Lukaji 19 - Mazu Otchena a Mulungu

Zakeyo namasokiha misoko

¹ Yesu ohofiyaga Jeriko, liye roma vira musidadi mule.

² Musidadi mule mohokala mutu mmohi eriwa Zakeyo. Liye ali mundimuwa mmohi muwari mwa andimuwa a anamasokiha misoko eto ali mutu orayela.

³ Liye agavwile ira: <<Yesu unaavira>>, ohofuna nnga amuone. Mbwenye na mwasa oindjiva wa atu, kawanda muona, mwasiwa liye ali mutu okwiva.

⁴ Na mwasa oiziwa ira: <<Yesu unafuna avire rampa neni>>, ohotamangaga, liye dowa sogolro wa Yesu, liye gwela mmutengoni mwa Nantambu ira awande muona.

⁵ Mwa enne Yesu agafiyile vamutengoni vale, ohoing'anaga muzulu, liye muitana ira: <<Zakeyo, katita mobaranya. Tchoira peno nnafuna dakale mulendo vande vawo.>>

⁶ Evale Zakeyo agavwile jawongile Yesu, ohotitaga mobaranya, liye muwatchela Yesu mohagalala.

⁷ Atu atene kaonilege ejile, kohoromaga nong'ona keraga: <<Mulombwanola udowile fiyeda vande va mutu otega!>>

⁸ Eto Zakeyo ohovenyaga, liye wonga na Nabwiya eraga: <<Nabwiya, kavuruwanani. Miyo nnafuna digwade jorayela jaga vari, daavahe atu osimela pandi imohi. Teto akala dihimbela mutu, nnomuweliheda fendo nnayi kwaranya jejo dambenle miyo.>>

⁹ Yesu ohomuwandelaga eraga: <<Peno vulusa uhufiya vande vano.>> Noira enne ohowongaga na atene, liye ira: <<Tchoira na liyene gu mwana Abarahamu.

¹⁰ Mwasiwa Mwana wa Mutu uzele asaka no avulusa ale kadimenle.>>

Yofwalrafwaniha ya mulombwana mmohi aahiyedile anamalabaye kobiri

¹¹ Atwale kavuruwanagave jawongaga liye jile, Yesu ohowongaga yofwalrafwaniha imohi na mwasa oira liye ohowandamela Jeruzalemu eto atwale kaumbuwela ira: <<Umwene wa Mulugu unoroma tchineneva.>>

¹² Mwa enne ohowongaga eraga: <<Ohokalawo mulombwana mmohi abaliwe munlogoni mwa amwene. Evale liye ohoitaniwa ira adowe ilambo imohiwa olapela wene, avahiwe umwene, amala awelele waniwa akoka.

¹³ Mwa enne liye ahanavenyihane ulrendo waye, ohaitana anamalabaye kumi, liye roma avaha kada namalaba kobiri imohi yagali yapameneve, liye awandela eraga: <Kobirila muwendihegena malronda fiyeda za waga!>

¹⁴ <<Mbwenye agadowile, anamurala a umwene wafuna liye tonga kagahanle, kohomwida eto koharuma atu ira kadowe, kamuhare, kamuwandele ira: <Hiyo kannafuna ira weyo ukale mwene wehu.>

¹⁵ Mwa enne ndimuwole agavahiwe umwene waye, agafiyile vande vale, ohaitaniha anamalabaye anne aavahile liye kobiri ira aiziwe kobiri daganyalrile kada mutu muwari mwa malronda aye.

¹⁶ Evale mutu oroma ohozaga, liye ira: <Patarawu, miyo na kobiri imohi mwadivahile nyo ile, dihipatamo kobiri dimohi diwa kumi.>

¹⁷ Evale patarawu ule ohowongaga eraga: <Uhusakanya pama! Weyo uli namalaba wapama! Na mwasa okala ororomeleya mwa jengo jing'ining'ini, weyo unokana utongi wa sidadi kumi.>

¹⁸ Namalaba wanembinli ohozaga, liye wonga ira: <Patarawu, miyo na kobiri imohi mwadivahile nyo ile, dihipatamo kobiri dimohi diwa tanu.>

¹⁹ Evale patarawu ule ohowongaga eraga: <Weyo unokana utongi wa sidadi tanu.>

²⁰ <<Mbwenye namalaba mmohi ohozaga, liye ira: <Patarawu, kobirinyu ila. Miyo dere ibulruwalri valensoni, miyo dowa ikoya.

²¹ Miyo dera uovani, tchoira nyo muli mutu orutcha. Nyo munovenyihavo yenno mwahahenlevo nyo eto munohanda yenno mwahazanle nyo.>

²² Evale patarawu ule ohorumelaga eraga: <Weyo uli namalaba wabure! Na mwasa wa vamulomoni vawo, miyo nnougwihana mulandu. Weyo wohoiziwa ira miyo dili mutu orutcha ira miyo nnovenyihavo yenno yahahenlevo miyo eto nnohanda yenno yahazanle miyo.

²³ Nnga mwasiwa gwa nni weyo uza wahahelaga banko kobiraga ira miyo dawelagawo, diwatchele mowendjededeya na juru?>

²⁴ <<Evale ohawongagana atu kaligi evale eraga: <Kamuwakeni kobiri inna liye, munvahe wenno unna kumi.>

²⁵ Aliwa kohomuwakulaga keraga: <Mbwiyeni, liye uhumala kana kobiri daye kumi!>

²⁶ Mbwenye patarawu ule ohowonga eraga: <Miyo nnouwandelani ira mutu wenne unna, gunafuna vahiwave. Mbwenye ule ahanna, eto mwa yengo ya vang'ono yenno inna liye unoza awakiwe.>

²⁷ Evale ohowongaga eraga: <Mwaazena amwidani atene, anno kahafunile ira miyo dikale mwene wewa, mwaape tchineneva vamentoni vaga daaing'anaga!> >>

Yesu ohofiya Jeruzalemu

²⁸ Yesu agamanle wonga ejile, ohovenyihanaga adowaga sidadi ya Jeruzalemu.

²⁹ Awandamelaga tatamo da Betifaji na Betaniya, agali mwango unaitaniwa Mitengo da Azeti, oharumaga anamamuharaye ambinli sogolro waye,

³⁰ liye awandela eraga: <<Mudowe tatamo nnafwanyeya sogolro. Mwavolowaga wene, munofwanya mwana buru agamangeleliwe wenno uli ahanarome gweliwa. Nyo mwanfwanya mwana buru uyo, mmutapule mmuzena uno.

³¹ Akalavo mutu mmohi aufukani ira: <Munatapulela nni burula?>, muwonge ira: <Mwasiwa Nabwiya gunafuna ira alabena.> >>

³² Aliba rumiwa ale kagadowile, kohonfwanya mwana buru ule nnga mwemo mwaawandenle Yesu.

³³ Evale kaganfwanyile, kohoromaga mutapula buru ule. Mbwenye kamutapulaga, annya kohoiraga: <<Munamutapulela nni?>>

³⁴ Evale aliwa kohowakulaga, aliwa ira: <<Mwasiwa Nabwiya gunanfuna ira alabena.>>

³⁵ Noira eno, kohomutukulaga buru ule, aliwa mudowagana. Kaganfiyilena wali Yesu ule, kohotandelaga kapa diwa vazulu va mwana buru ule, aliwa mugwelihavo Yesu.

³⁶ Yesu adowaga, atu kotandelaga kapa diwa mundila.

³⁷ Evale Yesu awandamelaga nipedi na Mwango wa Mitengo da Azeti, anamwindji a anamamuharaye kohagalalaga, kamutamalelaga Mulugu mokuwa na mwasa wa jotikiniha jatene ja kopolo jaonne atu,

³⁸ aliwa wongaga keraga: <<Orelihiwa gu Mwene wenno unaza na nzina na Nabwiya! Murendele akale ilambo ya zulu. Wenno uli Okwaranya Jatene atamaleliwe.>>

³⁹ Evale aFarizewu amohiwa kafwanyeya vari va anamwindji vale kohomuwongagana keraga: <<Namafundjiha, kaasumululeni anamauharaninyu ala!>>

⁴⁰ Yesu mbwenye ohawakulaga eraga: <<Miyo nnouwandelani ira aliwa kamiyala, mabwe anerege kuwa!>>

⁴¹ Yesu awandamelaga sidadi ya Jeruzalemu, agaonile sidadile nnga ha vale, ohoinlelaga

⁴² eraga: <<Aa! We Jeruzalemu! Yohofwanela ira siku na peno uiziwe makalelo ozana murendele! Mbwenye makalelo owenda na murendele ali okoyeya vamentoni vawo.

⁴³ Tchoira anofiya malambo oira amwidanawo kamale barela marampa otawelamo eto anoza kauwerewere no utiyelela pandi datene.

⁴⁴ Aliwa anoza kaubwanyule weyo na atu atene anakala mwa weyo, mukale vati. Kagaubwanyunle, kavali nibwe nnafuna za kala vazulu va nibwe nfwaye, mwasiwa weyo kuiziwile tempu izile Mulugu ira aupande.>>

Yesu ohatamangiha aliba malronda Nyumba ya Yehova

⁴⁵ Yesu ohovolowaga vatando va Nyumba ya Yehova, liye roma atamangihamo anamagula na anamaguliha atene.

⁴⁶ Ohawandelaga eraga: <<Jihilrembiwa mMazuni ira: <Nyumba yaga inakala nyumba yolobelamo.> Mbwenye nyo muhuisandutcha kala nifukwe noakoyamo ambava!>>

⁴⁷ Yesu ofundjihetcha Nyumba ya Yehova malambo matene. Mbwenye andimuwa a anamakuta, anamafundjiha malamulo na aliba asogolrelra atu, kohofuna ira kampe Yesu.

⁴⁸ Mbwenye aliwa tchanna yoira, tchoira atu atene kanvuruwana Yesu koziveliwa valukulu jawonga liye.