1 KORINTUS 13 - Allah Wene Fano Wene Hupla Inane

”Afuni inebe hinendawirogo logogun,” iluk yagaisasikhe wene

¹ An nen afuni inunggulenu lombok ekhe inaneba igik, malaikat Allah nen yonggo pelakfisa wagarek mene omanogo inaneba igik, ikhi logolik meneat he, afuni inebe nendawirogo logogin lek halok he, an we, iwak hokho mene endep mene i elonggoma hinago le'ma ane pak igik, tololang igik, ikherek hak ikhi logogun o.

² Nen, Allah ane fano mondok yagaisigik, wene afuni inendawimo hinago welagarek mene andi mondogat nelu agik, yi wene ti wene ekhe mondogat neluat welagik, nendawinggen Allahba mondok himbiret fuluk he, tom ekhe obali'mo nen sanokhogo ekhema loageluk yagasigin elok welagik, ikhi logolik meneat he, afuni ekhe inebe nendawirogo logogin lek halok he, we tulemat ikhi logogin o.

³ Yi mene ti mene an nenggim mene mondogat afuni inagarek lek mene sumburisigik, nebe mondok warogo endu noageluk neranenat igik, ikhi logolik meneat he, afuni ekhe inebe nendawirogo logogin lek halok he, we, tulemat alemarogo ikhi logogin o.

⁴ Afuni ekhe inebe inendawirogo logolik he, inafe morogo welagaikharek andi. A'nogo inendawirogo logolik he, inobabut fano, pou igi'lek logolik, inonggwaregen sewirakhigik, fogerakhigik, agarek lek andi.

⁵ A'nogo logolik he, inenggali lek hilingitik, yi mene ti mene inonggwarek faget esinet figik, ina'mage horoksek welagik, it ekhe nen weak hilinginafunem he, wene ambumet fuluk welagik, agarek lek.

⁶ A'nogo inendawirogo logolik he, it ekhe nen higithogo hilingiti'lek kwanirogo hilingitunem inendawimo inagaiyek agi'lek logolik, higit hilingitunem enek inendawimo inagaiyek agarek.

⁷ Inendawirogo logolik, yi wene ti wene inoba agunem he, inafe morogo welagik, inendawinggen Allah oba himbirik welagik, fano asigin iluk inendawimo agaiyek agik, inendawinggen hambukhogo welagik, agarek andi.

⁸ A'nogo ikhi logombik he, inenggi ekhe sambul Allah ane yagaisagarek andi mene hobuk yagaisagain lek agik, afuni inane inonggot mene elalinat agarek andi mene hobuk ugun lek agik, yi wene ti wene inelu welagaikharek mene andi hobuk inelu asugun lek agik, ugun meneat he, afuni inebe inendawirogo welagaikharek andi mene nek, lek agi'lek mondok logogin o.

⁹ Andi re, o yogondak he, wene ando fena nek ninelu welagik, Allah ane ando fena nek yagaisigik, ikhi lago andi.

¹⁰ Mene re, hobuk fano mondok mene hilinglagunemen, yogondak fenakwe nek werek mene andi lek asigin o.

¹¹ An nebe yenggerek oba re, nane yenggerugwi inane mene igik, nendawinggen yenggerugwi inendawinggen mene welagik, nendawinggen yenggerugwi inendawimo ebetarek mene ebetik, ikhi lagagi meneat he, yogondak nebe nalue agagisik he, nobabut yenggerugwi inobabut mene andi arat herakfisasigi o.

¹² Yogondak ya re, inafumak mum werek kwelek ineilenggen yethagarek hak, afumak enek mene yethikhi lago. Meneat he, hobuk ebe mene furogo yethogoin o. Yogondak he, wene ando fena nek ninelu welago. Meneat he, hobuk at Allah nen an nebe furogo elu andi hak, an nen at Ebe furogo nelu asigin o.

¹³ Mondok logogin he, ninendawinggen Allahba eberogoat himbirik welagorek andi inom, fano asigin iluk ninendawimo agaiyek agarek andi inom, afuni inebe ninendawirogo welagorek andi inom, wene ebe henagan andemat logogin. Meneat he, ebe esin hangge re, afuni inebe ninendawirogo logogun andi aro.