Matewuji 1 - Mazu Otchena a Mulungu

Makolo a Yesu Kiristu

¹ Ula gu muselu wa makolo a Yesu Kiristu. Yesu Kiristu akumile muzizani mwa Davi. Davi akumile muzizani mwa Abarahamu.

² Abarahamu ohombala Izaki; Izaki ohombala Jako; Jako ohombala Juda vamohi na abalaye;

³ Juda ohombala Pereji na Zera, anno mmiwa ali Tamari; Pereji ohombala Ejiromi; Ejiromi ohombala Aramu;

⁴ Aramu ohombala Aminadabe; Aminadabe ohombala Nasoni; Nasoni ohombala Salimomi;

⁵ Salimomi ohombala Bowazi, wenno mmaye ali Rahabi; Bowazi ohombala Obedi, wenno mmaye ali Ruti; Obedi ohombala Jese;

⁶ Jese ohombala mwene Davi. Mwene Davi muwari mwa muhiyana wenno ali mwadi Uriya ohombala Salomawu;

⁷ Salomawu ohombala Robowawu; Robowawu ohombala Abiya; Abiya ohombala Asa;

⁸ Asa ohombala Jozafa; Jozafa ohombala Jorawu; Jorawu ohombala Oziya;

⁹ Oziya ohombala Jowatawu; Jowatawu ohombala Akaji; Akaji ohombala Ezekiya;

¹⁰ Ezekiya ohombala Manasesi; Manasesi ohombala Amoni; Amoni ohombala Joziya.

¹¹ Tempu yatukuliwa aIzarayeli kadowiwagana Babiloniya, mulombwana Joziya ohombala Jekoniya vamohi na abalaye amohiwa.

¹² Evale aIzarayeli kagadowiwena Babiloniya, mulombwana Jekoniya ohombala Selatiyeli. Selatiyeli ohombala Zorobabeli;

¹³ Zorobabeli ohombala Abiyude; Abiyude ohombala Eliyakimu; Eliyakimu ohombala Azori;

¹⁴ Azori ohombala Sadoki; Sadoki ohombala Aki; Aki ohombala Eliyude;

¹⁵ Eliyude ohombala Eliyazari; Eliyazari ohombala Mata; Mata ohombala Jako;

¹⁶ Jako ohombala Joze, Mariya mamunaye, Mariya wenno ambanle Yesu unaitaniwa Kiristu.

¹⁷ Fwanyeya ira makolo matene roma Abarahamu ante Davi, vavirile makolo kumi na mannayi. Eto roma Davi ante tempu yadowiwana aIzarayeli Babiloniya, vavirile makolo kumi na mannayi. Eto romela tempu yadowiwena aIzarayeli Babiloniya fiyeda baliwa wa Kiristu, vavirile makolo kumi na mannayi.

Baliwa wa Yesu Kiristu

¹⁸ Baliwa wa Yesu Kiristu yaireyile eni: Mariya mmaye Yesu ohobanyelriwa na mulombwana mmohi eriwa Joze. Mwa enne kagabanyelranne, kahanarome gona vamohi, mwa tempu yenne Mariya ohofwanyeyana vambani mwa kopolo da Munemba Otchena.

¹⁹ Joze agamuonnena vambani, na mwasa oira liye ali mulombwana wapama, ohoumbuwela ekave eraga: <<Ira damunyaswihe vari va anamwindji, kinakala. Ili pama damulanye mozembiheya bahi.>>

²⁰ Joze mwa ora yenno yaumbuwela liye zelru dedile, ohokalawo mungelro mmohi eni wa Nabwiya amutwanyuwenlege morohani, liye muwandela eraga: <<We Joze, nkuda Davi, kukukumuwe. Mariya vambani vinna liye jiireyile mwa kopolo da Munemba Otchena. Udowe wamutele, akale muhiyanawo.

²¹ Liye unombala mwanapongwe. Abaliwa, unvahe nzina na Yesu mwasiwa liye gunafuna za avulusa atwaye zela mwa jotega jiwa.>>

²² Jatene jeji jaireyile ira jikwakwanelihede jawongile Nabwiya muwari mwa namafiyiheda mmohi wa wanle ira:

²³ <<Kaing'anani. Namwali ahagumanile na mulombwana unoza akayena vambani, ambale mwana wa mwanapongwe, kanvahe nzina na Emanuwele.>> (Ku wonga ira Mulugu uli na hiyo.)

²⁴ Evale Joze agarurumuwile morohani, ohoirana nnga mwemo mwamuwandenle mungelro wa Nabwiya, liye dowa mutela Mariya, kala muhiyanaye.

²⁵ Mbwenye agamutenle, kamugonnena, fiyeda Mariya liye mbala mwanole. Mwanole agabaliwe, ohonvaha nzina na Yesu.