Jenesesi 9 - Mazu Otchena a Mulungu

Mulugu ohosakanya nipangano naye na atu

¹ Mulugu ohomureliha Nowe na ahimaye, liye ira: <<Mubalihane, muindjivihane, muzale ilambo ya vati.

² Vinyama ja mukokolani na mbalrame dovava zulu, jomburunuwa ja mwilamboni na somba da mbara, jatene jinerege uovani na makalelo ohokala a masika. Jatene ejo eto dihimala hiya mmandani mwenyu ira mutongege.

³ Nnouvahani eto vinyama datene dokalawo ira mudjege. Sawasawa nnga dauvahileni miyo wanle ira mudjege jalo, peno miyo nnouvahani ira mudjege vinyama datene.

⁴ Mbwenye mwadjaga nyama, kamudjege na sangiri niwa nene. Tchoira sangiri ti neno nnavaha ingumi.

⁵ <<Eto wenne unampe mutu, atatilaga sangiri na ingumi ya mutu, miyo na ibaribari nnomutonga. Mutonga uwa, atu afwaye kampe wenne unavuvihe sangiri na nfwaye. Masiki mwanainyama avenya, ampa mutu, mwanainyamole akwe.

⁶ Ule unampe mutu nfwaye avuviha sangiri naye, na liyene sangiri naye nivuvihiwe na atu afwaye, mwasiwa mutu apandutchiwe molingana na Mulugu.

⁷ Mbwenye nyo, mubalihane, muindjivihane. Mukale pwi, muindjivihane mwilamboni ya vati.>>

⁸ Evale Mulugu ohomuwandela mulombwana Nowe vamohi na ahimaye eraga:

⁹ <<Peno miyo nnosakanya yopangana yaga na nyo vamohi na ahiminyu a musogolro,

¹⁰ na anavinyama atenene kakumile mmwadeyani anafwanyeya mwilamboni ya vati, anno anafwanyeya vamohi na nyo, romela mbalrame, anavinyama a vande vamohi na anavinyama a mukokolani, na anavinyama atenene a mwilamboni ya vati.

¹¹ Yopangana inasakanya miyo tchi ila: Miyo kadiza ditolotcha jovuma jatene jene na mahindje madjindji. Kadiza diziha mahindje madjindji obwanyula ilambo ya vati.>>

Ionihedo ya yopangana ya Mulugu na jatene jovuma

¹² Mulugu ohowonga eto eraga: <<Ila inafuna ikale ionihedo ya yopangana inasakanya miyo na nyo vamohi na jovuma jatene jinafunege baliwelamo sogolro.

¹³ Miyo nnohela muzirilimbo mmiramboni ira ikale ionihedo zela yopangana yaga na ilambo ya vati.

¹⁴ Yopangana yaga tchi ila. Daziha mirambo zulu, amala aoneya muzirilimbo mmiramboni mule,

¹⁵ miyo daona muzirilimbo ule, pa evo vanafuna miyo umbuwela ira: <Muzirilimbo unaona miyo ule, tchi ionihedo ya yopangana yaga na atu atene na jovuma jatene ira miyo kadiza ditolotcha jengo jatene na mahindje madjindji akoka.>

¹⁶ Muzirilimbo aoneya mmiramboni mule, miyo Mulugu damuona nnerege umbuwela yopangana yaga yohomala isakannye miyo na jatene ja ingumi jinafwanyeya ilambo ya vati.>>

¹⁷ Evale Mulugu ohomuwandela Nowe ira: <<Muzirilimbo ula tchi ionihedo ya yopangana disakanyile miyo na jovuma jatene jinakala mwilamboni ya vati.>>

Nowe vamohi na ahimaye

¹⁸ Ana Nowe kakumile mmwadeyani kafwanyeya kagali araru: Semi, Kami na Jafeti. Kami gwenno ambanle Kana.

¹⁹ Atu atene kabalaleyile mwilamboni ya vati kabaliwe muwari mwa ana Nowe araru anno.

²⁰ Mulombwana Nowe ali namalima. Muwari mokala namalima, liye gu mulombwana oroma alimile munda wa uva.

²¹ Siku nimohi Nowe ohong'wa vinyu akumile mmundani mwaye mule, liye fiyeda lrezelra. Agalrezenlre, ohodowa mmusasani mwaye, liye wungula jowara jaye, liye gonanti agali mandave.

²² Evale mulombwana Kami, babaye Kana ohomuonaga babaye ule agali mandave. Evale ohodowaga awandela abalaye ambinli ale kafwanyeya unde.

²³ Mbwenye mulombwana Semi na Jafeti kagavwile enne, kohotukulaga kapa, aliwa kapatchiha vanifudini, aliwa wendaga na indulrindulri, tawiha ira anaone umandave wa babiwa ule. Aliwa nkunela babiwa wenno ali mandave.

²⁴ Evale mulombwana Nowe agasisimuwile lrezelra walrezenlre liye ule, ohoiziwa zela yenne yairile Kami mwanaye wa ng'onong'ono ule.

²⁵ Evale Nowe ohowonga eraga: <<Mulombwana Kana atembelrelreye! Liye akale muzari wa azari, aalabege abalaye!>>

²⁶ Nowe ohowongagave eraga: <<Otamaleliwa akale Yehova, Mulugu wa Semi eto Kana akale muzari waye!

²⁷ Mulugu amuulukulihe Jafeti na ilambo yaye! Ahima a Jafeti kamangege nyumba diwa vamohi na ahima a Semi! Mulombwana Kana akale muzari wa Jafeti!>>

²⁸ Tempu ya mahindje madjindji yagavirile, Nowe ohomala yaka 350 dimohi diwa.

²⁹ Nowe kalawo waye watene amanle yaka 950. Mwa enne ohokwa.