1 SAMUEL 25 - Allah Wene Fano Wene Hupla Inane

At Samuel ebe wa'lagaikhe wene

¹ A'nogo hilingitukwasik inenggi aninurogo welagi'legat at Samuel a'nogo wa'lagaikhe. At wa'lagaikhemo it afuni Israel mene mondogat fong watunem inom wasugun iluk kabogetukwasik, at ebe onggwarek aiba o Rama omanogo salhukwa. A'nogo wa'lagaikhemo salfuluk he at Daud a'nogo o Param leimo andoma lagaikhe.

Hun Daud inom Abigail inomen hilingitukwa wene

^2-3 At omanogo lagunemen he o kota Maon omanogo re ap misik ekhe enu Nabal hun Kaleb ambisangma mene nen tagongge mene welagaikhe. Hun andi re aren anggo takhuguba faget he kweang o Karmel horokhogo andoma welagaikhe. At ebere enggi werek agun logolik anggo domba re 3.000 nen welagaikhe. Nen anggo kambing he 1.000 nen welagaikhe. At agwe Abigail andi re mondok hebelek logolik he, ebe ogo mondok fano welagaikhe. Oba nen he at agun Nabal andi re obabut mondok haferek logolik mondok weak mene nek hilingiti lagaikhe. Linggene misik sambul he at Nabal a'nogo o Karmel andoma anggo domba esi palhi lagaikhe.

⁴ A'nogo hilingiri'lago iluk aben at Daud o leimo were'ma yagasi lagaukwama esanggo holhikhesik he,

⁵ aren ap alage mene inebe 10 nen o Karmel lakfisikhi logolik mel yagaisasikhe,

⁶ ”Laga logombik at Nabal andi hinom ambi asimbik he, Daud en yi'nogo hai wathafe iluk yaga'no. A'nogo aren lakfisikhi logolik iren he at Nabal oba yi'nogo hilingi'no iluk yaga'luk he, hat honggwarek hebeba inom, heisok erokwe mene inoba inom, hangge yi mene ti meneba inom mondok fanorogo nek logouwak, iluk yagahete o, iluk yaga'no.

⁷ An nesanggo holhunemen hat he, hundik-handik hanggo domba esi nek pali'lago, ugunem holhi lagi o. Nen, ekhe hat hagainafuri hanggo hali'lagwi mene it inebe nit ninawi fikhit were'ma ogore niren yi'nogo ti'nogo iluk inoba fikhi lago lek, nen it inebe o Karmel logolik oba re it inangge mene misik ekhe longgo ikhe lek mene andi re harogo helu asuago.

⁸ It inebeba heinok wogisano, iren ogo eberogo ugun logou hak. Arigini'mo re nit he linggene esin mene yiba waga lagoma re, an nagoromi andi re haren fanorogo woginabigin anggikhi lagi. Enggere nit hamingmingengge yi ninoba inom an Daud hagailak fano welago mene a'nogo noba inom, hat hendawi fano nen yi mene ti mene werek mene andoma ekhe wo'nisano o ikhe iluk, yaga'no,” iluk yagaisasikhe.

⁹ A'nogo yagaisasikhemo re, it andi o Karmel andiba asi lagaukwasik at Daud hagoromi omanogo nen he wene yi'nogo ino iluk yagaisasikhe mene aremnogo at Daud enuba yagatukwasik, at Nabal en onggo yaganisoageluk nenangothikhi lagaukwa.

¹⁰ Oba nen he at Nabal en onggo yagaisikhi logolik, ”Daud a, Andi re sanogo? Hun Isai amlogo andi re sanogo? At faget he an endebat ekhe nesanggo holhi lagi lek mene! Horok yogondak welago arem oba re ap inamingmingengge werek mene hokhorogo inogogwi inoba nen wulifaresik yoma longgo i we'luk werek!

¹¹ Ap ebe yi re toma nen waga iluk mel ero nonggot werek kwelek oba nen, an nen namburu roti inom, nagai hinago inom, wam eino isago inom, it nagoromi nanggo domba esi pali'lagwi mene inobaget fougetiba nen, an nen ninggi'nogo iluk wogisa hak nogo!” iluk yagaisasikhe.

¹² A'nogo yagaisasikhemo re at Daud agoromi a'nogo nekhengge inambotkwe sugulogo Daud ambit wagaukwasik he at Nabal ane isikhe mene a'nogo yagatukwa.

¹³ A'nogo yagatukwama re, at Daud en agoromi aremnogo inoba ikhi logolik, ”Hiren hinenggarok hinebe lombok hinouwakwe puge'ni!” iluk yagaisasikhe. A'nogo yagaisasikhe mo at Daud agoromi omanogo aren ane yagaisasikhe mene a'nogo weak-weakhogo hologo hilingitukwa. At Daud ogore enggarok ouwa'ma pugetikhesik, it ap inebe 400 nen hakhogo inom lagu kwelek, it ap inebe 200 nen hak he inasungge fisogo welagaukwa.

¹⁴ It omanogo a'nogo hilingitu kwelek ap Nabal amingming engge mene ekhe nen he, at Nabal agweba yagasi laga logolik, mel isikhe, ”At Daud ebe o leimo omanogo nen nit ninoeba yi'nogo hai wathafe ino, iluk ap lakfisa wagaba nen he, aren it inebe li'norinafe mene andi re hat nagaisa re hesanggo holhen a, lega?

¹⁵ It andi ninom he mondok fano logolik, nit ninoba yi'nogo ti'nogo ekhe hilingninabi'lagwi lek, nen nit ninebe it ninom o leimo ambi agagu huli nen enggere nit ninangge misik iluk ogo ekhe longgo ikherek lek oba nen.

¹⁶ Nit it inebe horokhogo wam halhi logolik were'ma, iren hup hundik lingge hundik nit fetninarek werek kwelek oba nen hilingite.

¹⁷ Arigini'mo re, hat nagaisa nen ninggi'nogo hilingisigin aple andi re fanorogo wenggel hambik, an nen ti'nogo hilingisigin iluk katokhogo ino. Nit ninoe andi re mondogat ungguloak haro logolik ane uageluk heinok wokhugunem ogore ane igi'lek werek a'nogo. Nen aren a'nogo hilingite mene andi onggore at ninoeba inom, nen at eisok erokwe mene mondogat inom, ninoba asi wesigiluk werek andi!” iluk yagasi lagaikhe.

¹⁸ A'nogo yagasi lagaikhemo at he Abigail a'nogo nen weak-weak aremnogoat roti 200 nen inom, anggur agai iwak agap meneba pire ele sophogo hinago mene inom, wam domba endumo sa'lirogo werago mene ebe fuaben inom, nen gandum enggen werago mene 17 kilo inom, e anggur enggen igisogo eiselek engge iringik mene 100 nen inom, e ara enggen fuaben kue hilingik mene ebe 200 nen inom, andoma wanhikhesik he abirengge omanogo wam keledai amboloba liafukwa.

¹⁹ A'nogo liak fesukwasik aren againafuri eabu hilingitarek mene omanogo inoba yagaisikhi logolik he, ”An he hit hinombo'ne hobuk wesigin enggere, hit he attak an nelokhoma laga logoni,” iluk miminginafikhe ba nen he aren agun oba yi'nogo ti'nogo iluk endep ekhe yagatikhe lek.

²⁰ At he Abigail a'nogo wam keledai ba lagasikhesik at ebe lagaikhesik tom abel kwanirogo lagaikharek oba andoma asi lagaikhe hak he, at Daud inom agoromi inom at he a'nogo fikhit pi wagunem sal-kwal isukwa.

²¹ Andem sambul at Daud a'nogo endawimo nen ebethikhi logolik he, an nen ap andi angge o leimo halhi lagi a'nogo re we alomarogo hilingiti lagimo higi! At angge we misik iluk ogo ekhe longgo ikhe lek oba nen, an nen fanorogo hilingfikhi lagi a'nogo onggo re yogondak aren weak mene inom wuret fili'lago ari a!

²² An nen ap mene nek o andoma werek mene o mo liabi wagi'lek kwelek andem inoasigin halok he, we At Allah nen enek an noasuak!” iluk wenggelik wagunemen ambi agaukwa.

²³ At he Abigail a'nogo nen Daud wagunem eilenggen hasikhesik he at ebe weak-weak wam keledai amboloba nen pi wagaikhesik hun Daud eiso'ma endep awi yagaisogo hai wati logolik,

²⁴ ane yi'nogo isikhe, ”Neisena, an nane igin mene yi hesanggo holnabin! Nen, weak aga mene andi re an hamingmingengge noba lombogo, anat enggin hagain!

²⁵ Neisena haren at Nabal aren fano mene ekhe hilingisu lek mene onggwarek enu higithogo mondok kembu mene andi faget wenggelu fugo! Neisena haren ap lakfisa wagen mene andoma re an hamingmingengge neilenggen endep ekhe isigi lego.

²⁶ Hat heisena nen haselei mene inoba onggo wo'nesuageluk kino yagaisigik, inebe inoatik, ikherek mene a'nogo At Allah nen kwe palhobagaikhemo, At Tuhan Eluk Mondok Welagarek mene a'nogo enuba re an nen hombuk palhi lagi andi. Neisena hat haselei mene inom, nen it hat hebe alomat hobagagun iluk hilingiri'lagwi mene andoma inom, inoba ari'lago aple andoma re at Nabal ogo andi higit oba aga logouwago.

²⁷ Ariginik enggere an hamingmingengge nen yeligengge endebat neisena hat hobaget inom, hat agoromi inobaget inom ya helani.

²⁸ Eige neisena, an hamingmingengge nen furogo hilingiti'lek mene andi faget ebeti'lek sagalogo legetfeino. Neisena haren At Tuhan faget weim yafi lagen ma re At Tuhan nen he neisena hat inom, haren tagomangge mene inom he, it afuni Israel mene inobaget inoe raja mendek logouwageluk hinobagakhi logogin, nen neisena hebe heluk logogin huli andoma kwanirek mene ekhe hat helokhoma ekhe hilinglasigin lego.

²⁹ Nen, ap ekhe nen neisena hebe hoasugun iluk mukhiugu halok he, neisena hat hebe At Tuhan Allah nen afuni nen inangge onggo hokho mene foukhogo fetaluk welagaikharek a'nogo hak hili waganogo fetharek logogin o. Oba nen he neisena haselei mene re At Tuhan nen yatma huk-hak isigik, it yei epayuk oba inoatarek mene nen yatma hugisigik ikhi logouwago.

³⁰ At Tuhan nen yi'nogo ti'nogo hilinghobagagin iluk abok wene wathete higithogo fano mene neisena hat hoba hilingfikhi logogin, nen we eil misik wela'luk he neisena hat hebe it afuni Israel mene inobaget inoe raja logouwageluk menhobagagun o.

³¹ A'nogo asigin sambul he neisena haren ebethikhi logolik, ”An nen we hesangge ero lek kwelek inoatigi lek, nen an nen we nonggwaregen katokhogo hilingfagain lek iluk hilingiti a'nogo re, iluk wenggel haluk he andoma hinendawimo wenggel hikhi logolik hinendawimo heiselhik, nambigen hilingiti e, iluk igik u fuk. Nen, At Tuhan nen neisena hat hoba fanot hobagagu halok he, neisena hat hamingmingengge an yi noba honggorasu fugo,” iluk yagatikhe.

³² A'nogo yagatikhemo at Daud en, he Abigail a'nogoba ikhi logolik, ”Hat an ninom yoma ambi asuageluk lakhobagai waga mene afuni Israel mene ineisena Tuhan Allah a'nogo nek fogerati logouwak!

³³ An nen ap inoatik, nonggwarek nendawimo nen anggaluk hilingisigin iluk wenggelfigirik hilingiti mene re, hilingisinogo iluk kwe pal nobagai wagen mene andi hat hendawinggen kagalogo wenggelhen mene andi faget fogethafi logouwak, nen honggwarek hebe fogethafi logouwagaro.

³⁴ An nen hat hoba kwanirek mene hilingisinogo iluk kwe pal hobagagik. Neisena Tuhan afuni Israel mene ineisena Allah andi enuba hilingi'mo re, hat weak-weak wagen mene andi we'len le'ma nen he, mo oan liabi wagi'le'ma re at Nabal agoromi re inoa'lepma mondogat wa'la'lebo!” iluk isikhe.

³⁵ A'nogo hilingitukwasik at Daud he Abigail en woginarek wagaikhe mene omanogo helasikhesik he, at ebeba yagati logolik he, ”Haren hilingnobagain egen mene andi re, an arat wanhimo re, hendawimo weak agi'lek haiba hambotkwe lano o,” iluk yagatikhe.

³⁶ A'nogo yagatikhemo at he Abigail a'nogo sugulogo hun Nabal ambit wagunemen he, it ap raja nen seni isatarek omanogo hakhogo oloba seni hokho mene isati lagaukwa. A'nogo isati logolik at Nabal a'nogo lugu-lugwi palhikhesik agaiyek hokhorogo hilingitunem he, at agwe nen wene yi'nogo ti'nogo iluk ekhe yagati'lek werek kwelek enek he hobit huli agaikhe.

³⁷ Hubet he ap Nabal a'nogo afe enggat agaikhemo at agwe nen he weak kwanirogo hilingitikhe mene a'nogo mondogat tindelogo yagatikhemo endawimo warasikhesik oba lebelekhogo warek mene hangge hilinglagaikhe.

³⁸ Andi nen linggene 10 nen hakhogo welagaikhesigen he at Tuhan nen hun Nabal a'nogoba endawinggen ma ou mene fesikhemo ebe wa'lagaikhe.

³⁹ Nen, at Daud esanggo holhunemen he at Nabal a'nogo wa'laga ugunem holhikhesik, aren ikhi logolik he, ”At Tuhan enek fogerasuok! Aren at Nabal en an mabenet nobagakhi logolik nenu weagerogo nobagaikhe mene a'nogo onggo watfikhi logolik he Aren enek an amingming engge yi nen kwanirek mene ekhe hilingisinogo iluk kwe pal nobagaikhe andi. At Nabal he weak onggo re Tuhan en unggum oba fikhe andi,” iluk isikhe. A'nogo isikhesik he at Daud en he Abigail nagweab eragain iluk ap ekhe he a'nogo aiba lakfisasikhe.

⁴⁰ Lakfisasikhemo, at Daud en lakfisasikhe mene aremnogo he a'nogo o Karmel were'ma ambit lagaukwasik yagati logolik, ”Nit he hun Daud en lakninobagai wagama at endawimo nen hat hebe faget an helagain anggikhi logolik yagasi lani iluk yaganisikhemo wago o,” iluk yagatukwa.

⁴¹ A'nogo yagatukwama re at Abigail a'nogo menlagaikhesik eindep awi yagaisogo ane ikhi logolik he, ”An yi re at Daud amingmingengge hilingik welagimo re, it at amingmingengge andoma ineisok ebene elok sobalinafi logogin o,” iluk isikhe.

⁴² A'nogo isikhesik he, at ebe weak-weak andoma fik-fouk etikhesik anggo keledai amboloba lagasikhesik at mene amingmingengge helime inebe fuaben mene eiso'marogo re ap hun Daud en lakfisasikhe mene omanogo inom wagaukwama re at he a'nogo hun Daud agwe agaikhe.

⁴³ He andi oan heligi'le'ma re at Daud he, he Ahinoam awi Yizreel mene helasikhe, nen ombo'ne re at Abigail helasikhe andi.

⁴⁴ A'nogo hilingitu kwelek at Saul en he a'logo hele Mikhal hun Daud agwe a'nogo re hun Palti Lais amlogo o kota Galim mene a'nogo inom lombot fisasikhe.