene ekhe at asikhe waluk wagaikhe mene a'nogo oba mel yagatikhe: ”An nebe ap Tuhan inonggot mene andi nen inane asegen wo'niikhi logombigen noasi nogo nen he, hat henggarok lisogo wanimbik he, nebe noasin o,” iluk yagatikhe meneat he, ap alage mene andi, at Saul ebe mondok agaukhogo hilingiti lagaikhe andi nen he, ebe wati'lek herakfisasikhe. A'nogo herakfisasikhemo, at Saul onggwarek enggarok wanhikhesik kweangma telfesikhesik he, ebe taunghogo waragaluk enggat oba weing lagaikhe.

⁵ Onggwaregen a'nogo warasikhemo, ap alage mene a'nogo eilenggen Saul kwelakhasikhe re, ebe arat wa'lagaikhemo hasikhesik he, arogo onggwaregen warageluk enggarok kweangma telfesikhesik ambisangma salukhogo Saul era'lu aremnogo wa'lagaikheat.

⁶ O misik sambul at Saul ebe inom, againafuri inebe henagan aremnogo inom, agoromi tentara mene ekhe inebe mondogat inom, agot alage mene ekhe inom, inoatukwa re a'nogo andi.

⁷ A'nogo inoatukwama afuni ekhe nen he, ”Ap tentara Israel mene weim heise mondok pugulfisagama, Saul againafuri inebe henagan inom arat inoata o,” iluk isukwama, it ap Israel mene o Yisreel tonggoma aik eliba andoma inom, i Yordan aik eliba mo lagai wagarek higit andoma inom, welagaukwa mene inawi kota herakfisaluk heise pugulhukwama re, hobuk ap Filistin mene nen o kota andoma sebeli kwi wagaukwa.

⁸ A'nogo inoatukwasik nogo iluk ohealekkwe re, ap Filistin mene nen ap warek mene inangge helouwogeluk waga logolik, Saul ebe inom, againafuri inebe henagan aremnogo inom, o Gilboa tom oba andoma warek were'ma hasukwa.

⁹ A'nogo hasukwasik Saul ungguloak palogo wanhukwasik he, asu igisogo weim yaferek mene a'nogo nonggologo wanhukwasik waluk lagaukwa. A'nogo waluk lagaukwasik he, ap ekhe inayonggo fesukwasik he, wene ap fano inoatukwa wene andi afuni Filistin mene inawilokwe yi awi ti awi mondogat yagaisigik, inandugwi kembu awi wuri'mo kwisukwasik inendawimo fanorogo yagaisigik, uageluk lakfisasukwa.

¹⁰ A'nogo lakfisasukwasik, Saul asu igisogo weim yaferek mene a'nogo it inandugwi ebe he mene enu, ”Asytoret,” iluk ikhi lagaukwa mene a'nogo awi wuri'mo andoma fesukwasik he, ebe warek enek he, o kota Bet-Sean andoma leget pa'leget oba paku warogo te'merogo fesukwa.

¹¹ A'nogo hilingitukwa meneat he afuni ekhe nen, ”Ap Filistin mene nen at Saul a'nogo hilingisogo faga o,” iluk ugunem afuni o Gilead andoma kota Yabes mene inesanggo holhukwasik he,

¹² ap inailo lek mene nek folhigik hup inukhogo o Bet-Sean lagaukwa. Lagaukwasik, at Saul ebe warek inom, againafuri inebe warek inom, o kota andoma leget pa'leget oba nen lologo pelakfisa wagaukwasik, woginarek o Yabes wagaukwasik nolinafukwa.

¹³ A'nogo nolinafukwasik, inoak andogorogo re, o kota andoma e weile hangge mene enu tamariska eroma andoma salhukwa. A'nogo salhukwasik, fong watu sumburu ninggi'lek inenggi 7 nen welagaukwa.