1 SAMUEL 2 - Allah Wene Fano Wene Hupla Inane

Hana nen Allah fogeratikhe wene

¹ At Hana nen Allah fogerati logolik, samban oba mel isikhe: ”Neisena Tuhan nen fanotnafenma nendawimo nagaiyek hikhi lagi o. Haren hilingitendek mene andi re, nendawimo nagaiyek anggigirek mene nek hilingiti lagen o. Hat neisena Allah nen lebetnafenma, nendawimo nagaiyek oba it naselei mene nen inane asegen wo'nabi'lagwi mene omanogo re, an nen ogo pilibinafi logogin aro.

² Neisena Tuhan hat hebe tegelek mandok welagen andi hak mene ekhe werek lego. We Hat hami-hamuaren hawe a'ma ninobagaluk fetninarek welagen o, neisena,” iluk yagatikhesik,

³ at ege ebe were'ma yagasu hak, mel isikhe: ”Hat nege nen heranen weneat honggwarek fogerakhigik, sewirakhigik ikhi logolik, yaganesigin mondok lego. Nineisena Tuhan yi mene ti mene faget futfikherek enek hilingi'mo re, afuni inobabut hilingitarek lombok mondogat higithogo nek wene inoba figik, kotik, ikherek andi nen, hat heranen wene an nabok piliphogo pela'nafi lagen mene andi re elugun warogo hane tonggok in o.

⁴ Ap kain mene inasikhe obakhe lilibuk ugu kwelek oba nen he, afuni inomame lek mene inomame ekhe inom ari'lago.

⁵ Attagat afuni inamburu oba heilarogo ninggi logolik, inalabut ninghogo ninggi lagaikha meneat he, yogondak sumburu legen helouwogeluk, inenggi onggo wogisoageluk hilingiri'lagwi o. Mene re, afuni attagat sumburu nele welagaikha meneat he, yogondak inamburu elok weregen inalabut ninghogo nili'lagwi o. He ekhe attak abili welaga mene yogondak eagwi inebe 7 nen taginafesik endawimo agaiyek hili'lago meneat he, at he ekhe eagwi inebe hokhorogot taginafe mene andi maben agasik werego,” iluk isikhesik,

⁶ Allah mel yagatikhe: ”Neisena Tuhan nenat, afuni inoatik, inelugerinafik, egendego. Afuni wa'la'luk lagaikharek oba kweang a'ma pelaginaplugen, hobuk andoma nen liakfisa wagendegaro.

⁷ Nen, Haren, afuni inenggi lek hilingisogo fisigik, nen inenggi werek hilingisogo fisigik, egendego. nen, it ekhe sebelfisigik, ekhe legetfisigik, egendegaro.

⁸ Afuni inangge lek mene mondok weak were'ma woginafik, hele warek hangge weak welagaikharek mene andi fikhalogo inenu werek mene inom fano hilingisogo fisigik, agaugwerinafi logouwageluk ineabu fano mene wogisigik, egendek. Kweang helage tik warek he, nineisena Tuhan mene andi nen he, kweang hat mene andiba loukhogo walhasiginmo welagarek.

⁹ Neisena Tuhan hagainafuri hane hologo hilingitarek mene wea'ma lanogoluk henggi fetninarek mondok welagendego. A'nogo meneat he, it afuni inobabut weak mene andi, o mum hik-hakse'ma lakfisamo alomat lasugun o. It afuni inonggwaregen yi'nogo ti'nogo ekhe hilingitarek lek andi nen he, it inonggwarek inomameba inomame asugun mondok lego.

¹⁰ Neisena Tuhan, hane pogoroba nen unggunggu aneba pak ugunem haselei mene inailo a'luk oak yaleik-taleik ugunem inebe mondok wolelenggen tagalogo inosigin o. Hat neisena Tuhan nen afuni kweangma mene mondogat wene inoba figik, kotik, igin mene, at ebe kain enupogot asuageluk wendeberogo menfesigin mene andi, omame wogetunem ungguloak uan asigin o,” iluk Allah fogeratikhe.

¹¹ A'nogo fogeratikhesik he, at Elkana againafuri inom o Rama inambotkwe lagaukwa. A'nogo meneat he, omalik Samuel a'nogo o Silo andoma herakfuluk lagaukwama, ap Eli Allah eisewerek mene a'nogo nen fisogo werek kwelek nineisena Tuhan faget hilingiti lagaikhe.

Ap Eli againafuri nen hilingiti lagaukwa wene

¹² A'nogo hilingitu kwelek, ap Eli againafuri inobabut mondok weak logolik, Tuhan agaugwerati'lek hilingiti lagaukwa

¹³ A'nogo hilingiti logolik, it imam mene welago iluk he, it afuni Israel mene inoba re inendawimo nen anggaluk enek hilingfisikhi lagaukwa. Iren hilingiti logolik he yi'nogo hilingiti lagaukwa andi: Ap misik ekhe nen wam warogo nolhu mene iluk waluk we'luk, wam a'nogo isago werek kwelek he, ap imam omanogo leberinafu mene ekhe nen garpu mene waluk we'luk,

¹⁴ garpu a'nogoba wam Allah faget warogo fisaluk panci elema isago were'ma folokhogo li'luk wulibi wagu halok he, it imam inangge ikhi lagaukwa. A'nogo hilingiti logolik, afuni Israel mene wam yi mene ti mene Allah faget fisaluk nolesuogeluk o Silo waluk wagu mene omanogo re a'nogo nek hilingiti lagaukwa.

¹⁵ At ap Allah eisewerek inamingmingengge mene andi nen he, wam asei endu nolugun mene faget oan tegelogo figi'le'ma we'luk he, afuni wam Allah faget fisaluk nolesugun mene andi mel yagaisikhi lagaikhe: ”It ap Allah eisewerek mene wam kurik isago mene wanugun inabit andi nen he, wam senggelek eluk mene halok endu enggen oba werakhoagaluk wo'ne'ni o,” iluk yagaisikhi lagaikhe.

¹⁶ A'nogo yagaisugunem, it afuni andi nen he, ”Niren, Yi'nogo hilingisugun, iluk wene palek werek higithogoat hilingisugun nen he, wam sei andi tak endu nolfuluk halogen, hat hendawimo hamolo anggagain mene hobugen wanugun o,” iluk yagati lagaukwa. A'nogo yagatunem aren he, ”A'nogo lego. Yogondak yaat, wo'nesugun o. Wo'neti'lek halok, nenggiabisak wanigin o,” iluk ninghogoat yagaisikhi lagaikhe.

¹⁷ A'nogo hilingitunem, ap Eli amlogomi inebe pire aremnogo nen he wam Tuhan faget warogo nolesi waga lagaukwa mene omanogo iren inendawimo seramet fuluk he, Tuhan eilhanem weak hokhorogoat hilingiti lagaukwa.

Samuel o Silo logolik hilingiti lagaikhe wene

¹⁸ It a'nogo hilingitu kwelek, at Samuel ebe oan yenggeregat logolik, nineisena Tuhan faget hilingitu welagaikhe. A'nogo hilingiti logolik, asu pisarek yo linen meneba kwago mene ap imam Allah faget hilingisuogeluk labetarek higithogoat laberogo hilingiti lagaikhe.

¹⁹ A'nogo hilingitu kwelek, at Samuel agaisa nen tahun hundik-hundik asu sogoi su endep mene kwakhigik fikhi la'luk, agun emberek wam Allah faget warogo nolesuogeluk waga logolik he wogosi waga lagaukwa.

²⁰ A'nogo wagunem, ap Eli nen Elkana agwe Hana emberek Tuhan nen fanorinafi logouwagaluk mel yagaisasikhe: ”Hiren hinomalik Tuhan obaget wogosi waga lagep mene yi obali'mo re, hinomalik ekhe inom At Tuhan nen hat hagwe yiba wogeti logouwago,” iluk inoba fanot fisasikhe.

²¹ A'nogo hilingitunem, At Allah nen Hana fanotfesikhemo, eagwi ap inebe henagan, nen helime inebe pire taginafikhe. Nen, at Samuel a'nogo re, ebe ekhe inom alue aga logolik Allah obaget hilingiti lagaikhe.

Ap Eli againafuri inomen hilingiti lagaukwa wene

²² A'nogo alue agu kwelek, at Eli ebe mondok yaman agaikhesik were'ma, againafuri nen afuni Israel mene mondok wiik-weakhogo hilingisogo fisugunem, inabok holhi lagaikhe. Nen ekhe re, hemi o Tuhan awi At ebe weinam asi wagarek oba ebekhalem andoma kagalek logolik Allah eabu hilingiti lagaukwa mene inom nogo ikhi lagaukwa mene inabok holhikheat.

²³ A'nogo hilingiti lagaukwa andi nen againafuri mel yagaisasikhe: ”Hit hinobabut mondok weak hilingiti lagep mene andi afuni Israel mene mondogaren an arat yaganesi wagunem nesanggo holhi lagi o. Hit hinobabut mondok weak hilingiti lagep andi nenahalok nogo?

²⁴ Nineisena Tuhan againafuri nen hit hilingiti lagep mene hinabok tindeli'lagwi andi re mondogat weago. Halok he, hit hinobabut mondok weak hilingiti lagep a'nogo hobuk ekhe hilingiti logogubo, nagainafuri.

²⁵ Afuni nen it afuniat weak hilingisogo fisogoin halok he, Allah nen it werekwe asimbik elok telinabigin o. A'nogo meneat he, Allah weak hilingisogo fogoin halok he, sa nen elok telninabigin anggegep? Mondok elo'lego nagainafuri,” iluk komorinafikhe. A'nogo komorinafikhe meneat he, At Tuhan nen it inoasigiluk arat anggasikhesi'mo nogo nen he, ineisena nen komorinafikhe mene andi inendawimo seramet fesukwasik herakfisasukwa.

²⁶ It a'nogo weak hilingitu kwelek meneat he, at Samuel a'nogo nek he ebe alue agu kwelek, Tuhan nen inom, afuni mondogaren inom, at faget inoba liok ikhi lagaikhe.

Ap Eli againafuri inom inoba hilinglasigin mene faget inelurogo yagaisasikhe wene

²⁷ A'nogo ugu kwelek, inenggi ekhe sambul he, ap Allah ane yagaisikhi lagaikhe mene ekhe nineisena Tuhan nen, ”Wene yi'nogo ap Eli yagasi lano o,” iluk wene warogo lakfei wagaikhemo, wagaikhesik mel yagatikhe: ”At Allah nen he, hat homba Harun againafuri inom afuni o Mesir mene inoe raja Firaun amingmingengge hit ferinarek were'ma, An nebe at Harun elokhoma menlagagi andi.

²⁸ Nen, afuni inunggulenu Israel mene mondogat inanggele'ma nen hat homba andi againafuri inom wenaginafigimo, inebe An eisewerek logolik, wam yi mene ti mene nolneti logogun oba yabu hilingitik, amben fano mene nolnetik, ikhi logolik, An ninom weneane uogoluk halok inunggulkwe efod su mene pukhogo nen igik, ikhi logouwageluk, inayonggo fesigi andi. A'nogo inayonggo fesigisi'mo re, it inebe inom, iren tagomangge mene inom. wam yi mene ti mene nolneti logolik, fenakwe it helikhi logouwageluk eisewerek fisasigi andi.

²⁹ A'nogo meneat he, An nen he, wam a'nogo warogo nolneti logogun, iluk yagahisasigi higithogoat nagainafuri nen wam warogo nolnetarek mene andi ebe lombok nolnetunem, hagainafuri nen inalabut faget, fano mondok mene ari nit wo'nisani iluk ugu kwelek, haren, inoba lombok, iluk herakfisikhi lagen andi nenahalok? Eli, hat hobabut he, nailo e. An endebat hangge agaugwetnafi logolik, hagainafuri nek he, hokhorogo agaugwerinafi lagen andi ri!

³⁰ An hit afuni Israel hineisena Tuhan Allah nen attagat wene wathisikhi logolik: Hit hinagainafuri inom, iren tagomangge mene inom, inebe An eisewerek a'luk mondok logogun o, iluk wene warisasigi andi. A'nogo meneat he, afuni An agaugwetnabugun mene halok An nen it agaugwerinafirek, nen inendawimo seramet nobagagu mene halok An nen seramet fisigiregat, andi nen he yogondak An nen wene warisasigi mene andi herakfisagain o.

³¹ Hesanggo fanorogo holino. Hat hagainafuri inom, iren tagomangge mene inom, ap alage mene nek An nen inoasigin oba weregaro. A'nogo inoasumo, it ap mene nek inebe umur uanhogo ineluk logogun mondok lego.

³² An nen afuni Israel ekhe mene inoba fanot fisugunem, yi'nogo ti'nogo hilingfisugu mene omanogo heilenggen haluk hendawimo heiselhik, ha'ma weak agik, ikhi logolik logogin o, nen hat honggwarek heisok erokwe mene re inebe mondogat oan souge werek kwelek wa'laga logogun.

³³ A'nogo meneat he, haren tagomangge mene ap misik ekhe eluk logolik An nobaget hilingiti logouwageluk enogo foumo at ebe imam logolik An nobaget hilingiti logogin. Oba nen he at ebe eil mondok mum mene asimbik, anggolo huranerogo logogin. Nen, haren tagomangge mene fena mondogat he wa'lasugun.

³⁴ Wene An nen yagaheti andi mondok eberogoat iluk enegat asuageluk ebe hilinglaga logolik, hat hagainafuri inebe pire Hofni Pinehas emberek o misik sambulat wa'lasugun o.

³⁵ It a'nogo wa'lasumo nen enek he, ap hunogoat mene ebe An eisewerek logolik, obabut hombunhogo An noba lomboksek logolik, An nen, yi'nogo hilingi'no, iluk yagatunem nane hologo hilingiti logogin mene ekhe wenagaisogo menfagain o. A'nogo menfembik, aren tagomangge mene inebe An eisewerek logolik, ap kaindek inenupogot An nen wenagaisogo menfisagain mene ineilhanem An faget hilingiti logouwageluk eisewerek fisagain o.

³⁶ A'nogo fisugunem, hat hagainafuri ineluk herakfisagain mene andi inebe lombok, uang inom, sumburu inom, it ap An eisewerek mene andi nen wogisikhi logouwageluk kino inoba laluk he, mel yagaisikhi logogun: Sumburu, we endebat wo'nesugun mene faget hit yabu hilingitunem lebethisagain o, iluk kino yagaisikhi logogun o, iluk ikhe,” iluk yagatikhe.