1 SAMUEL 18 - Allah Wene Fano Wene Hupla Inane

^1-2 At Saul inom Daud inom, emberek wenenggak a'nogo ikhi lagaukwasigen he, at Daud ebe Saul were'ma mondok-mondok logouwagaluk fakfesikhe. A'nogo fakfesikhesik, Daud hobuk yagati logolik, ”Hambotkwe heisena oba laga logou fuk,” iluk komoratikhe. At Saul amlogo Yonatan nen, Saul inom Daud inom emberek wenenggak isukwa mene andi esanggo holhikhesik he, endawinggen Daud oba liok isikhesik, onggwarek ebe endawinggen hundik welagarek hanggeat, endawiratikhe.

³ A'nogo anggasikhesik nogo nen he, Daud mel yagatikhe: ”Nagailak nemberek hundik mondok logouwogo,” iluk hombuk palhikhe.

⁴ Hombuk a'nogo palogo yagatikhesik, at Yonatan asu sogoi su mene nonggologo Daud wogetikhesik, weim yabigiluk waluk lagarek mene su inom, karok inom, sikhe inom, obakhe hele pugetu mene inomat, wogotikhe.

⁵ A'nogo wogotikhemo, at Saul en he, Daud ekhe aple ekhe aple hilingisuagaluk enggiba fesikhe mene mondogat fanorogo nek hilingiti lagaikhe. A'nogo hilingiti lagaikhe andi nen, at Saul en he, tentara mene inoe perwira at Daud logouwagaluk menfesikhe. A'nogo menfesikhemo agoromi tentara mene mondogaren inom, amingmingengge nen inom, at Daud ebe inendawi hundik mondok welagaukwa.

At Saul en Daud oba a'mage figik ebe abiret figik isikhe wene

⁶ At Daud en Goliat Filistin agun a'nogo ebe arat watikhesik ap tentara mene inebe esa logalogo inom o kota wesuogeluk wagunem he, hemi o afuni Israel mene inawi kota mondogaren kain raja Saul elokhoma wulifi logolik, inendawimo inagaiyek hokhorogo wuni watik, yi pinggong ti pinggong watik, ikhi logolik, wuni lagik-wagik watukwa.

⁷ A'nogo wati logolik yi'nogo isukwa: At Saul en ninaselei mene beribu-ribu nek inoate, oba nen he, at Daud en enek he, perpuluh-puluh ribu nen inoate,” iluk ilik wulibi waga lagaukwa.

⁸ Wuni a'nogo watunem, at Saul esanggo holhikhesik endawimo nen he, ”Iren he Daud en ap inebe perpuluh-puluh ribu inoate meneat he, Saul enek he, inebe beribu-ribu hangge inoate, iluk anggagasigen wuni a'nogo wata he a? Halok he, inenggi welagi'legat, at Daud it inoe raja logouwageluk menfogoin higi,” iluk a'mage hokho mene lagasikhe.

⁹ A'nogo anggasikhesik, andi huli nen he, Daud oba a'mage fesikhesik ebe abiret fesikhe.

¹⁰ A'nogo abiret fesikhesik ohealekwe re, at Saul sige enggim fisogo aiba were'ma aremnogoat, nineisena Tuhan nen munggwarengge obabut weak mene ayonggo fesikhesik Saul oba lakfei wagaikhemo, afuni lugu-lugwi palik mene nen hilingisu hak hilingitikhe. Andem oba re, at Daud ebe pinggong wati lagaikhe hak watunem,

¹¹ Saul endawimo nen he, ”Daud ebe sige yiba o hobat inom hun fagain,” iluk anggasikhesik he, at Saul arige a'nogo enggi pireba woukhogo lakfesikhe mene re Daud en fanorogo ogal fesikhe.

¹² A'nogo hilinglagaikhemo, at Saul endawimo nen he, ”Nineisena Tuhan nen an herak nobagaikhesik, Daud enek he, serogo werek higi,” iluk futfesikhe. Andi nen he, at Daud faget hobuk a'nogo hilingisu re, ailo agaikhe.

¹³ A'nogo ailo agaikhesik, Daud ap tentara inebe 1.000 mene inoe logouwagaluk, o Saul aiba andoma herakfuluk ale'ma lakfesikhe. A'nogo lakfesikhemo, it ap Israel mene weim yabi louwogeluk he, at Daud en agoromi tentara omanogo woginarek laga lagaikhe.

¹⁴ Nen, at Daud nineisena Tuhan nen lebethugu kwelek nogo nen he, yi aple ti aple hilingitunem, fano nek aga lagaikhe.

¹⁵ A'nogo omame agunem, at Saul en, eilenggen hasikhesik he, Daud oba ebenagaik ailoti lagaikhe.

¹⁶ A'nogo meneat he, Daud en melalinafu were'ma re along aple it faget hilingiri'lago iluk he, it afuni Israel mene nen inom, Yehuda mene nen inom, Daud inendawi mondok welagaukwa.

At Daud he Saul a'logo wanhikhe wene

¹⁷ A'nogo welagaukwa andi nen, at Saul endawimo nen he, ”Daud an nen wasigin he fuk, athe ap Filistin mene nen weim yafi logolik wasuak,” iluk weim abok endawimo welagaikhe. A'nogo welagaikhe andi nen inenggi ekhe sambul at Saul en he Daud oba yi'nogo yagatikhe: ”Haren weim Tuhan faget yabigiluk hambong siserek welagen aple a'nogo re ekhe inom inukhagain halok he, An na'logo manggusa mene hele enu Merab he hat wokhesigin o,” iluk yagatikhe.

¹⁸ A'nogo yagatikhemo, Daud en he, mel yagatikhe: ”An nen hat ha'logo wanimbik, nebe noe kain raja neamal asigin andi, an hamingmingengge yi nebe inom, neisena hagarinafuri ekhe inom, it afuni Israel mene inanggele'ma welagorek andi, ninebe esin mene anggegen a? Elo'lego,” iluk yagatikhe.

¹⁹ At Saul en a'logo Daud wogosigiluk yagatikhe meneat he, arat igesugun oba asi wagaikhemo, aremnogo ferekhogoat he hele Merab ebe ap enu Adriel aiba Mehola mene andi igetikhe.

²⁰ A'nogo wogetikhemo, at Saul a'logo ekhe enu Mikhal endawinggen Daud oba himbiret fesikhe. Ariginhikhemo afuni nen he, ”Mikhal endawinggen Daud oba tibet fikhesik werego,” iluk isukwama Saul esanggo holhikhesik he, ”Fano aro,” iluk isikhe.

²¹ A'nogo isikhesik endawimo nen he, ”Paik hele fugunem ke'nok ikherek andi hak, na'logo Mikhal wokhesigin, iluk laligin meneat he, at weim yafunem, ap Filistin mene nen ebe wasugun andi fano mondok,” iluk anggasikhesik, hobuk enggi pirenek meneba Daud mel yagatikhe: ”Hat yogondak an neamal asinogen o,” iluk yagatikhe.

²² A'nogo yagatikhesik, at Saul agoromi nen wene hinagaisogo Daud yagasuageluk oba lakfisasikhemo, lagaukwasik mel yagatukwa: ”At Saul ebe inom, agoromi mondogaren inom, hat hebe inendawi werego. Yogondak haren a'logo wanigin obaat wanigin o. Andi nen he, eberogoat wanino o,” iluk yagatukwa.

²³ Iren a'nogo yagatukwa meneat he, at Daud en mel yagaisasikhe: ”Hit hinendawimo nen he ap inoe raja ina'logomi woginapluk ineamalugwi agu aple andi re serek anggegeba? An yi re nangge yi mene ti mene nelagaik welagimo re, elo'lego.” iluk yagaisasikhe.

²⁴ At Daud en a'nogo isikhe mene andi, iren at kain Saul yagasi wagaukwa.

²⁵ A'nogo yagasi wagaukwama, at Saul en it hobuk Daud mel yagasi loagaluk lakfisasikheat: ”At kain raja nen he, na'logo onggo wo'nesu hak he, an naselei mene Filistin mene inebe 100 nen inoasimbik, inagap inenggalimo mene palogo wo'nesi wesugun andiat namolo o, iluk ikhe iluk yagasi lano,” iluk lakfisasikhe. (A'nogo isikhe andi, at Daud ebe ap Filistin mene nen wasuageluk isikhe andi.)

²⁶ At Saul agoromi omanogo nen at Saul en isikhe mene a'nogo Daud yagasi lagaukwama, at Daud en he, elok, anggasikhesik he, fano isikhe. A'nogo isikhesik he, ebe wanigin oba oan horogasi wagi'lek werek kwelek,

²⁷ at agoromi tentara mene inom o afuni Filistin mene inaiba lagaukwasik, ap inebe 200 nen inoatukwasik, at Daud Saul eamal asuagaluk, inagap inenggalimo mene palogo ekhe herakfigi'lek mondogat Saul wogosi wagaukwa. A'nogo wogosi wagaukwama, a'logo Mikhal ebe Daud wogetikhe.

²⁸ A'nogo igetikhesik, at Saul en he, ”Daud ebe nineisena Tuhan nen serogo werek higi. Nen, an na'logo Mikhal en Daud endawinggen mondok hundik werek higi,” iluk futfesikhe.

²⁹ A'nogo futfesikhesik, hobuk ebenagaik ailo mondok agaikhe, at ebe eluk logolik oba re, Daud abit mondok welagaikhe.

³⁰ A'nogo werek kwelek, ap Filistin mene nen, ap Israel mene inoasuogeluk hup ebe lombok wagunem, at Saul agoromi tentara mene ekhe nen inebe endebat hangge inoati lagaukwa meneat he, at Daud enek he, inebe mondok hokhorogo inoati lagaikhe. A'nogo inoatunem Daud enu hokho arik laga lagaikhe.