1 KORINTUS 3 - Allah Wene Fano Wene Hupla Inane

”Ninebe Allah amingmingengge welago,” iluk yagaisasikhe wene

¹ Nerugwi nagaila'lak. An nen attagat he, wene afuni Allah Areagun inendawimo werek mene halok yagaisagarek hak he, yagahisigi lego. A'nogo yagahisasigi lek andi re, hit Kristus hinom hunitigipsigat he, hinobabut hinetogat logolik, omalik ket tago mene hangge welagagip andi nen he, afuni inobabut a'nogo were'ma yagaisagarek hak yagahisasigi andi.

² An nen he, afuni inaluendek sumburu haro mene wogisagarek hak, hit wene wurik mene wanugun elo'lek andi nen he, wene wurik mene yagahisigi lek. We, omalik ket tago mene ineilak wogisagarek hak, wene lebelek mene yagahisasigi andi. Mene re, yogondak he, a'nogoat wene wurik mene yagahisagain he, elo'legat welagep andi.

³ Hit-hirat pou igik, wene palhik, ikhi lagep halok he, hinobabut he, afuni inobaburat welagebo. Afuni inobabut inetogat logolik hilingitarek hak hilingiti lagep andi nen yagahisigi o.

⁴ A'nogo hilingiti logolik, hit ekhe nen he: ”Nit Paulus ebikhit,” igik, nen, hit ekhe nen he: ”Nit Apolos ebikhit,” igik, ikhi lagep halok he, hinobabut he, afuni inobaburat welagebo.

⁵ At Apolos andi sa nogo? Nen, an Paulus sa nogo? Nit andi ninoe Enupogorenat endawimo anggaluk nineabu lombok hilingiti logouwageluk ninayonggo fesikhemo re, at amingmingengge welago. A'nogo logolik, wene yagahisasugumo re, hinendawinggen Yesus oba himbiret fesigip andi.

⁶ Wene andi, sumburu awi yatarek hak, an nen yati. Nen, at Apolos nen he, i kweisalhe. Nen, ebe re, at Allah nenat hokhoet fesikhe.

⁷ Ebe esin enu werek he, awi yaterek mene andi fuk. I kweisalik lagarek mene andi legaro. We, esin enu werek he, Allah nen ebe hokhotfikherek andiat enu werego.

⁸ An awi yatirek mene inom, at i kweisalherek mene inom, nemberek higirat meneat he, ninenggi onggo re, ninebe lombok yabu hilingiti logogun mene higithogoat wo'nisagain o.

⁹ Hit hinebe andi Allah eabu hak were'ma re, nit nemberegen Allah wokfisikhi lago. Ekhe re, hinebe Allah awi hak were'ma re, nemberegen Allah awi wurogo fisikhi lagoat.

¹⁰ At Allah obabut fano nen nayonggo fesikhemo re, o andi tik he, an o nendawinggen wenggelek mene nen watigimo nen, it ekhe nen oba loukhogo wuri'lagwi andi. Mene re, afuni inebe lombok, o tik andiba loukhogo wusuogeluk halok he, fut fulugen inendawi wenggelogo wusugun o.

¹¹ At Allah nen he, ”O andi tik, Yesus Kristus andiat logogin,” iluk fesikhe andi nen he, at ekhe nen, o tik hunogo mene wasigin mondok lego.

¹² O tik andi warek were'ma, oba loukhogo re, it ekhe nen onggo hokho palogo, emas mene wutik, perak mene wutik, helebenggen permata mene wutik, wuri'lagwi. A'nogo wutu kwelek he, it ekhe nen he, e mene wutik, e ket engga mene wutik, puk engga mene wutik, wuri'lagwi andi.

¹³ A'nogo wutu were'ma, at Kristus hobuk wesigin andi sambul, afuni nen o wuta mene lombok. Fano a? Weaga, iluk, endumo walhugunem, fakhogo enegat agunem hogoin o.

¹⁴ A'nogo walhugunem he, at ekhe nen o tik andiba wute mene endu ninggi'lek logogin halok he, enggi onggo wogosigin o.

¹⁵ A'nogo meneat he, at ekhe nen o wute mene, endu ningge halok he, o hali nunggunem inebe tegelogo fisa lagaikharek hak, at o wute agun andi ebe nek he, tegelogo fei lagain meneat he, onggo heligi'lek, nongasigin o.

¹⁶ Nit ninebe Allah awi wurigat, iluk he, hinonggot nogo? Allah Areagun ninendawimo awi wurogo welagarek, iluk he, hinonggorat nogo?

¹⁷ Hit hinebe, at Allah awi wurik welagep andi, at meneat welagebo. Halok, hiren Allah awi wurik andi weagetfoumo re, aren hit weagethinabigin aro.

¹⁸ Hinonggwaregen hinebe lalagubo. Hat ekhe nen he: ”Afuni yoma inanggele'ma nen an enek he nendawinggen kagalek mene welagi,” iluk anggikhi lagen halok he, hendawimo ebe wene andi wenggelasuagen he, afuni inanggele'ma yoma nen kemburogo logogin halok fano.

¹⁹ Afuni kweangma mene nen he: ”Nit afuni ninawene ninendawimo mondok kagalek,” iluk anggili'lagwi halok he, Allah nen he, ”Inendawinggen nonghongsek werego,” iluk anggikherek. It ap Allah ane lisu palogo fikhi lagaukwa mene nen he: ”Paik hele fugunem watarek hak, it afuni kweangma mene yoma inendawimo kagalek hak logolik lalinabi'lagwi andiba, ke'noget lagunem he, Allah nen weagerinabigin werego,” iluk lisu palogo fesukwa.

²⁰ Nen, wene ekhe re, yi: ”It afuni inendawimo kagalek mene nen inendawimo eberi'lagwi andi re, we tulemat eberi'lagwi o, iluk nineisena Enupogot elu,” iluk lisu palogo fesukwama weregaro.

^21-22 Halok he, an Paulus nebe inom, at Apolos ebe inom, Petrus ebe inom, o kweangma yoma mondogat inom, ineluk welagaikharek andi inom, wa'lagaikharek andi inom, o yogondak ya welagarek mene inom, hobuk hilinglasigin mene inom, andoma mondogat he, hit eisewerek andi nen he, hiren: ”An noe andi o,” iluk afuni mene faget fogerakhagubo.

²³ Hit hinebe andi, eisewerek he, Kristus aro. Nen, Kristus ebe eisewerek he, Allah aro.