1 KORINTUS 15 - Allah Wene Fano Wene Hupla Inane

Kristus ebe wa'lagaikhemo nen Allah nen eluget fesikhe wene

¹ Nerugwi nagaila'lak. Yogondak he, an nen wene ekhe hinendawimo ebethisak. An nen fano wene yagahisa wagagimo wanhigipsik he, hinendawinggen fano wene andiba wurik agepsik welagep andi.

² Fano wene yagahisa wagagi wene andiat hinenggi ninghogo fisogo logogun halok he, andiba at telhinabi'logo. A'nogo meneat he, hit we tulemat alemarogo hinendawinggen Allah oba himbiret fegepsik welagep halok he, elo'lego.

³ Wene an attak wanhigi mene, hit hobuk yagahisasigi andi re, ebe mel anggigi. Nit weak hilingiti lagagu mene faget, at Kristus ninenggi elugun oba wasugun iluk lisu palogo fesukwa higithogoat ebe watukwa andi.

⁴ Watukwama re, ebe warek omoula fei lagaukwa. Fei lagaukwama re, enggi pire warek welagaikhesik enggi ekheba Allah nen eluget fesikhe. Eluget fesikhe andi re, fageat Allah ane lisu palogo fesukwa higithogoat eluget fesikhe andi.

⁵ Eluget fesikhemo re, at Petrus eilenggen hoageluk elokhoma menlagaikhe. Ombo'ne re, it inebe 12 nen omanogo ineilenggen hoageluk inelokhoma menlagaikheat.

⁶ Ombo'ne re, irat ombo'ne nikhi lagaukwa mene inebe 500 nen ekhe inomat, ambine ineilenggen hoageluk inelokhoma menlagaikheat. It ineilenggen hasukwa mene andi, inebe hokhokwe yogondak ineluk werek meneat he, ekhe endepkwe inebe wa'lagaukwa.

⁷ Arat menla'luk hobuk he, Yakobus eilenggen hoageluk elokhoma menlagaikheat. Hobuk he, aren inayonggo fuluk lakfisasikhe mene omanogo ekhe inom inebe mondogaren ineilenggen hoageluk inelokhoma menlagaikheat.

⁸ A'nogo inelokhoma menlarik waga lagaikhesik, fem hobuk he, ebe an omalik inendawi lek ket tago mene hangge meneat he, nelokhoma menlagaikhemo neilenggen hasigiat.

⁹ Nit Yesus nen ninayonggo fuluk lakninobagasikhe mene ekhe inenuwerek meneat he, an enek he, nenu lego. An nen Allah againafuri andogotarek mene yi enggin ti enggin hilinginafi lagagi andi nen, an nen, ”Nebe Yesus nen nayonggo fuluk laknobagai wagaikhe mene,” iluk, igin he elo'lego.

¹⁰ A'nogo igin elo'lek meneat he, Allah obabut fano nen nayonggo fesikhemo yi'nogo agagisik welagi o. Nayonggo fesikhe andi we tulemat fesikhe lek andi nen he, it ekhe mondogat yabu endebat hangge wanhu kwelek, an enek he, hokho hangge wanhi lagi o. Mene re, a'nogo wanhi lagi andi re, an nen wanhi lagi fuk. Allah obabut fano nen nemberegat logolik wili'logo o.

¹¹ Yabu andi ebe re, an inom, it ekhe inom, fano wene yagaisilik nikhi lago andi aro. Wene andiat yagahisugunem, hiren eberogoat iluk wanhigip andi.

Afuni warek mene Allah nen inelugerinabigin wene

¹² At Kristus wa'lagaikhemo nen, hobuk Allah nen eluget fesikhe, iluk yagahisikhi lago meneat he, hit ekhe nen he, ”Afuni wa'lagunem en Allah nen inelugerinabigin lego,” iluk ikhi lagep andi nenahalok?

¹³ Afuni wa'lagunem Allah nen inelugerinabigin lek logoilepma re, at Kristus wa'lagaikhemo eluget fesikhe andi, eluget feilep legaro.

¹⁴ At Kristus wa'lagaikhemo Allah nen eluget feilep le'ma re, niren wene we tulemat yagaisikhi logoilo. Nen, hiren ogo re, wene eberogoat iluk wanhigip andi re, we tulemat wanilebo.

¹⁵ Niren Allah abok ikhi logolik he: ”Aren he, Kristus eluget fesikhemo nineilenggen hasugu,” iluk yagaisogorek. Mene re, afuni wa'lagunem Allah nen inelugerinabigin lek logoilepma re, at Kristus eluget feilep legaro. Nen, at eluget feilep le'ma re, it ekhe nen he: ”Hiren ikhi logolik, Allah nen a'nogo hilingitikhemo nineilenggen hasugu, iluk ikhi lagep andi re, hinera nenat ikhi lagep,” iluk higirat yaganiselebo.

¹⁶ Afuni wa'lagunem Allah nen inelugerinabigin lek logoilepma re, at Kristus ebe eluget feilep legaro.

¹⁷ At Kristus Allah nen eluget feilep le'ma re, hiren, ”Wene andi eberogoat,” iluk wanhigip andi, we tulemat wanilepma re, hit weak hilingiti lagagip mene andi, wene hinoba logoilebo.

¹⁸ Andi hak, it ekhe Kristus inom hundik logolik wa'lagaukwa mene andi re, nong a'lep aro.

¹⁹ Niren he, ”Fanotninabigin,” iluk ninendawinggen Kristus oba himbiret fesugusik ninendawimo hai hikhi lago andi. Mene re, yogondak ya nineluk logolik enek a'nogo anggikhi logombik he, hobuk nineluget ninabigin lek logoilepma re, it afuni fena nen, ”Eigo. Nendawilage,” iluk it ekhe yagaisigi'lek nirat yaganisikhi logoilebo.

²⁰ A'nogo meneat he, at Kristus wa'lagaikhemo, Allah nen eberogoat eluget fesikhemo werego. A'nogo eluget fesikhe andi re, yi mene ti mene attak mene tak wanharek andi hak, it wa'lagaukwa mene, at Kristus tak eluget fesikhe andi.

²¹ At ap ekhe nen wa'lari'lagwi ero yanggulhikhe andi hak, at ap ekhe nen ineluk ari'lagwi ero yanggulhikhe andi.

²² At Adam ninom hundik logolik he, ninebe mondogat wa'lagorek andi hak, nit Kristus ninom hundik were'ma re, Allah nen ninebe mondogat nineluget ninabigin aro.

²³ A'nogo meneat he, Allah nen ninobali'mo lombok higit-higit nineluget ninabigin. Yi mene ti mene attak mene tak wanharek hak, at Kristus tak eluget fesikhemo andi nen he, at ebe wesigin andi sambul, nit Kristus agoromi mene halok nineluget ninabigin.

²⁴ Nineluget ninabimbik he, o wurep oba arat hilinglasigin. Andi sambul he, at Kristus nen inebe kain welagaikharek andi inom, eisewerek welagaikharek andi inom, inomame welagaikhahrek andi inom, mondogat legetfisaluk he, yi mene ti mene, at awe a'ma werek mene mondogat nineisena Allah awe a'ma logouwageluk enggiba fagain.

²⁵ A'nogo fagain andi, at Allah nen Kristus inom weak mene mondogat eisogen alperelogo fisoagen awe a'ma inobagai wesigin andi oan werek kwelek, at Kristus ebe kainat mondok logogin.

²⁶ Inom weak mene andi, ebe re, wa'lagaikharek ero andi aro.

²⁷ Allah ane lisu yi'nogo palek werek: ”Yi mene ti mene mondogat at awe a'ma arat inobagai waga o,” iluk isukwama lisu palek werek. ”Mondogat awe a'ma inobagai waga o,” isukwama werek meneat he, at Allah inobagai waga mene onggwarek ebe Kristus awe a'ma kwigi'lek, iluk enegat werego.

²⁸ Yi mene ti mene mondogat Allah nen amlogo awe a'ma inobagai wagunem he, at kain Allah alegat enu lego logolik yi awi ti awi at awe a'ma logouwageluk he, at amlogo onggwaregen he, ”Neisena. Haren yi mene ti mene mondogat an nawe a'ma arat nobagegen andi re, an yogondak hat hawe a'ma sebe iluk logogin o,” iluk yagasigin.

²⁹ Wene ekhe re, it afuni wa'lagaukwa mene hobuk inelugerinabigin mondok lek logoilepma re, it faget it ekhe ima pelaginafi lago andi re, ninggi'nogo hilingisugun anggegep? Nenahalok ima pelaginafi logogun.

³⁰ Nen, nit ogo re, linggene hubanggo youkwe mondok nikhi lago andi, nenahalok nikhi logogun anggegep? A'nogo nikhi logogun legaro.

³¹ Nerugwi nagaila'lak. Hinendawinggen en ninoe Enupogot Kristus Yesus oba himbiret fuluk ninom hundik welago andi nen, an hit faget nalong agi iluk anggikhi logolik mel yagahisak. An he, hundik-handik nebe noasuogeluk ugu kwelek nafe morogo welagi o.

³² An o Efesus yoma logolik, afuni wam maro obabut weak mene inom yafarek hak ninom yafi lagosik andi, afuni kweangma mene faget yafarek hak yabilema re, nena mene saburele anggegep? Afuni wa'lagaukwa mene inelugerinabigin lek logoilepma re, it ekhe nen isukwa hak, mel ilo: ”Nit ohealek ninebe wa'lasugunmo re, yogondak ya elama faget nineluk logolik, sumburu inom, wam inom, enggen amusu inom, yi mene ti mene ninendawimo ninagaiyek anggikhi logolik elama ninambe ninggi logouwok,” iluk isukwa hagat ilo o.

³³ Afuni nen ikhi logolik: ”It ekhe inobabut weak mene hinom hunisugun halok he, hit hinobabut fano mene weak asigin o,” iluk agarek andi eberogoat iluk, hinonggwaregen hinebe lalagubo.

³⁴ Weak hilingiti lagep mene andi herakfisaluk he, yogondak hinebe hebela'ni o. Hit ekhe Allah ebe hinonggot welagep andi nen, hinenggali wasigeluk yagahisigi andi.

”Afuni warek mene Allah nen inebe yi hangge inelugerinabigin,” iluk yagaisasikhe wene

³⁵ A'nogo meneat he, hat ekhe nen wene heinok wo'niikhi logolik he, ”Afuni wa'lagaukwa mene andi Allah nen ninggi'nogo inelugerinabigin? Inelugerinabimbik he, inebe ningginik mene inelugerinabigin,” iluk egen andi re,

³⁶ hendawinggen legen egen o. Yi mene ti mene awi feik kweangma lakfegendek mene andi re, afuni wa'lagaikharek hak, awi andi agap fili agi'lek halok he, ebe fuleligin elo'lego.

³⁷ Awi feik kweangma lakfegendek andi re, ebe hobuk fulelimbik hilinglasigin mene lakfegendek fuk. We, gandum enggen he a? Athe, yi mene ti mene enggen he a, enggen enek feik lakfegendek.

³⁸ Feik lakfugunem he, at Allah endawimo anggalugenat ebe fanorogo hilingiterek. Yi mene ti mene awi ebe lombok hunogo tomok fanorogo hilingiteregat.

³⁹ Yi mene ti mene eluk mene mondogat he, ebe misigat mene fuk. We, afuni ninebe hunogoat, wam ebe hunogoat, sue ebe hunogoat, ikan ebe hunogoat.

⁴⁰ Nen, yi mene ti mene pogoroba mene weregat, kweangma mene weregat. Mene re, pogoroba mene andi elokhonggen lombok fano iluk agarek andi hunogoat. Nen, kweangma mene elokhonggen lombok fano iluk agarek andi hunogo aro.

⁴¹ Mo fano yaterek andi hunogoat, tugwi fano yaterek andi hunogoat, hesagal fano tilelherek andi hunogoat. A'nogo meneat he, hesagal andi ebe lombok hunogo tomogat tilelherego.

⁴² Andi hak, Allah nen afuni warek mene a'nogoat inelugerinabigin o. Ninebe warek fili agarek mene andi, awi kweangma feik lakfagarek hak, kweangma salninabumo re, hobuk ninebe fili asigin lek mene nineluget ninabigin o.

⁴³ Ninebe warek ninomame lek inabit agarek mene andi, kweangma salninabumo re, hobuk ninebe ninomame werek fogetninabugun mene nineluget ninabigin o.

⁴⁴ Ninebe wa'lagunem ninagap kweang meneat kweangma salninafarek. Mene re, hobuk Allah Areagun en ninebe nineluk mondok logogun mene nineluget ninabigin o. Ninagap mene welago yi re, Allah Areagun en nineluget ninafunem ninebe mene logogun o.

⁴⁵ Wene a'nogo iluk, Allah ane lisu palhi logolik he: ”Ap Adam attak mene andi, ebe eluk mene elalhikhe,” iluk lisu palogo fesukwa. Meneat he, ap Adam hobuk mene andi, Areagun nen inelugerinaferek mene wagaikhe.

⁴⁶ Allah nen, ap attak elalhikhe andi re, at hobuk ekhe mene andi Areagun en nineluget ninabigin andi mene elalhikhe fuk. Ninagap kweang mene tak elalhikhesi'mo nen, Areagun en ninelugetninabigin mene andi hobuk wagaikhe.

⁴⁷ Allah nen attak ap Adam andi ebe kweang abu'ne mene elalhikhesi'mo re, obabut kweang mene aro. Meneat he, ap Adam hobuk mene andi pogoroba nenat wagaikhe.

⁴⁸ It afuni ekhe inebe kweangma mene agaikha mene halok inebe re, at Allah nen attak Adam ebe kweang abu'nengge mene elalhikhe mene andi hanggeat werego. Meneat he, it ekhe inebe pogoroba mene agaikha mene halok inebe re, at hobuk pogoroba nen wagaikhe mene andi hanggeat werego.

⁴⁹ Nit yogondak, at Allah nen Adam ebe kweang abu'ne mene elalhikhe mene andi ninom higit welago hak, hobuk at pogoroba mene andi ninom higirat logogun o.

⁵⁰ Nerugwi nagaila'lak. Wene yi yagahisak. Ninebe ninagap wa'lagorek mene yi inom he, Allah awe a'ma ninobagagin oba andoma eisewerek asugun mondok lego. Nen, ninebe fili agarek mene yi inom hobuk ninebe ninetok mondok logogun mene eisewerek asugun mondok legaro.

⁵¹ Meneat he, wene Allah endawimo mene yi yagahisak. Nit ninebe mondogat wa'lasugun lek meneat he, ninebe lombok hunogoat hilingninabigin o, iluk eberogoat yagahisigi.

⁵² Misigam faget, ineilenggen humun la'luk fenggen lagaikharek hak, pinggong ane elugun kobokhogo pak igin o. A'nogo pak ugunem he, afuni wa'lagaukwa mene inebe fili agi'lek etok mondok logogin mene fanorogo hilingisogo inelugerinabimbik he, nit mondogat ninebe hunogoat hilingninabigin o.

⁵³ Ninebe fili agorek mene yi, fili asugun lek mene su labetarek hak labetik, ninebe wa'lagorek mene yi, wa'lasugun lek mene labetik, ugun o.

⁵⁴ Ninebe fili agorek mene yi, fili asigin lek mene labetik, nen, wa'lagorek mene yi, wa'lasugun lek mene labetik, ugun. A'nogo labesugun andiba, wene mel iluk lisu palogo fesukwa mene andi ebe asigin: ”Yi mene ti mene haumhogo nenggarek hak, At Allah omame asimbik he, wa'lagaikharek ero andi, legetfisagain o.”

⁵⁵ ”Wa'lagaikharek ero yi, homame ki. Haigen libilinafi lagen a'nogo, haik anini ki,” iluk isikhemo wene lisu palogo fesukwa mene andi ebe asigin o.

⁵⁶ Wa'lagaikharek mene ero aigen libilninaferek andi ebe re, nit weak hilingitorek andiba aigen libilninafunem wa'lagorek andi aro. Nen, weak hilingitorek mene omame agaikhe andi ebe re, wene Allah nen komotninafikhe wene andiba omame agaikhe o.

⁵⁷ Mene re, ninoe Enupogot Yesus Kristus hilingitikhe andiba, Allah nen ninomamet ninafunem ninomame agorek iluk, nineisena Allah hai wati logouwogo.

⁵⁸ Andi nenat, nerugwi nagaila'lak. Hinebe nendawi e. Hinendawinggen en wurikhogo, hambukhogo logoino. Ninoe Enupogot ninom hundik logolik he, at faget yi mene ti mene hilingitunem alomat lasigin lego, iluk, hundik-handik ninghogo hilingitu mondok logoino o.