Jonasi 1 - Mazu Otchena a Mulungu

Jonasi ohokonda dowa laleya Ninive

¹ Siku nimohi mazu a Yehova kohozaga wa Jonasi mwana Amitayi kawongaga keraga:

² <<Venya udowe sidadi indimuwa ya Ninive, waagwihena mulandu zela jotega jewa, mwasiwa ubure wewa ufiya wa miyo.>>

³ Mbwenye Jonasi agavwile enne, ohovenda jomutawa Yehova, liye funaga dowa ilambo ya Tarisi. Liye dowa Jope, fwanya mwadeya odowa Tarisi, pagalri kobiri yogwelana, liye gwela adowaga Tarisi, amutawaga Yehova.

⁴ Mbwenye kadowaga, Yehova ohorumiha nipevo nlukulu mwiko mwali atu eto mahindje kohoroma manganyeya na makalelo ohokala a masika fiyeda mwadeya halaga vang'ono ira akarakasuwe.

⁵ Evale aliba wendiha mwadeya kohoroma ova, kada mutu akuwaga, amuitanaga mulugu waye. Kohotukula mitolro dali mmwadeyani, aliwa vokeda mwiko ira mwadeya awande luluva. Mbwenye Jonasi ora yenno afwanyeya mutchindo mwa mwadeya, agagonatile, agonaga kove dilukulu.

⁶ Evale mundimuwa wa aliba wendiha mwadeya ohozaga wonga na Jonasi ira: <<We maliba gona, kodi ukanle ani? Kavenya, na wenne unvepe mulugu wawo. Kalekale mulugu wawo aniumbuwele ira nahatolowe.>>

⁷ Evale aliba mwadeya ale kohoroma pangana kada mutu na nfwaye ira: <<Ndoweni niwombezeni makanga muwari mosakanya jogu ya ngari ira niiziwe kodi mutu guvi unizihele ubure wenna.>> Mwa enne kagasakanyile jogu ya ngari ile, evale ngari yamugwenlege mulombwana Jonasi.

⁸ Nomala eno, kohowongaga na liye, keraga: <<Kaniwandele! Kodi ubure watene wenna unizenle na mwasa wa nni? Nnga weyo unalaba mabasa nni? Unakumela waani? Ilambo ya waninyu tchivi? Weyo uli wa nlogo tivi?>>

⁹ Evale Jonasi ohowakulaga ira: <<Miyo dili muEberewu. Miyo eto nnamuova Yehova Mulugu wa zulu, wenno upandutchile bara na ilambo youmma.>>

¹⁰ Evale alombwanale kagavwile eno, kohoovaga valukulu, aliwa muwongana ira: <<Nnga uirele nni jokala ha jejo?>> Aliwa kawongele mazu anne mwasiwa aliwa kohoiziwa ira liye atawile vamentoni va Yehova, tchoira Jonasi ohomala awandelamo jatene.

¹¹ Evale kohowongaga na liye, aliwa ira: <<Nnga hiyo nnafuna nuirele nni ira mahindjala kamiyale?>> Tchoira mahindjale keragave simbwa na nipevo nne.

¹² Evale mulombwana Jonasi ohawakulaga ira: <<Muditukule, mudiponyede mwiko. Mwaira eno, mahindjala anomiyala. Mwasiwa miyo dihiiziwa ira nipevo nlukulu ni niuzenleni na mwasa wa miyo vano.>>

¹³ Eto mofutukula, alombwanale tchairilena yenno yawongile liye. Kohovenda jotchapa ira kawelele mundulri wafwanyeya ilambo youmma. Mbwenye tchawandile mwasiwa nipevo nadowave sogolro nisimbwagave andunyela wahafuna atu.

¹⁴ Mwa enne aliwa kohokuwa kanvepaga Yehova kairaga: <<So Yehova, nnouvepani, kamunihiye ira hiyo atene nikwe na mwasa wa ingumi ya mutula. Eto namponyela mutula mwiko, kamunimange mulandu kalaga nnga nimpile mutu ahategileve. Mwasiwa nyo Yehova muhuirana nnga mwafunile nyo.>>

¹⁵ Noira enne, aliba mwadeya ale kohomutukula Jonasi, aliwa nvokela mwiko. Kaganvokenle mwiko, mahindje a bara ale kukuma waira atu wohomiyala noo.

¹⁶ Noira eno, alombwanale kohomuova Yehova valukulu, aliwa velela mikuto wa Yehova eto kohosakanya jolumbela na Yehova.

¹⁷ Evale Yehova ohorumiha somba indimuwa ira ize immide mulombwana Jonasi. Evale somba ile yagammidile, Jonasi ohokala mbani mwa sombele malambo mararu, ntana na mahiyu.