Markuji 2 - Mazu Otchena a Mulungu

Yesu ohooniheda utongi wanna liye okurumuwela jotega muwari monvulumutcha maliba hawenda

¹ Vagamanle malambo mangasi mangasi, Yesu ohowelela sidadi ya Kafaranamu. Evale atu a wewule kohoroma vwa ira Yesu uhuza, uli vande vale.

² Mwa enne vande vale vohozalaga atu, fiyeda va mulango kavahanle nimburo. Yesu afwanyeyaga mmba aalaleyaga atwale mazu.

³ Vohokala alombwana annayi kamuzilegena murendiwa, maliba hawenda ira murendole adowe agumane na Yesu.

⁴ Kagafiyile vande vali Yesu vale ira kadowe kangumanena Yesu, tchawandile na mwasa wa anamwindji. Evale aliwa kohofuza vazulu va nyumba, aliwa mutitihedavo murendole na makayene, dowa fiya vali Yesu.

⁵ Yesu agamuing'anne murendole na atu kamuzilegena ale, ohoona ira aliwa kohokana nroromelo. Evale ohowongaga na maliba hawendole ira: <<Mwanaga, jotega jawo jihimala kurumuweliwa.>>

⁶ Wohokalaga anamafundjiha malamulo kafwanyeyaga ogaratene evale. Aliwa kagavwile mazwale, kohoroma umbuwela mmirimani mwiwa ira:

⁷ <<Jinawandeya avi mutula wongaga na makalelo anna? Wenna unamululuviha Mulugu. Tchoira kalivo unawanda kurumuwela jotega ahali Mulugu ekave.>>

⁸ Yesu mbwenye ohovayela iziwa jaumbuwela atu mmirimani mwiwa. Mwa enne ohowonga, liye ira: <<Mwasiwa gwa nni nyo umbuwelaga eji mmirimani mwenyu?

⁹ Kodi yorutcha wonga na maliba hawenda ula tchivi? Irutchile ku wonga na liye ira: <Eni jotega jawo jihimala kurumuweliwa>, owu irutchile ku wonga ira: <Kavenya, utukule makawo, uwende.>?

¹⁰ Mbwenye miyo nnafuna dinvulumutche murendola ira nyo muiziwe ira Mwana wa Mutu uhuvahiwa utongi mwilamboni ya vati ira akurumuwele jotega.>> Evale ohomuwongagana maliba hawenda ule eraga:

¹¹ <<Venya, utukule makawo, udowege vande.>>

¹² Yesu nowonga eno, mobaranya murendole ohovenyaga, liye landa makaye, dowaga, atu atene kamuing'anaga. Atu atene kaligi evale, kohoroma tikiniheya kamutamalelaga Mulugu keraga: <<Hiyo kannaone jengo jokala ha jeji. Mulugu atamaleliwe.>>

Yesu ohomuitana mulombwana Levi

¹³ Yesu ohowelela ntiya na Galileya. Agadowile wewule, atu adjindji kohodowa nfwanya, liye roma afundjiha.

¹⁴ Evale awendaga ohonfwanyaga namasokiha misoko mmohi agaratilege munyumbani mwaye mosokiha misoko, eriwa Levi mwana Alifewu. Yesu ohomuwandelaga eraga: <<Kadiharege!>> Evale liye ohovenyaga, liye roma muhara.

¹⁵ Kagafiyile vande va Levi ule, kohogaratigi vameza. Vevale vohokalaga anamasokiha misoko na anamatega oindjivene kazilege garati vamohi na Yesu na anamamuharaye mwasiwa ora yenno atu kamuharile tchali ang'ono.

¹⁶ Evale anamafundjiha malamulo na aFarizewu kagamuonne Yesu adjaga na anamatega vamohi na anamasokiha misoko, kohoroma afuka anamamuharaye keraga: <<Mwasiwa gwa nni Yesu djaga na anamasokiha misoko na atu otegala?>>

¹⁷ Yesu agavwile mazwale, ohawakulaga ira: <<Ngumi kanadowa wa mediku. Mbwenye murenda gunadowa wa mediku. Miyo dizaga mwilamboni, kadizele aitana atu apama, mbwenye dazele aitana atu otega.>>

Atu kohonfuka Yesu zela jeju

¹⁸ Anamamuhara a Juwawu Mbatizi na aFarizewu kafwanyeya kajejuwarigi. Mwa enne kohokalawo kadowile nfuka Yesu ira: <<Anamamuhara a Juwawu vamohi na aFarizewu anajejuwari. Nnga mwasiwa gwa nni anamauharaninyu ala hajejuwarigi?>>

¹⁹ Yesu ohawakulaga eraga: <<Kodi aliba itaniwa vamateloni anojejuwari muteli agali evo? Nari. Muteli akala evo, aliwa kinajejuwari!

²⁰ So mbwenye anoza kafiye malambo anafuna kumihiwavo muteli ule. Agakumihiwevo, aliba itaniwa ale anerege jejuwari!>>

²¹ Evale Yesu ohowonga eraga: <<Kalivo mutu unatukula itchapa ixa, atchapelrana yowara yawale, mwasiwa airana eno itchapa ixele inokumavo eto kauwa uwa unerege simbwa.

²² Eto kalivo unatukula vinyu muxa ahela mutembeni mwawale. Mutu airana eno, vinyu atanuwa, tembe niwa nnomala tweya eto vinyu unotatiya. So mbwenye vinyu muxa unaheliwa mutembeni muxa.>>

Yesu gu mwinnya wa sabado

²³ Siku nimohi na sabado, Yesu ohoviraga na anamamuharaye nimburo eni wafwanyeya munda wa tirigu. Evale kawendaga, anamamuharaye ale kohoroma kotola vang'onove mangala a tirigu ira katakunege.

²⁴ Mbwenye aFarizewu amohi kagaaonne, kohonfuka Yesu keraga: <<Kaing'anani, anamauharaninyu ala anawanda avi irana yengo yenno inakamelihiwa irana siku na sabado?>>

²⁵ Evale Yesu ohawakula eraga: <<Kodi nyo kamunababihe ileri mMazuni jejo jairile mulombwana Davi, tempu yasegedeya liye, tempu yanna liye ndala agali vamohi na afwaye?

²⁶ Tempu yenno mulombwana Abiyatare agali mundimuwa wa anamakuta, mulombwana Davi na afwaye kaganna ndala, Davi ohovolowa Nyumba ya Mulugu, liye dja pawu dotchenihiwa, pawu dedo datapulela ira Mulugu uli vamohi na atwaye. Nomala eno, liye avaha eto afwaye kali vamohi na liye, aliwa dja, agali Davi eto kaali namakuta. Eto fwanyeya ira muwari mwa nlamulo kavili jowandeya ira mutu ahali namakuta adje pawu dedo. Mbwenye anadja ba anamakuta bahi.>>

²⁷ Evale Yesu ohomariha aawandelaga eraga: <<Tchoira sabado ukalelewo na mwasa wa atu. Hiya ira atu kapandutchiwele na mwasa wa sabado.

²⁸ Mwa eno, nnouwandelani ira Mwana wa Mutu unafwanyeya agali mwinnya wa sabado.>>