1 SAMUEL 27 - Allah Wene Fano Wene Hupla Inane

Daud ap Filistin mene inanggele'ma welagaikhe wene

¹ At Daud a'nogo laga logolik he, endawimo yi'nogo wenggelik lagaikhe, ”Andem a'nogo ogoba nen he hilingik kwelek at Saul en an nebe noasu hak. Nen, an nen amurogo hilingisu mene ekhe werek legat, we it afuni Filistin inaiba andoma wulibi layok. A'nogo hilingisigin andiba re at Saul en an it afuni Israel mene were'ma andoma ekhe hira'nabik lagain lek, nen an ogo andoma nailo legengge fano logogin,” iluk wenggelhikhe.

² A'nogo wenggelhikhesik he at Daud inom, agoromi inebe 600 nen aremnogo inom he ap Akhis hun Maokh amlogo o kota Gad mene inoe raja ambit lagaukwa.

³ A'nogo lagaukwama re at Daud a'nogo agoromi inom, it inagagwi inagainafuri inebe lombok inom, inebe mondogat o Gad andoma lagaukwasik femhogo welagaukwa. Logolik at Daud en he agagwi inebe pire, he Abinoam o Yizreel agwe a'nogo inom, Abigail hun Nabal agwe sogwe aiba Karmel mene a'nogo inom woginarek lagaikhe.

⁴ A'nogo lagaukwasik were'ma, at Saul esanggo hulhunemen he Daud a'nogo o Gad andoma wulibi lagasik werek ugunem holhikhesik he aren senesigin iluk mu'luk murok laga lageikhe mene a'nogo herakfisasikhe.

⁵ Andi nen at Daud en hun Akhis a'nogoba wene kwelafi logolik he, ”Neisena haren an hamingmingengge noba hendawimo hagaiyek anggikhi lagen halok he, an hamingmingengge o kota endep mene mondok yatma andoma misikhogo ekhe wo'nom o. Wo'nesumo an nebe neisena hawi o kota hokhoma yoma logou re elo'lek hilingi'mo re, an o andi elok logogin o,” iluk yagatikhe.

⁶ A'nogo yagatikhemo at Akhis a'nogo nen he, o kota Ziklag andi at Daud wogetikhe andiba re, o andi re it raja Yehuda mene inaiba agaikhemo yogondak huli nen it inom welagaikharek.

⁷ At Daud a'nogo afuni Filistin mene inaiba andoma re tahun misikhogo re tugi enggaminogo inom welagaikhe.

⁸ Andem oba at Daud a'nogo logolik at agoromi inomen he, it afuni Gesur mene inom Girsi mene inom, Amalek inap inom, it inunggulenu andem inap he endamen engge o kweang andomaba were'ma inoasi laga lagaukwa. Aren he o kweang andoma mene inoba inoarik-inoarik he o Zur huli andoma nen he o Mesir huli yathogo andomaba fei lagaikhe.

⁹ Aren he ap inom, hemi inom, felelenghogo inoati logolik he, inanggo domba, sapi, keledai, unta inom andoma mondogat hogouk erikhi logolik he, inasu labetarek meneba nen ogo mondogat helasikhe. A'nogo hilingitikhesik he ambotkwe hun Akhis a'nogo oba wagaikhe.

¹⁰ Wagaikhemo at Akhis nen heinok wokhikhi logolik, ”Yogondak he hat ap koma fikhit inoasi lagen?” iluk heinok wokhugu halok he, at Daud en onggo ikhi logolik he, ”An he o Yehuda nen abel a'ma selatan fikhit andoma, athe it afuni Yerahmeel inap werekwe ogo nen it afuni Keni inap werekwe ogo lagarigo,” iluk ikhi lagaikhe.

¹¹ A'nogo hilingitu logolik he, at Daud inom, agoromi inomen hilingiti lagaukwa mene a'nogo afuni andoma mene ekhe o Gad we'luk, iren yi'nogo hilingiri'lagwi iluk ineluerasi lanogo iluk he, iren afuni inoasi kwikhi lagaukwa kwe andoma re ap misik iluk ogo eluk fikhi lagaukwa mondok lek. At Daud afuni Filistin mene inanggweang oba logolik he a'nogo hilingiti lagaikhe andi.

¹² A'nogo hilingiti lagaikheba nen he at Akhis a'nogo nen Daud en hilingitu mene omanogo faget eberogo anggikhi logolik he, at endawimo yi'nogo wenggelhike, ”At he agaila'lak unggulenu misik mene nen inabit anggagarek mene hilingi'mo re, at ebe eluk logogin huli re an namingmingengge mondok-mondogat logogin,” iluk endawimo wenggelhikhe.