1 SAMUEL 22 - Allah Wene Fano Wene Hupla Inane

It imam o Nob welagaukwa mene inoatukwa wene

¹ Andi nen at Daud a'nogo o kota Gat herakfisaluk o Adulam horokhogo oumo omanogo lagaikhesik hinago welagaikhe. A'nogo were'ma at ogogwi agaila'lak inom, at eisok erokwe mene inom omanogo nen inesanggo holhukwasik he it inebe at were'ma andoma andogosi lagaukwa.

² Nen, it fena enggin-fenggin inoba fugu mene inom, inangge palegengge werek mene inom, it fena inendawimo anggagarek mene higithogo hilingiri'lagwi lek iluk agarek mene omanogo inom, at Daud oba andogosi wagaukwasik, Daud ebe it inoe melalinafu mene faget werek kwelek welagaukwa, nen it Daud inom nikhi lagaukwa mene re inebe seberogo 400 nen hakhogo welagaukwa.

³ Oumo omanogo nen he o Mizpa Moab oba andoma at raja Moab agun ambit lagaikhesik, raja a'nogoba ikhi logolik he, ”An hamingmingengge neisena inom nagaisa inom he, hat neisena hinom yoma werek kwelek, At Allah nen an hamingmingengge nobaget anggikhe mene a'nogo higit asuakhogo re, ninom fano logouwok inogen iluk, yagaheti o,” iluk yagatikhe.

⁴ A'nogo yagatikhesik aren eisena agaisa aremnogo hondoginarek he at raja awi Moab agun a'nogo were'ma fisa lagaikhemo, at Daud ebe oumo hinago werek kwelek, it he o andoma welagaukwa.

⁵ Linggene misik sambul he ap Allah ane yagaisikherek mene enu Gad andi Daud ambit wagaikhesik yagati logolik, ”Hat oumo yi logogin lego, weak-weak o Yehuda kweang oba andoma lan,” iluk yagatikhemo at Daud a'nogo lagaikhesik he o Keret enggama andoma kwi lagaikhe.

It ap imam o Nob mene hokhorogo inoatukwa wene

⁶ Linggene misik sambul he at Saul a'nogo e tamariska a'ma o Gibea andoma arige enggim senegeisogo hurek were'ma, it agoromi sikhe fisogo mene omanogo re at ebe haningisogo mendek welagaukwa. A'nogo logolik holhasukwa re at Daud inom agoromi inom werek oba re ninelu aga o, ugunem holhukwasik,

⁷ aren at agoromi sikhe fisogo mene inogogwi perwira omanogo inoba ikhi logolik he, ”Hit afuni Benyamin mene yoma hinesanggo holini! At Daud ikhi lagep mene a'nogo nen he, hit hineabu inom, anggur yabu inom wokhisagain a? Aren he at agoromi tentara faget hit hinebe abirengge kaindek perwira nek logouwageluk menhinobagagik, igin a?

⁸ Andiba re hit hinebe at hinom sebe'luk he an noba nane sagalogo fuluk, ap misik ekhe nen ogo, an namlogoba nen ogo, at Daud ikhi lagep mene a'nogo ebikhit aga iluk mel yaganeti lagep lek andi a? Hit ya welagep mene oma re, ap misigen iluk ogo an nobaget wenggel nea lek mene nek welagep! At Daud an nonggwarek namingmingengge a'nogo nen an nebe ninggini'mo nen wasigin iluk eil wo'nabik nugu kwelek inom, nen an namlogo Yonatan a'nogo nen ogore at Daud oba yi'nogo hilingi'no iluk endawimo kagalik nugu kwelek oba nen mene ogore yaganeti'legat hilingiti lagep andi ri!” iluk yagaisasikhe.

⁹ A'nogo yagaisasikhe sambul andi re, at Doeg hun Saul anggo halharek mene inoe kepala a'nogo ogo re, it Saul agoromi sikhe fisogo mene inogogwi perwira omanogo inom andem welagaikhe. At Doeg a'nogo nen ikhi logolik he, ”An hamingmingengge nen he Daud a'nogo hun Ahimelekh Ahitub amlogo awi Nob mene a'nogo ambit wagunem higi o.

¹⁰ Wagama re, At Allah nen at Daud ebe faget wene yi'nogo hilingi'no ti'nogo hilingi'no iluk yaganesuageluk kinotunem higi. Nen, fenakwe re at Daud faget sumburu kwemangge wogotik! Hun Goliat Filistin agun enggarok a'nogo wogetik ikhi laga higi o,” iluk yagatikhe.

¹¹ A'nogo yagatikhemo at raja nen he Ahimelekh imam Allah eilhanem hilingiti lagaikhe agun a'nogo inom, ogogwi agoromi it o Nob andoma Allah eilhanem hilingiti logolik werek mene inom, wolinabi loageluk miminginafikhe. Wolinabi lagaukwama wagaukwasik he at raja a'nogo oba wagaukwa.

¹² Wagaukwama at Saul en Ahimelekh oba ikhi logolik he, ”Hun Ahitub amlogo yi, hesanggo holin!” iluk isikhemo, aren onggo ikhi logolik he, ”Wui, neisena,” iluk isikhe.

¹³ Andi isikhemo at Saul en heinok wokhikhi logolik he, ”Nenahalok hat Daud hinom hinane seberogo makfuluk an noasugun iluk ikhi lagep? Nenahalok at amburu nunggu mene wogetik, enggarok wogetik, haren Allah oba wene ebe yi'nogo iluk yagahesuageluk kinotik egen nogo? Andiba re yogondak an ninom minggilagosik ninggini'mo nen an nebe pinggi noasigin iluk eil wo'nabik nikho andi,” iluk isikhe.

¹⁴ A'nogo isikhemo at Ahimelekh en ikhi logolik he, ”Andiba nen he, at Daud andi re hun hat hagoromi sikhe fisogo mene inogogwi lego mene perwira omanogo nen mondok tiphogo nek hilingitarek mene re athe lek nogo a? At andi re hun hat honggwarek heamal, nen hat honggwarek kagalharek mene omanogo inoe, nen hun hat hawi silimo welagaikharek mene mondogaren at enek he, along anggikhi logolik legeisogo fikhi lagep mene o.

¹⁵ An hamingmingengge nen Allah yi'nogo hilingisin iluk yaganesuageluk andi re eberogo nen kinotiba nen, an hamingmingengge andi sambul enek attak-attak hilingiti'lek. Nen at ninom ninane misik makfuluk hun haren noasugun iluk hilingiti lagep egen mene andi re, an hamingmingengge re wene andi faget he mondok nonggot enggere neisena, haren he an hamingmingengge noba ogo, athe, an neisok erokwe ap misik oba iluk ogo, hikhibet nisa fuk!” iluk yagatikhe.

¹⁶ A'nogo yagatikheba nen at raja nen ikhi logolik he, ”Ahimelekh! Hat inom it hogogwi hagoromi inom he mondogat wa'lasugun o,” iluk yagatikhe.

¹⁷ A'nogo isikhesik at raja nen it agoromi at along palogo era'lu mendek mene omanogo inoba ikhi logolik he, ”It imam Tuhan obaget hilingitarek mene andoma re mondogat inoa'ni o! It andi re at Daud inom wene misik mathasik hilingiri'lagwi hilingi'mo re. At Daud heise lagare iren inelu logoligen he, an yaganetu aple inabiren hilingiri'lagwi andi.” Oba nen he, it at ebe kagalek welagaikharek mene omanogo nen he it imam Tuhan faget hilingitarek mene omanogo inoatu aple inabiren kamo isukwa.

¹⁸ Andiba re, Saul en hun Doeg oba yagati logolik he, ”Weak-weak haren it inoasin!” iluk yagatikhemo, at Doeg a'nogo weak-weak siakhogo menla'luk laga logolik he, it imam omanogo mondogat inoatikhe. Linggene andi sambul he aren it imam mene inami'mo walimo hak mene enu efod elok isu hak mene inebe lambulogore 85 nen inoatikhe.

¹⁹ A'nogo inoatikhemo, at Saul en he afuni o Nob mene it imam inawi sili andi ogo mondogat inoasuageluk miminginafikhemo ap inom hemi inom, yenggerugwi inom, omalik fou mene inom, inanggo sapi, keledai, domba, inom mondok felelenghogo leget fisasukwa.

²⁰ We at Abyatar Ahimelekh amlogo nek he eluk wulifikhesik Daud were'ma lagaikhe.

²¹ Ambit lagaikhesik he, at Saul en it imam Tuhan faget werek mene omanogo mondogat inoate iluk, yagasi lagaikhe.

²² A'nogo yagasi lagaikhemo, at Daud en yagati logolik he, ”An nen linggene andi sambul he, at Doeg were'ma hasigisik he, an nawene yi re at Saul oba yagasi lagain andi iluk fut fesigi aro. Enggere it hogogwi heisugwi mondogat inoata mene andoma faget he an noba lombogat asigin o.

²³ Hat hebe nek he an ninom logouwogo, nen hendawimo hailo asu fuk. At Saul en hat hoasigiluk hilingiri'lago andi re, an ogore noasigin iluk hilingirik nikho aro. Enggere hat he an welagiba yoma hailo legengge logoin o,” iluk yagatikhe.