1 SAMUEL 29 - Allah Wene Fano Wene Hupla Inane

It afuni Filistin mene nen Daud haiba lan iluk yagatukwa wene

¹ Afuni Filistin inap inagoromi sikhe fisogo mene mondogat o Afek kabogetukwa, nen, it Israel mene re i elesi horokhogo o Yizreel tonggoma andoma o sabu tenda ba salhukwa.

² A'nogo hilingitukwasik he it Filistin mene inogogwi raja inebe fuaben aremnogo inagoromi ekhe 100 nen inom helagerogo, nen ekhe re 1.000 nen inom helagerogo esa fologo erathigik waga lagaukwa, Nen, at Daud agoromi inom he inambotma at raja Akhis inom hobuk eratukwasik waga lagaukwa.

³ A'nogo wagunem it Filistin inap sikhe fisogo mene inogogwi panglima kain mene omanogo nen isasukwasik ikhi logolik he, ”Ap Ibrani inap andire yoma re ninggi'nogo halok werek?” iluk heinok wogisasukwama re, at Akhis nen onggo yagaisikhi logolik he, ”Yire Daud attak at Saul it Israel mene inoe raja obaget pegawai welagaikhe mene a'nogo. At ebere we aninurogoat an ninom yoma welago o. Nen ebere yoma wagaikhe huli nen engge yogondak huli andi re aren weak hilingite mene iluk ekhe hikhi lagi lego,” iluk yagaisasikhe.

⁴ A'nogo yagaisasikheba nen he, it Filistin mene sikhe fisogo mene inogogwi panglima omanogo nen Akhis oba inoba harorogo wenageti logolik, ”Ap andi re haren o kota wogeten oba omanogo loakhogo yagaom o. Athe nit weim yafunem andoma ninanggele'ma nen nit lalninabinogore nit ninom seberogo weim yabi lagain lego. A'nogo yafi logolik andi re aren iaple agama iluk oe raja endawi waganogo iluk aren nit ninagoromi ekhe inoasinogo o.

⁵ At ari re Daud nogo a? Hun ari faget attak helime nen wuni wulagaisogo kelem lagik-wagik ikhi logolik he yi'nogo ikhi lagaikha a'nogo, At Saul en he aselei mene re we beribu-ribu nen enek inoate, Oba nen he at Daud en he berpuluh-puluh ribu nen inoate, iluk ikhi lagaukwa omanogo re lek nogo a?” iluk yagatukwa.

⁶ A'nogo yagatukwama, at Akhis nen Daud wolhasikhesik yagati logolik he, ”Tuhan eluk welagarek mene enuba, haren an nane hologo higithogo hilingiti lagen mene andi faget he nagaiyek anggikhi lagi o. Nen, hat hebe an ninom weim yafunem yi re, nombo'nerogo ninom yabi kwilo andi re nagaiyek anggikhi lagi. Hat an were'ma wagagin huli nen yogondak huli andi haren weak ekhe hilingiten mondok lek. Oba nen it kaindek amu mene oma nen he hat faget inabit anggili'lagwi o.

⁷ Enggere haiba we selekhogo lan o, nen it ina'mage lagouwageluk amu mene ekhe hilingisu fugo,” iluk yagatikhe.

⁸ A'nogo yagatikhemo at Daud en onggo ikhi logolik he, ”Neisena raja, an nen he weak ningginik mene ekhe hilingiti'mo? Neisena haren egen hakhogo, an nen weak hilingiti mene ekhe an hamingmingengge neisena hat hobaget hilingitu aple eroratigi huli nen yogondak ya huli werek le'ma neegen halok he, nenahalok an hamingmingengge it neisena haselei mene andoma ninom weim yabi lagain lek iluk yaganeti lagen?” iluk yagatikhe.

⁹ A'nogo yagatikhemo re at Akhis nen onggo yagati logolik, ”An nen he haren fifurogo hilingiti lagen mene andi faget he, Allah agoromi malaikat omanogo hak hilingik welagen iluk anggikhi lagi aple a'nogo hat he mondok helu o. Oba nen he it sikhe fisogo mene inogogwi panglima andoma nen inane tekhogo ikhi logolik he, hat he nit ninom weim yabi logoin lek iluk aga o.

¹⁰ Arigini'mo re, Daud, hobit he hubethogo hineluk asimbik he mo liabi wagu kwelek andem hit at Saul were'ma nen herakfisaluk wulibi wagepsik an ninom walago mene omanogo hinebe mondogat weak-weak lano,” iluk yagatikhe.

¹¹ A'nogo isikhemo ohealek hubet siakhogo re, at Daud inom, at agoromi inom he o afuni Filistin mene inaiba omanogo wagaukwa, nen it Filistin inap sikhe fisogo mene omanogo re o Yizreel andoma lagaukwa.