Lukaji 1 - Mazu Otchena a Mulungu

Mazu oroma

¹ Atu adjindji kohovilevela ira kalrembe istoriya ya jengo jiireyile muwari mwa hiyo.

² Atu anne kaonile jatene jiireyile roma maromelo wene eto atu anno kalaleyetcha mazu baniwandenle. Evale nagawandeliwe, nihilremba jejile jawandeliwe hiyo.

³ Mwa eno, so mundimuwa Teyofilo, miyo dihifundja mwapama zela jatene jiireyile roma maromelo, nomala miyo ona ira: <<Inafwanela dimulrembele mundimuwa Teyofilo jatene jene mokwakwanela ira na liyene aiziwe jiireyile.>>

⁴ Eniva nnalremba ira mukaleve oimelene zela jatene jene jifundjihiwe nyo.

Zakariya ohowandeliwa zela Baliwa wa Juwawu

⁵ Tempu yatonga mwene Erodi ilambo ya Judeya, ohokalawo namakuta mmohi eriwa Zakariya. Liye ali namakuta wa nikuru nimohi naitaniwa nikuru na Abiya. Liye ohomukana muhiyanaye eriwa Ezabeli, wenno ali wa ziza na Arawu.

⁶ Aliwa ambinlene muhiyana na mulombwana kafwanyeya kagali apamene vamentoni va Mulugu, tchanna makani. Aliwa kawenda mwapama na malamulo vamohi na mangano matene a Nabwiya.

⁷ Eto fwanyeya ira muhiyanaye kaanna ahima mwasiwa ali ngomwa eto mwa ora yenne ambinlene kohoulula.

⁸ Yagafiyile tempu yoira nikuru na Zakariya nne nilabe, Zakariya ohodowa ira alabe mabasaye a unamakuta vamentoni va Mulugu.

⁹ Nnga veretcha atu tempu yenno, namakuta para avolowe Nyumba ya Yehova atumeye jonukela, asakulriwa mwa ngari. Mwa enne Siku nenne asakulriwe ali mulombwana Zakariya.

¹⁰ Tempu yavolowa namakuta mmba mule ira alabe mabasaye otumeya jonukela, atu atene kakala unde kalobelaga.

¹¹ Evale liye agavolowile mmba mule, mungelro wa Nabwiya ohozaga liye imela muwononi odjana vaibuwani vatumeyetcha atu jonukela.

¹² Evale Zakariya agamuonne mungelrole, ohorendjeyaga, liye roma muovaga.

¹³ Mbwenye mungelrole ohomuwandelaga, liye ira: <<We Zakariya kuove. Tchoira malobelo awo kohomala vweya na Mulugu. Eni muhiyanawo Ezabeli unombala mwana wa mwanapongwe. Mwanole abaliwa, weyo unvahe nzina na Juwawu.

¹⁴ Liye abaliwa, weyo unohagalala eto atu adjindji anoziveliwa valukulu.

¹⁵ Tchoira zela wa Nabwiya, mwanole unakala mundimuwa ofwanela vamentoni va Nabwiya eto kaza ang'wa vinyu nari yong'wa imohiwa yolrezelriha. So mbwenye unozaleliwa Munemba Otchena ahanabaliweve.

¹⁶ Liye unoza aarungunutche Ana Izarayeli adjindji ira kamuhare Nabwiya Mulugu wewa.

¹⁷ Eto unodowa vasogolro va Nabwiya. Makalelo aye na kopolo nnafuna liye kana unalinganege na namafiyiheda Eliya. Mwa eno, liye unorungunutcha mmirimani mwa ababi ira kawendege pama na ahimiwa. Unorungunutcha mmirimani mwa atu ohovwelela ira aliwa kawende na zelru da atu apama. Unoarungunutcha atu oindjiva ira Nabwiya afiyaga, aafwanye kagali ovisakanyedene.>>

¹⁸ Evale Zakariya ohonfuka mungelrole ira: <<Nnga miyo nnawande roromela avi ira nyo munawonga ibaribari? Tchoira miyo dihimala ulula eto muhiyanaga uhumala ulula.>>

¹⁹ Mbwenye mungelrole ohomuwakulaga ira: <<Miyo dili Gabiriyeli, maliba kala vamentoni va Mulugu. Liye gudirumile ira dize duwandele Muselu Wapama wenno unauwandela miyo.

²⁰ Uing'ane, kuma peno eni kunawongege fiyeda siku nnafuna za kwakwanela jatene jene jiwongile miyo ji, mwasiwa weyo kufunne roromela zela yenno yuwandenle miyo. Mbwenye jejo jinoza jiireye siku niwa naza nifiya.>>

²¹ Jejile jiireyaga enne, atu kafwanyeya unde ule, kohoroma muing'anela eto kohotikiniheyaga na mwasa odibeliwamo muwari mwa Nyumba ya Yehova mule.

²² Evale Zakariya akumaga mmba mule kawanda wonga, so mbwenye liye afunaga wonga, atonya na manda bahi. Atu kagaonile ira Zakariya kawanda wonga, aliwa kaonelramo ira: <<Liye agali muwari mwa Nyumba ya Yehova, ukala jionihiwe liye.>>

²³ Evale mulombwana Zakariya malambwaye a mabasa kagamanle, ohovenyihana liye welela vande.

²⁴ Vagavirile malambo mangasi mangasi, muhiyanaye Ezabeli ohokana vambani. Liye aganna vambani, ohovikoya ante medi mitanu doroma, aumbuwelaga ira:

²⁵ <<Nabwiya uhudiirela upama ira manyazo ohobala danna miyo malambo a mundulrimu vari va atu, kamale.>>

Mungelro ohomuwandela Mariya zela baliwa wa Yesu

²⁶ Ezabeli aganna vambani medi mitanu na mmohi, Mulugu ohomuruma mungelro Gabiriyeli ira adowe ilambo ya Galileya, sidadi ya Nazareti,

²⁷ awonge na namwali mmohi aitaniwa Mariya wenno ali ahanarome gona na mulombwana. Mariya tempu yenno abanyelriwe na mulombwana mmohi wa ziza na mwene Davi, eriwa Joze.

²⁸ Evale mungelrole agafiyile wewule, ohomulondjela Mariya, nomala liye ira: <<Weyo uli mutu orelihiwa eto Nabwiya uli na weyo.>>

²⁹ Mbwenye Mariya agavwile londjela wa mungelrole, ohokukumuwaga, liye roma umbuwela ira: <<Kodi mungelrola londjela wewu unafuna utapulele avi?>>

³⁰ Evale mungelrole ohomuwandelaga, liye ira: <<Mariya weyo kuove, mwasiwa Mulugu uhuureliha.

³¹ Kaing'ana, weyo unokana vambani umbale mwanapongwe. Liye abaliwa, unvahe nzina na Yesu.

³² Mwana unafuna we mbala unakala mundimuwa wa kopolo, wenno unaitaniwege Mwana Mulugu, Mulugu Okwaranya Jatene. Nabwiya Mulugu unonvaha mpando wa umwene wa mbwiyaye Davi.

³³ Liye unerege tonga mulogo wa Jako. Umwene waye kuza umala. Unakala umwene wa mukalakala.>>

³⁴ Evale Mariya agavwile enne, ohonfuka mungelrole ira: <<Kodi ejo jinaireya avi agali miyo kannamugonena mulombwana?>>

³⁵ Evale mungelrole ohomuwandela, liye ira: <<Munemba Otchena unoutitela eto kopolo da Mulugu Okwaranya Jatene nnakala na weyo. Nona mwana unafuna we mbala unaitaniwege Otchena eto unaitaniwege Mwana Mulugu.

³⁶ Eto kaing'ana, Ezabeli wenno uli muibalini mmohive na weyo, wenno atu atene kamuiretcha atu ngomwa, liye uhukana vambani medi mitanu na mmohi. Vambani vinna liye, unombala mwanapongwe.

³⁷ Tchoira na Mulugu kilivo yengo yahanawandeya.>>

³⁸ Evale Mariya agavwile mazu anne ohowongaga eraga: <<Miyo vano nnafwanyeya dagali muzari wa Nabwiya. Jatene ejo jidiireyele nnga muwongele nyo.>> Mungelrole agamanle wonga jejile ohokumagavo valigi Mariya vale, liye dowaga.

Mariya ohodowa mpanda Ezabeli

^39-40 Vagamanle malambo a vang'ono, Mariya ohovenyaga adowaga ilambo ya mmwangoni, vande va Zakariya, tatamo imohi yafwanyeya muwari mwa porovinsiya ya Judeya. Aganfwanyile Ezabeli, ohomulondjela.

⁴¹ Evale Ezabeli agavwile londjela wa Mariya, mwana afwanyeya mbani mwaye oholupalupa. Evale Ezabeli ohozaleliwa Munemba Otchena.

⁴² Mwa enne ohoromaga wonga mokuwa eraga: <<Muwari mwa ahiyana atene usimbwile relihiwa gu weyo. Eto orelihiwa gu mwana wenno unafuna we mbala!

⁴³ Kodi miyo dili ani fiyeda ira weyo mmaye Nabwiya waga uze udipande?

⁴⁴ Kaing'ana, tchoira miyo dagavwile udilondjelaga, mwana unafwanyeya mbani mwaga mu, uhulupalupa mohagalala.

⁴⁵ Orelihiwa gu mutu wenno unaroromela jejo jiwandeliwe liye na Nabwiya ira jinoireya.>>

Imba wa Mariya

⁴⁶ Mariya agavwile enne ohowonga eraga: <<Miyo nnomuriheda Nabwiya no kalawo waga watene.

⁴⁷ Munemba waga unohagalala zela Mulugu Nvulusi waga.

⁴⁸ Tchoira Nabwiya uhudiumbuwela zela makalelo mang'onong'onove danna miyo, muzari waye. Makalelo danna miyo tchoira kadateteliwa na atu. Mbwenye kaing'anani, kuma peno dowa sogolro atu a tempu datene anadiitanege muhiyana orelihiwa.

⁴⁹ Wenno unna Kopolo uhudiirela miyo jengo jilukulu eto nzina naye totchena.

⁵⁰ Liye unooniha tangaranga daye muwari mwa atu anne anamuova, roma atu a wanle dowagave para atu a sogolro.

⁵¹ Liye uhuvenyiha muwono waye wa kopolo, uhabalaletcha atu ovitukulela na jofuna jiwa jatene.

⁵² Liye uhatitiha andimuwa anno kagaratile mipando da umwene eto uhagweliha atu oviyeviha.

⁵³ Liye unoarumbaliha na jengo japama atu okana ndala, amala eto unoatamangiha atu orayela, aliwa dowaga eno manda ve.

^54-55 Liye kadiwanle yopangana yenno yapanganne liye ira unoza anikamihede hiyo aIzarayeli anamalabaye. Mwasiwa liye ohopangana na ababihu, mulombwana Abarahamu vamohi na ahimaye ira: <Miyo nneregeve uwendelani tangaranga malambo matene a mukalakala.> >>

⁵⁶ Mariya ohomala medi miraru agali vande va Ezabeli awalredaga. Agamanle walreda, ohovenya, liye dowaga waniwa.

Baliwa wa Juwawu Mbatizi

⁵⁷ Ezabeli tempu yaye yobala yagafiyile, ohombala mwanapongwe.

⁵⁸ Evale amwandamanaye na abalaye kagavwile tangaranga dedo Nabwiya amuirele liye, kohagalalaga valukulu.

⁵⁹ Mwanole agakwakwanihile malambo matanu na mararu, kohomuinela. Kagamuinenle kohofuna ira kanvahe nzina na babaye Zakariya.

⁶⁰ Mbwenye mmaye ohoira: <<Hehi, nzina naye unakala Juwawu.>>

⁶¹ Evale atu kohonfuka, aliwa ira: <<Kodi nyo muzizani mwinyu, ukalamo unna nzina neno?>>

⁶² Evale atu kohonfuka Zakariya zela nzina nafuna liye nvaha mwanayele.

⁶³ Evale Zakariya ohovepa imwana tabwa ira alrembevo. Kaganvahile tabwa nne, oholrembavo ira: <<Mwanola nzina naye gu Juwawu.>> Atu atene kafwanyeya evale kohotikinaga.

⁶⁴ Agalrembile vatabwani vale, tempu imohive yenne ohoromaga wonga akoka, agali liye kawongetcha. Noira eno, ohoromaga mutamalela Mulugu.

⁶⁵ Jagaireyile enne amwandamaniwa kohokana ova eto zela jejile jaireyile johomala vweya ilambo ya mmwangoni ya Judeya.

⁶⁶ Zela atu atene kavwile jejile, koumbuwela mmirimani mwiwa kafukanaga keraga: <<Kodi mwanola unafuna akale ani?>> Mwasiwa kopolo da Nabwiya dali na mwanole.

Zakariya ohowonga mazu mozaleliwa Munemba Otchena

⁶⁷ Zakariya muwari mozaleliwa Munemba Otchena, ohoroma wonga mazu a Mulugu, eraga:

⁶⁸ Atamaleliwe Nabwiya Mulugu wa aIzarayeli. Tchoira unazela awombola atwaye.

⁶⁹ Mwasiwa liye gumurumile Nvulusi waye wa kopolo ira aze wa hiyo. Liye azaga, unakumela muzizani mwa Davi namalaba waye.

⁷⁰ Liye unokwakwaneliheda mazu awongile liye wanle muwari mwa anamafiyihedaye otchena

⁷¹ ira aniwombole mmandani mwa amwidanihu eto mmandani mwa atene anno ananiharahara.

⁷² Liye oholumbela na ababihu ira: <<Miyo nnouwendelani tangaranga. Miyo kannadiwala yopangana yaga yotchena yenno ipanganne miyo na nyo.>>

^73-74 Tchoira liye oholumbela na nikolo nehu Abarahamu malambo a mundulri ira: <<Miyo nnoza daawombole ahimawo a musogolro mmandani mwa amwidani ewa atene eto aliwa anoza kaditamalelege mohoova.>>

⁷⁵ Liye awongele eno ira hiyo niwende vamentoni vaye na makalelo otchena vamohi na makalelo apama, kalawo wehu watene.

⁷⁶ Zakariya ohowongagave zela mwanaye eraga: <<We mwanaga, unerege itaniwa namafiyiheda wa Mulugu Okwaranya Jatene. Weyo gunafuna kala vasogolro va Nabwiya ira utare ndila inafuna liye vira.

⁷⁷ Weyo unerege avwiha atwaye zela vulusiwa wewo unazela moleveleliwa jotega.

⁷⁸ Na mwasa wa tangaranga da Mulugu dohokala da masika, ukala unakumela zulu nnga nzuwa nakumaga

⁷⁹ ira aamoneye ale anagarati muisini vamohi na wewo unafwanyeya nfulri wa ukwa. Unonisogolrelra manyalo ehu ira niwende na ndila yozana murendele.>>

⁸⁰ Mwanole Juwawu oulukula eto okala olimbene mwa munemba. Evale ohodowa muisalesaleni, liye kala mwemule fiyeda siku naromile liye laba mabasaye vamentoni va aIzarayeli.