1 KORINTUS 14 - Allah Wene Fano Wene Hupla Inane

Allah Areagun nen wogisugunem inane inonggot mene elalinat igik, wene fakhogo yagaisigik, agarek wene

¹ Hinobabut he, afuni inebe inendawirogo welagaikharek andi mene hinomamerogo yanggulhi logoino. Yanggulhi logolik he, Allah Areagun en inobabut lombok wogisikherek wene andi eise asubagaigen, hinendawimo aganhanhogo hilingiti logoino. Hilingiti logolik, Allah ane fakhogo yagaisagarek andi mene wokhisoageluk, esinet feino o.

² Sa nen inane inonggot mene elalinat ikherek andi, Allah Areagun endawimo logolik wene hinagoma mene ikherek andi nen he, afuni yagaisili'logo lek meneat he, at Allah yagatunem, afuni ekhe nen futfagarek lego.

³ A'nogo meneat he, at sa nen Allah ane afuniat fakhogo yagaisugunem he, inendawinggen ago watik, komorinafik, inendawinggen sebelhik, ikherek andi.

⁴ Mene re, at inane inonggot mene elalinat ikherek mene andi, at onggwarek endawinggen ago warikherego. Meneat he, at ekhe Allah ane afuni fakhogo yagaisikherek mene andi nek he, Allah againafuri andogotarek mene mondogat inendawinggen ago watfisikherego.

⁵ Afuni inane inonggot mene elalinat agarek andi endep elo'lek hak meneat he, Allah ane afuni fakhogo yagaisagarek andi nek he, esin mondok. Andi nen he, hit hinebe mondogat afuni inane hinonggot mene elalinat umo re, an namolo meneat he, ebe fano mondok he, hiren Allah ane fakhogo yagaisikhi logogun andiat namolo o. Mene re, inane hinonggot mene elalinat ugun halok he, hobuk Allah againafuri ekhe inendawinggen ago watfisouwogeluk he, hit hinaneba higithogo yagaisamo nek he, fano.

⁶ Nerugwi nagaila'lak. An hobuk he, inane ninonggot mene elalinat yagahisa wagi halok he, andiba fanothinabigin nogo? Wene Allah endawimo hinago mene fakhogo igi'legat, wene nelu mene yagahisigi'legat, Allah ane yagahisigi'legat, wene senggerogo yagahisigi'legat halok he, fanothinabigin nogo?

⁷ Yi pinggong ti pinggong endawinggen lek mene anet hugunem, ane ikherek meneat he, ane hunogo tomok lagagik pigik igi'lek halok he, afuni nen he, ”I, ane andi mene ikhe,” iluk ninggi'nogo futfogoin nogo? Elo'lego.

⁸ Afuni weim kuogeluk a'mit sup agarek hak, pinggong ekhe ane hokho ikherek mene andi, ane unggut nonghonghogo ikhe halok, ”Yogo, yogondak weim yabuogeluk higi,” iluk senggerogo futfigi'lek sa nen hibil hebelhogo hilingisigin nogo. Elo'lego.

⁹ Andi hagat he, hiren inane hinonggot mene elalinat ikhi logolik, hinambeba nen wene furogo igi'le'ma re, wene andi ninggi'nogo inelu asugun nogo? Elo'lego. We, engga helengga yagati logogun o.

¹⁰ Kweangma yi afuni ti afuni inane lombok hokhorogat werek anggigi. Mene re, inane andi tulemat agarek fuk. Senggerogo ugunem futfogoin enego.

¹¹ A'nogo meneat he, it inane unggut pale'ma an nonggot halok he, at ekhe nen ugunem, an nen nesanggo ninggi'nogo holigin? Nen, an nane ugunem, nane unggut pale'ma re, aren nane ninggi'nogo esanggo holigin? Elo'lego.

¹² Halok he, Allah Areagun nen inobabut lombok wogisikherek mene andi wokhisoageluk hinendawimo aganhanhogo hilingiti lagep meneat he, Allah againafuri inendawinggen ago watfisagain mene halok hokhorogo wokhisoagen, andiat esinet feino.

^13-14 It ekhe inane an nonggot meneba elalinat samban ikhi logolik he, nendawinggen oba nen ikhi lagi meneat he, ebe futfikhi lagi mondok lek andi nen he, at ekhe nen it ekhe inane onggot meneba elalinat ikherek mene andi nen ikhi logolik he, ”Allah Neisena. Inane inonggot mene andi an nonggwarek naneba higithogo yagaisikhi logoigen he, hat Hareagun en inobabut wogisikherek a'nogo mene ekhe wo'nesuago,” iluk samban ikhi logouwago.

¹⁵ Halok he, an ninggi'nogo hilingisik. Yi'nogo hilingisigin. Samban andi re, Allah Areagun en yaganetu kwelek inane nonggot meneba elalinat igik, ninonggwarek ninaneba nendawinggen fut fulugen igik, igin o. Nen, wuni andi re, Allah Areagun en yaganetu kwelek inane nonggot meneba elalinat watik, ninonggwarek ninaneba nendawinggen fut fulugen watik, igin aro.

¹⁶ Andi hagat he, hat ekhe nen Allah Areagun nen yagahetu kwelek inane honggot mene elalinat ikhi logolik, ”Allah neisena,” iluk hai wasigin halok he, at ekhe onggot mene nen futfigi'lek logolik, ”Wene ikhe andi ebe asuak,” iluk u hak, ”Amin,” iluk ugun nogo? Wene hat igin andi re, at onggoren, a'nogo ugun elo'lek andi o.

¹⁷ Halok he, haren a'nogo Allah hai fanorogo wasigin meneat he, at andi endawinggen ago watfagain nogo? Lego.

¹⁸ Inane inonggot mene elalinat agarek andi re, hiren he, endebat ikhi lagep. An enek he, hokhorogoat igirek iluk, ”Allah neisena,” iluk hai watirego.

¹⁹ Mene re, an Allah againafuri ninom andogorek logolik wene yagaisageluk he, inane nonggot mene elalinat hokhorogo igi'lek, we, futfogoin mene nane endebat 5 ba nek umo fano iluk yagaisigirek.

²⁰ Nerugwi nagaila'lak. Wene hinendawimo ebeti lagep andi re, yenggerugwi inendawimo ebetarek hak ebeti logogup. We, omalik ket tago mene nen weak hilingitu inonggot welagaikharek hak logolik, hinendawinggen inalue inendawinggen hangge wurikhogo logoino.

²¹ At nineisena Allah Enupogoren komotninafikhe weneba wene ekhe mel isikhemo lisu palek werek: ”An nen afuni yoma, wene it ekhe inane onggut palek mene inaneba elalinat yagaisigik, it ekhe ap pok mene inambeba yagaisigik, igin o. A'nogo yagaisagain meneat he, inesanggo holugun lego,” iluk isikhemo lisu palogo fesukwa.

²² Wene Allah Areagun en yagaisugunem inane inonggot meneba elalinat agarek andi re, afuni inendawinggen Allah oba himbiret fili'lagwi mene andi futfouwageluk agarek fuk. We, it ekhe inendawinggen Allah oba himbiret figi'lek mene andi nen futfouwageluk a'nogo agarego. Meneat he, Allah Areagun en wogisugunem, Allah ane fakhogo yagaisagarek andi re, inendawinggen Allah oba himbiret figi'lek mene faget fuk. We, it inendawinggen Allah oba himbiret fili'lagwi mene nen futfouwageluk yagaisagarego.

²³ Hit Allah againafuri misi'mo andogorek logolik, hinebe mondogaren inane hinonggot mene inoba elalinat ugunem, it wene inonggot mene inom, inendawinggen Allah oba himbiret figi'lek mene inom, hinoba kwi we'luk, iren he: ”Yoma re, lugulugwi palhasik ili'lagwi o,” iluk yagahisogoin lek nogo? Yagahisogoin aro.

²⁴ A'nogo meneat he, hit hinebe mondogaren, Allah ane fakhogo ugunem, at ekhe endawinggen Allah oba himbiret figi'lek mene inom, wene onggot mene inom, hinoba kwi wesimbik, aren he, mel igin: ”Eigo. An weak hilingitimo wene noba werek higi o,” iluk endawimo anggugunem he,

²⁵ at endawimo hinago mene weinam asigin. Weinam agunem he, obabut liokhogo at ebe sebe iluk Allah fogerati logolik he, mel igin: ”Eberogoat Allah hinom welagebo,” iluk yagahisagain o.

Allah againafuri andogorek logolik hilingiti logogun wene

²⁶ Halok he, nerugwi nagaila'lak. Ninggi'nogo hilingiti logogun? Yi'nogo hilingiti logogun o. Hit hinebe andoget fuluk he, at ekhe nen Allah awuni isa igik, at ekhe nen wene senggerogo yagahisigik, at ekhe nen Allah endawimo wene yagahisigik, at ekhe nen wene inane hinonggot meneba elalinat ugunem, at ekhe nen hit hinaneba higithogo yagahisigik, ikhi logolik he, Allah againafuri inendawinggen ago warogo yi wene ti wene andi mondogat higit a'nogo ikhi logogun o.

²⁷ It ekhe nen, inane inonggot meneba elalinat uogeluk halok he, inebe pire he a? Henagan he a, umo re, fano. Enggaminogo lek. Mene re, hobuk attak ugunem he, at ekhe nen hit hinaneba higithogo yagahisikhi logogun fano.

²⁸ Meneat he, at ekhe hit hinaneba higithogo yagahisagain mene ebe lek halok he, it inane inonggot mene elalinat agarek mene andi, Allah againafuri andogorek were'ma andoma inane legat logogun. Inane legat logolik he, Allah at yagati logouwago.

²⁹ Nen, Allah ane yagaisagarek mene andi inebe pire nen a? Henagan nen a, yagahisogoin. A'nogo yagahisugu kwelek he, hit ekhe nen, wene higit ili'logo igik, kwanirogo ili'logo igik, obabut palhi logogun o.

³⁰ A'nogo meneat he, Allah nen at ekhe hurek welaga mene wene endawimo kagalhe halok he, yagahisoagen he, at attak yagahisikhi laga mene andi re, ane lek kamo igin o.

³¹ Andi hagat he, hinebe mondogaren wene yanggulogo hinelu agik, hinendawinggen kagalagik, uogeluk he, hinebe mondogat misiktek-misiktek hobuk alep Allah ane fakhogo yagaisikhi logogun o.

^32-34 At Allah re, hesangge-pesangge hilingiterek mene fuk. Athe, we, higithogo nek hilingiterek andi nen he, it ap Allah ane yagaisagarek mene andi, wene yagaisikhi logouwageluk at Areagun en inobabut wogisikherek mene andi eise asimbik logolik, inonggwaregenat, ”An yi'nogo yagaisak, ti'nogo yagaisak,” iluk ikhi logogun o. Wene Allah nen komotninafikhe wene a'nogoba lisu palogo fikhi logolik he: ”Hemi re, inane legat inawe a'ma logogun,” iluk isikhe andi nen he, Allah againafuri o yi awi ti awi andoget fuluk welagaikharek hak, hit hinebe andogorek logolik he, hemi inane legat logogun o. Inane sagalhi logogun lek.

³⁵ Mene re, hemi nen Allah againafuri andogorek were'ma inane ugun elo'lek andi nen heinok werek halok he inaiba lambik inonggwarek inaguni inoba heinok wanugun fano.

³⁶ Allah ane o yi awi ti awi lili'logo andi re, ero hit nogo? I a, athe, hit faget enek hinoba yagahisa wagaukwa nogo a.

³⁷ At ekhe nen he: ”An nen Allah ane yagahisoageluk, Allah Areagun en nobabut andi wo'netemo,” igik, i a, athe, ”Hunogo mene hilingisuageluk wo'netemo,” igik, ikhe halok aren he, ”Wene Paulus nen ikhe andi re, ninoe Enupogoren komotninafikhe mene, lisu palogo ninoba lakfei waga andi,” iluk at futfuluk wanuago.

³⁸ Meneat he, wene andi wanhi'lek herakfisikhe halok he, hiren ap andi ebe wanhi'lek herakfisikhi logoino.

³⁹ Yogo. Nerugwi nagaila'lak. Allah ane fakhogo yagaisikhi logouwogeluk esinet fuluk hinomamerogo hilingiti logoino. Mene re, it ekhe nen inane inonggot mene elalinat uogeluk aga halok he, wene palu fugo.

⁴⁰ Mene re, yi wene ti wene higithogo igik, furogo igik, ikhi logoino.