Jenesesi 44 - Mazu Otchena a Mulungu

Joze ohaxixa abalaye

¹ Joze abalaye ale kagamanle dja, ohomuruma namalabaye mmohi wenno ali musogolrelri wa vande vaye, liye ira: <<Udowe wahele jodja mmasakwini mwewa, uzalihe, fiyeda kada mutu vinawandela liye tukula. Wairana eno utukule kobiri ya kada mutu, uhelege musakwini mwaye, vazulu viwa.

² Eto utukule kopo yaga ya parata, uhele vazulu va sakwi na mbaliwa wa itongohi ule vamohi na kobiri digunlena liye jodja jaye.>> Mwa enne namalabole ohoirana nnga mwemo mwawongele Joze.

³ Unde wagatchile, Joze abalaye ale kohogunyiwa, tukula aburu ewa, aliwa gundeya dowaga.

⁴ Aliwa kagakumile musidadi mule, kagawendile vang'ono, kahanasuse, Joze ohomuwandela namalabaye wenno ali musogolrelri wa vande vaye, liye ira: <<Uvenye waahare alombwanale. Waafwanya wire: <Kodi mwasiwa gwa nni hiyo nagamanle uirelani upama, nyo niwelihedaga ubure?

⁵ Kodi nyo kamuiziwile ira kopo inang'wana mbwiyaga tcheniyo inawombezana liye makanga? Nyo kamusakanyile pama.> >>

⁶ Namalabole agadowile, agaafwannye, ohowongaga nnga mwemo mwamulanyedile Joze.

⁷ Aliwa kagavwile jejile, kohowakula keraga: <<Mbwiyeni, kodi munawongela nni ejo? Hiyo anamalaba enyu kanili atu oirana jokala ha ejo.

⁸ Malambo a mundulrimu jagaireyile ha jeji, nagafwanyile kobiri mmasakwini mwehu nagali Kana, nohozana, hiyo uwelihedani. Nnga nnawande avi ira nibe ja oru nari ja parata ja vande va patarawu wenyu?

⁹ Malringana mwa hiyo vano anamalaba enyu, wenno munanfwanyena nyo mmutolroni mwaye jejo jinawonga nyo, apiwe. Eto hiyo atene nnokala azari enyu.>>

¹⁰ Liye ohowonga eraga: <<Ihikala pama. Jiireye nnga mwemo muwongele nyo. Wenno nnanfwanyena hiyo, unokala muzari waga. Mbwenye nyo amohiwa kamunakana mulandu.>>

¹¹ Mwa enne, mobaranya kada mutu ohoroma titiha sakwi naye, rulaga vati. Eto kada mutu ohoromaga tapula sakwi naye.

¹² Evale namalabole ohoromaga saka kada sakwi, roma murandji baliwa, fiyeda ogomiheda. Mwa enne kopwele yafwanyeyilege musakwini mwa Benjami.

¹³ Evale aliwa kohokawulaga jowara jiwa mokumbanya, kada mutu liye tukulaga mutolro waye, gweliha vaburuni vaye, aliwa welela sidadi wakoka wene.

¹⁴ Evale Juda na abalaye ale kohodowaga nfwanya mulombwana Joze vande vaye, mwasiwa tempu yenne ali ahanavenyevo. Kaganfwanyile kohomukokorela, aliwa oramiheda miru diwa vati.

¹⁵ Mwa enne Joze ohowongaga eraga: <<Kodi mwairela nni jokala ha jeji? Nyo kamuiziwile ira mundimuwa okala ha miyene nnowanda wombeza makanga?>>

¹⁶ Evale mulombwana Juda ohowakulaga eraga: <<Hiyo andimuwa, nnafuna niire avi? Kodi nnafuna niwonge nni? Kaninna yowonga yovivunela. Tchoira yotega yehu, Mulugu umala oneyiha. Hiyo atene nnakala azari enyu roma ule ufwanyeyilena kopo vamohi na hiyo atene.>>

¹⁷ Mbwenye Joze ohowonga eraga: <<Kavili jowandeya ira miyo nnoirana jokala ha jejo. Mbwenye wenne ufwanyeyilena kopo, liyene bahi gunafuna kala muzari waga. Mbwenye nyo mumaruwe, mudowege wa babinyu mwa murendele.>>

¹⁸ Evale Juda ohomukwivelaga Joze, liye nvepa eraga: <<Mudirumelihe diwonge na nyo andimuwa, kamutakaleliwe na makalelo ohokala a masika zela wa miyo namalaba wenyu. Miyo dihiiziwa ira nyo muli mundimuwa nnga Farawu.

^19-20 Mbwiyeni malambo a mundulrimu, hiyo anamalabinyu nagazile uno, mohonifuka ira: <Muhukana babinyu?> Hiyo ira: <He, babihu ukalawo. Liye umala ulula.> Eto nyo mohoira: <Nnga muhukana mbalinyu mmohiwa?>, hiyo rumela ira: <Nihikana mbalihu wa ng'onong'onuwa, wenno papa umbanle liye agaulunle. Liye ohokana mbalaye obaliwana ingulu imohive, mbwenye uhukwa. Liye eka guhanle, mwana mmohive wa mmaye. Nona babihu unomuziveliwa valukulu.>

²¹ Noira eno, nyo mowonga na hiyo anamalabinyu ira: <Mwadowa, mwamuzena ira dimuone na meso aga.>

²² Evale hiyo nohoira: <Kavili jowandeya ira muzombole unomuhiya babaye, mwasiwa liye amuhiya, babaye unokwa.>

²³ Noira eno, mohoniwongaganave hiyo anamalaba enyu, nyo ira: <Mwahamuzena mbalinyu wa ng'onong'ono, kamuwelele vamentoni vaga akoka.>

²⁴ <<Noira eno, hiyo nagadowile wa babihu namalaba wenyu, nohomuwandelamo mazu matene nnga mwawongele nyo.

²⁵ Evale jodja nagunle hiyo jagamanle, baba ohoniruma ira: <Venyani, mudowe Ijipitu akoka, mwagule jodja ja vang'onove.>

²⁶ Mbwenye hiyo nohoira: <Mbalihu wa itongohi ahadowe, na hiyene kannayawo. Mbwenye liye akala unodowa, na hiyene nnoyawo. Tchoira kavili jowandeya ira hiyo nnodowa vamentoni va mulombwanole mbalihu wa ng'onong'ono ahali na hiyo.>

²⁷ Noira enne, babihu namalaba wenyu ohowakula ira: <Nyo muhuiziwa ira mwanola mmaye dimbalena ahima ambinli bahi.

²⁸ Mmohi agavennyevo, gwenne atakuniwe na anavinyama a mukokolani owopiha, fiyeda dimela ante peno miyo kannamuone.

²⁹ Ira nyo mmutukule mwana mmohiwa uhanle ula, mmudowena wewule, aireyeliwa yabure, miyo nnagomela kwa didowe Nimburo na Anokwa na mwasa okumbanya, dagali mutu okana mbwi dodoro eni.>

³⁰ <<Nona, miyo kannawanda welela wa baba namalaba wenyu. Tchoira miyo dadowa eno, dahamudowilena muzombwela, voira unosimbwetchetcha muziveliwa,

³¹ aniona okave, muzombwe ula ahamuonavo, baba unagomela kwa. Era eno hiyo anamalabinyu nnomudowiha Nimburo na Anokwa babihu no kumbanya, agalive mutu oulula.

³² Tchoira hiyo nahanaze uno, miyo dagali namalabinyu dohovayela viguliha ira: <Miyo vano nnomuwelanawo mwaninyula. Dahamuwelenawo, nyo podi dibalra miyo nnga mutu wabure vamentoni venyu kalawo waga watene.>

³³ Miyo dera duvepeni ira muzombwela adowe, miyo vano dihale, dikale muzari wenyu vamalroni vaye.

³⁴ Tchoira kavili jowandeya ira miyo nnowelela wa papa, muzombwela ahali na miyo. Tchoira aona ira muzombwela kazile, miyo nnaova ubure unafuna mwireyela baba.>>