Ruti 3 - Mazu Otchena a Mulungu

Ruti ovenda teliwa na Bowazi

¹ Noira eno, Nowemi ohomuwandelaga nijaliye ule eraga: <<Mwanaga, miyo nnafuna duvendele mulombwana autele ira weyo uwande vuma, ukayena vande vawo.

² Mulombwana Bowazi, wenno uwandile uhiya weyo ulabaga vamohi na anamalabaye a ahiyana, gu mbalihu. Eni liye mahiyu anna unadowa nimburo nobubudavo jalo ira abubude sevada.

³ Mwa eno, inafwanela uvenye, umale hamba pama, uvizolihe makura, uware jowara jawo japama, na wenne udowe nimburo nobubudavo jalo, wewo unafwanyeya liye. Mbwenye wafiya wewule, kuvioneyihe vamentoni vaye. So weyo udowe wavitale ante liye amale dja eto amale ng'wa.

⁴ Evale liye agadowile gonanti, weyo udowe waone nimburo neno nnagona liye. Wagaonne nimburo nnagona liye nne, liye agagonenlevo, weyo udowe wagonanti mendoni waye. Era eno liye unouwandela yenno inafuna we ira.>>

⁵ Mwa enne Ruti ohowakulaga eraga: <<Tabo, jatene jinawonga nyo miyo nnoirana!>>

⁶ Evale ohovenyaga, liye dowa nimburo nobubudavo jalo nne eto ohoirana nnga mwemo mwamuwandenle nijaliye ule.

⁷ Evale mulombwana Bowazi agamanle dja no ng'wa, murimaye agali ohagalalene, ohodowaga gonanti wandamelana vevo vafwanyeya kamba ya johanda. Evale Ruti ohovenyaga, liye dowa mozemba, gudubulra manta mendoni waye ule, liye gonanti, vikunela.

⁸ Vari va mahiyu, mulombwana Bowazi agarurumuwile, funa ira arungunuwe, liye ohotutuwa mwasiwa anfwannye muhiyana agagonantile mendoni waye ule.

⁹ Evale ohonfukaga eraga: <<Weyo uli ani?>> Ruti ohowakulaga eraga: <<Gu miyo namalaba wenyu Ruti! Nnafuna mukale mamunaga mwasiwa nyo muli maliba hamba nyumba waga!>>

¹⁰ Evale mulombwana Bowazi ohowongaga eraga: <<Mwanaga Yehova aurelihe. Mwasiwa weyo uhuoniha upama ulukulu kwaranya upama wasakanyile we voroma. Mwasiwa weyo mamunawo agakwile, kurumenle teliwa na muzombwe uli watene, nne orayela nne osimela.

¹¹ Mwa eno, mwanaga kuove. Jatene jinawonga we, miyo nnoirana. Mwasiwa atu atene a uno kohomala iziwa ira weyo uli muhiyana wa makalelo apama!

¹² Na ibaribari miyo nnowanda uhamba nyumba. Mbwenye eto uhukalawo mulombwana mmohiwa unawanda uhamba nyumba odikwaranya miyo.

¹³ Mahiyu anna ugone wewuno, unde wagatchile liye arumela yovepa yawo, auhamba nyumba, ihikala pama, airena mofuna mwaye. Eto masiki liye ahafune uhamba nyumba, nnawonga vamentoni va Yehova okalawo ira miyo nnouhamba nyumba! So urome gonanti eva fiyeda unde utche.>>

¹⁴ Evale Ruti ohogonantigive mendoni waye wewule fiyeda unde tcha. Mwa enne unde utchaga, na mabebehene wagalive isi, yahanafiye tempu yoonana mutu mmohi na nfwaye, Ruti ohovenyaga ira adowege, tawiha ira unaoniwe na atu. Mwasiwa mulombwana Bowazi kafunne ira atu kaiziwe ira ukala muhiyana agonne nimburo nobubudavo jalo nne.

¹⁵ Mwa enne mulombwana Bowazi ohowonga, liye ira: <<Kazana uno nguwo yenno inawara we, utapule. Evale Ruti agatapunle nguwo yayele, mulombwana Bowazi ohopimaga sevada fendo tanu na imohi na mpimo wenno apimagana liye, liye kutulelaga vanguwoni vale. Noira enne, ohompwatelihaga, Ruti liye maruwa dowaga musidadi.>>

¹⁶ Evale Ruti agafiyile vande, nijaliye ohonfukaga, liye ira: <<Jengo juwendenle avi mwanaga?>> Evale Ruti ohomuwandelagamo jatene jamuirele mulombwana Bowazi.

¹⁷ Eto ohowongagave eraga: <<Mipimo mitanu na mmohi da sevada di udivahile gu liyene, liye diwandela ira: <Wadowaga wa nijaliyo, kudowege eno wahadowilena yengo!> >>

¹⁸ Mwa enne Nowemi ohowongaga, liye kwi: <<Mwanaga, uing'anelegeve eno ante ufiyede iziwa jinafuna gomela jejo. Mwasiwa mulombwana wenne kanavuma ahakwakwanelihedile jejo siku na peno.>>