1 SAMUEL 13 - Allah Wene Fano Wene Hupla Inane

Ap Filistin mene inom weim yafukwa wene

¹ At Saul raja menlagaikhesik oba, inenggi ekhe sambul he,

² aren he, ap Israel mene inebe 3.000 nen wenagaisogo fisasikhesik he, inebe 2.000 at inom o Mikhmas daerah Betel tom oba andoma kamo isukwasik welagaukwa. A'nogo werek kwelek, ap inebe 1.000 nek he, amlogo Yonatan inom afuni Benyamin mene inaiba o Gibea lakfisasikhe. A'nogo hilingitikhesik, inebe fena minggilogo re inailokwe lombok loageluk sugulogo lakfisasikhe.

³ A'nogo lakfisasikhemo lagaukwasik, hobuk at Yonatan nen afuni Filistin mene inoe panglima kabelek mene o Geba wagaikhesik were'ma watikhemo, wene andi it afuni Filistin mene inesanggo holhukwa. A'nogo hilinglagaikhemo, at Saul en afuni Ibrani mene inaiba o yi awi ti awi werek mene weim yabi loageluk, ap ekhe pinggong hokho mene anetfuluk weim yonggo loageluk lakfisasikhe.

⁴ A'nogo lakfisasikhemo, afuni inunggulenu Israel mene inailokwe mondogat yagaisilik laga logolik he, mel yagaisasukwa: ”At Saul en, ap Filistin mene inoe panglima kabelek mene watemo, ap Filistin mene nen afuni Israel mene inebe inabit mondogat agama o. Andi nen he, ap mondogat ekhe kamo igi'lek Saul oba o Gilgal misi'mo andogosi logoin o,” iluk yagaisilik lagaukwa.

⁵ A'nogo yagaisilik lagaukwama, ap inebe andogosi lagu kwelek, it ap Filistin mene ogo re, ap Israel mene inom weim yabuogoluk, inebe andogotukwaat. A'nogo andogotukwa andi, kereta kuda nen lisogo waluk weim yafarek mene 30.000 nen inom, it ap kuda amboloba hurek logolik weim yafarek mene inebe 6.000 nen inom, ap tentara ineisok oba laluk weim yafarek mene inebe ial i laut yenggelek esanggokwe welagarek andi hangge mondok hokhorogo andogotukwa. A'nogo andogotukwasik, o Bet-Awen nen abel elikwe mo liabi wagarek higit o Mikhmas andoma inawi tenda ba wusi wagaukwa.

⁶ A'nogo wusi wagaukwasik, afuni Israel mene inoasuogoluk mondok hilingisu elo'lek inailo mene kwi wagaukwa. A'nogo kwi wagaukwama, afuni Israel mene mondok ninggi'nogo hilingisu heat hilinglagaikhe. A'nogo hilinglagaikhemo, it ap Israel mene inebe logalegat oumoukwe inom, tom oba kiling elekwe inom, helep honggolekwe inom, i mogo habulikwe inom, kweang anggwe folelekwe inom, hina'larik lagaukwa.

⁷ Nen it fenakwe ekhe re, i Yordan palogo o afuni Gad mene inom, Gilead mene inom, inailokwe omanogo lagaukwa. A'nogo hilingitu kwelek, at Saul enek he, o Gilgal mondok welagaikhe. Were'ma, it afuni ekhe at inom welagaukwa mene inailo mondok hokho agaukwasik inoagelekwe abolok isikheat.

⁸ Nen, Samuel en Saul yagati logolik, ”Henggi 7 nen ye'narek logoino o,” iluk yagatikhe hagat yerogo welagaikhe meneat he, at Samuel ebe Saul oba lagi'lek kamo isikhe. A'nogo werek kwelek, afuni nen Saul amunek herakfisaluk puguluogeluk, it ekhe attak pugulhukwa.

⁹ A'nogo hilingitukwa andi nen at Saul en afuni mel yagaisasikhe: ”Wam Allah faget warogo nolesugun mene inom, At ninom hobuk lambulninabuageluk waresugun mene inom, waluk we'no o,” iluk yagaisasikhemo, wogosi wagaukwama re at Saul amunegen warogo noletikhe.

¹⁰ A'nogo mondogat elugun warogo noletikhe hak he, at Samuel Saul oba lagaikhe. Lagaikhemo eilenggen yethasikhesik hai wasigiluk elokhoma wagaikhe. A'nogo wagaikhe meneat he hat nena mene hilingitenma wagi?

¹¹ Iluk heinok wokhasikhemo at Saul en he, ”Hat wesigin egen oba wagi'lek tagan ikhi lagama, an neilenggen hugunem he, afuni an heraknobagaluk puguluogeluk, it ekhe attak pugulha, nen, ap Filistin mene o Mikhmat andogotaat.

¹² Andi nen nendawimo nen he, Nineisena Tuhan nen endawit ninabuageluk an nen At ayonggo figi'le'ma, ap tentara Filistin mene an yoma were'ma noasi wesugun higi, iluk nendawimo ebetirik he, wam Allah faget warogo nolesigin, iluk anggigirik, hilingiti o,” iluk yagatikhe.

¹³ A'nogo yagatikhemo, at Samuel en Saul mel yagatikhe: ”Noe. Hat kemburogo hilingiten. Hat nineisena Tuhan Allah nen, yi'nogo hilingi'no, iluk yagahete mene ane hologo hilingi'lenma re, Aren hat hebe raja logouwagaluk hilinghafesik, haren tagomangge mene afuni Israel mene inogogwi kaindek raja mondok logouwageluk hilinginafik ilebaro.

¹⁴ Meneat he, At nineisena Tuhan nen yagaheti'lek mene hilingiten andi nen he, hat hebe raja logolik afuni ferinarek logogin mondok lego. We At nineisena Tuhan endawimo nen he, ap hunogo mene ekhe an nagainafuri inoe raja logouwageluk anggikhe mene arat wenagaisogo fikhemo werego,” iluk yagatikhe.

¹⁵ A'nogo yaga'luk, at Samuel o Gilgal herakfisaluk pikhit afuni Benyamin mene inaiba o Gibea kweang oba andoma lagaikhe. A'nogo lagu kwelek, at Saul agoromi tentara esa logalek mene inebe miren hak werek iluk enggi wenatikhe mene re, inebe 600 hangge hilinglagaikhe.

¹⁶ A'nogo hilinglagaikhemo, at Saul amlogo Yonatan emberek inagoromi tentara mene inom inawi tenda afuni Benyamin mene inaiba o Geba andoma wusi lagaukwa. A'nogo wusi lagaukwa andi, ap Filistin mene inawi tenda ba o Mikhmas andoma wurik werek kwelek wutukwa.

¹⁷ O andi sambul, ap Filistin mene ekhe yi mene ti mene hinatarek mene esa henagan nen fologo o tenda it Filistin mene nen wutukwaba omanogo nen he yi mene ti mene teli logoin iluk wulifukwa. Wulifukwasik he esa ekhe re o Ofra o Syual anggweang fikhit andoma lagaukwa,

¹⁸ nen, esa pirenek mene re o Bet-Horon higit lagai wagaukwa. Nen, esa ekhe henaganek mene re o Zeboim tonggwe honggolek, o leimo afuni le'ma honggolek, huli-hulimo andoma pi wagaukwa.

¹⁹ Andem sambul he, afuni Filistin mene nen afuni Ibrani mene yagaisikhi logolik, ”Hiren karok inom, sige posiemanggen mene inom, hilingisugun mondok lego,” iluk yagaisikhi lagaukwa andi nen he, ap Israel mene re posiemanggen meneba yi mene ti mene hilingitu inelu mene ekhe welagaukwa mondok lek.

²⁰ Andi nen he, it afuni Israel mene nen kweang mugusogo lakfugu mene inom, wam sapi ba kelogo fugunem yabu wanherek mene inom, inarige sekop inom, posie inom karok inom enggat masuogeluk halok he afuni Filistin mene inoba waluk laga lagaukwa.

²¹ A'nogo wani laluk, iren ineaga enggat ma'nisoageluk inom, wam sapi nen li'luk lagunem kweang murik lagungge enggat ma'nisoageluk inom he, uang logam enggen magendek mene misik enek fikhi lagaukwa, nen kweang eilak warogo fugu mene enggat inom, inarige sekop enggat ma'nisoageluk inom he onggo uang enggen magendek mene pire fikhi lagaukwa.

²² A'nogo welagaikhe lek andi nen, o Mikhmas weim yafukwa andi re, it ap Israel mene re inenggarok ogo, inarige iluk ogo posie misigat halok ogo, mondok le'ma re, we, it Saul amlogo Yonatan emberek enek he, were'ma weim andi yafukwa.

²³ Nen it afuni Filistin mene nen he o Mikhmas tom alonggo'ma andoma nirogo ninghogoin iluk kagalek logogun oba faget o misik ekhe wutukwa.