Jowandeliwa 9 - Mazu Otchena a Mulungu

Za wa miserebo doaluma atu

¹ Nomala enne, mungelro wanetanu ohoimba palraza yaye. Agaimbile, miyo dohoona nyenyedi yakumile zulu imorela mwilamboni ya vati. Nyenyedile yohovahiwa xavi nohulana muliha odiha ohokana magomelo.

² Evale nyenyedile yohodowa hula muliha odiha ohokana magomelo ule. Agahunle, mmulihani mule mohokuma utchi ohokala wa masika nnga utchi okumela muwari mwa hofu mundimuwa. Mwa enne nzuwa nohodibaga vamohi na zulu watene na mwasa wa utchi akumile mmulihani mule.

³ Eto muwari mwa utchi mule, mohokuma miserebo, aliwa balaleya mwilamboni ya vati. Mwa enne miserebo dile dohovahiwa kopolo domuoniha mutu upa nnga jini walruze amuluma mutu.

⁴ Eto miserebo dile dohowandeliwa ira: <<Nyo mwawendaga kamunongege mpinda nne jalo nne mutengo uli watene. So mbwenye mudowe mwaalumege atu anno kahadindiwe na karimbu ya Mulugu vakoveni vewa.>>

⁵ Eto miserebo dile dohowandeliwa ira: <<Atu munafuna nyo afwanyaga kamwapege. So mbwenye mwaazuzumihege na makalelo ohokala a masika fiyeda medi mitanu.>> Eto miserebo dile damuluma mutu, upa uwa walingana na upa unakana mutu alumiwa walruze.

⁶ Mwa malambo anne miserebo dile daza mwilamboni, atu anerege sayela ukwa, mbwenye kiza kafwanyaga. Eto aliwa anerege funa nnga kakwe, mbwenye ukwa unerege atawa aliwa.

⁷ Miserebo dile ikalelo yewa, dakala nnga kavalo dowara jowara jodowana kondoni. Vamuru vewa, vohokala jolingana na atchapowa a oru. Eto wintoni uwa walingana na wintoni wa mutu.

⁸ Eto nsisi niwa, nakala nnga nsisi na muhiyana. Eto meno ewa kali nnga meno a podogoma.

⁹ Aliwa vamirimani vewa vohokala defeza nnga defeza ya momba unawara munyakondo. Eto davavaga, mmapepeloni muwa movweya nnga aaterelado adjindji katutumuliwaga na kavalo datamangaga kondoni.

¹⁰ Miserebo dile mila diwa dakala nnga mwila wa walruze. Eto dohokana kopolo ira didowe damale medi mitanu dagali mwilamboni ya vati daaporotchaga atu na mila diwa.

¹¹ Miserebo dile dohomukana mwene asogolrelra, wenno unafwanyeya agali mungelro wa muliha odiha ohokana magomelo. Musogolrelri ule nzina naye na iwongelo ya iEberewu unaitaniwa Abadomi. Na iwongelo ya iGerego unaitaniwa Apoliyomi. Mazina amenlene anno anatapulela yengo imohive. Ku wonga namatolotcha.

¹² Yowopiha yoroma yawongiwa ihivira. Mbwenye muing'ane, jinaza jowopiha jimohi jiwa mbinli.

Za wa anyakondo na kavalo doapa atu

¹³ Nomala enne, mungelro wanetanu na mmohi ohoimba palraza yaye. Agaimbile, miyo dohovwa nizu nimohi nakumelaga muwari mwa manyanga mannayi a ibuwa ya oru, yenno yafwanyeya vamentoni va Mulugu.

¹⁴ Nizu nne nohowongaga mazu na mungelro wanetanu na mmohi aimbile palrazole ira: <<Udowe waatapule angelro annayi anno anafwanyeya kagali omangiwene muhindje mulukulu wa Eufarati.>>

¹⁵ Nomala enne, angelro annayi kamangiwe ale kohokutchiwa. Aliwa kali angelro anno kakoyiwe ira kahuliwe yaka yenne, mwedi wenne, siku nenne na ora yenne ira kadowe kaape pandi yaneraru ya atu atene anafwanyeya mwilamboni.

¹⁶ Eto miyo dohovwaga numero na nikuru na anyakondo ewa owendiha kavalo. Indjiva uwa ali 200.000.000.

¹⁷ Kavalo daona miyo muwari mwa joonihiwa jile, annya kagwenle vakavaloni vale kawendihaga vamirimani vewa vohokala defeza dokana kore taru. Kore imohi yofila yolingana na munlo. Kore imohiwa ya matamba yolingana na zulu. Kore imohiwa yali ya madjani nnga magiyawu oitwa. Eto kavalo dile miru diwa dakala nnga muru wa podogoma. Aliwa kawaramula wanoni wewa kowanda kumiha munlo, utchi, vamohi na mabwe onuka, aliwa avokedaga atu.

¹⁸ Mwa enne pandi yaneraru ya atu kohopiwa muwari mwa jengo taru jowopiha jakumiha atu jile, munlo na utchi na mabwe onuka.

¹⁹ Mwasiwa kavalo dile kopolo diwa doapana atu dafwanyeya wanoni vamohi na mwilani wewa. Tchoira sogolro wa mila diwa, wohokala muru nnga muru wa nyowa, wenno kawanda atu aporotchana atu.

²⁰ Eto atu amohiwa ohala anno kahapiwe na jengo taru jabure jile, masiki kagaonneve makalelo owopiha ale, aliwa kagahanle tchawandile twaruwa zela jengo jabure jairana atu. Kohokalelave tamalelaga minemba dabure na vikwamutu josema josakanyiwa na oru na parata na mukuwa na mabwe na jimiri, jengo johowanda ona nne vwa nne wenda, aliwa aya tamalelaga ejo.

²¹ Eto nne tchatwaruwile zela joapa afwiwa jaira atu, nne zela ja ukwiri jiwa, na joraruwa vamohi na joba jiwa. Kohokalelave irana jatene jene.