Jenesesi 29 - Mazu Otchena a Mulungu

Fiya wa Jako ilambo ya Arani

¹ Jako ohovenyihanaga ulrendo waye adowaga pandi ya ilambo ya makumelo wa nzuwa, liye fiya wali anamurala a wewule.

² Evale againg'anne okala ha ule, ohoonaga isime imohi yafwanyeyaga mmundani. Eto makuru mararu a anavinyama kagali ogonatene wandamelana vaisimeni vale na anamakumbuza ewa. Tchoira anavinyama a wewule kaang'wihetcha evale. Eto isimele yohogudumeyiwa na nibwe nlukulu wanoni uwa.

³ Anamakumbuza atene kaagumanihetcha evale anavinyama ewa, aliwa kumihawo nibwe nafungetchana atu vaisimeni vale, aliwa mala ang'wiha eto kamala enne kowelihedavo nibwe nne akoka.

⁴ Evale Jako ohafuka anamakumbuzale eraga: <<Afwaga kodi nyo muli a waani?>> Aliwa kohomuwakula, aliwa ira: <<Hiyo nili akuda Arani.>>

⁵ Liye ohafuka eraga: <<Nnga muhumuiziwa Labawu, muzula wa Nahori?>> Aliwa kohomuwakulaga, aliwa ira: <<He, nihimuiziwa.>>

⁶ Jako ohafukave, liye ira: <<Kodi liye uli wapamene?>> Aliwa kohomuwakula, aliwa ira: <<He, uli wapamene. Eto mwanaye wa muhiyana Rakeli gwenne unaza vale na mabila.>>

⁷ Evale Jako ohowongaga eraga: <<Kaing'anani nzuwa nihikalawove. Tempu yodowana mabila vande kinafiye. Mwaang'wihe, amala mudowe mwaadjiheve akoka.>>

⁸ Aliwa kohomuwakula, aliwa ira: <<Hiyo kannabaranyeda ang'wiha. Nnadediha anamakumbuza amohiwa kaagumanihe anavinyama ewa. Era eno pinafuna hiyo kumihawo nibwe ni ira niwande ang'wiha mabila matene.>>

⁹ Jako awongagave na aliwa, tchi tempu yafiyaga namwali Rakeli na mabila a babaye, voira liye gwali namakumbuza wa mabilale.

¹⁰ Jako agamuonne Rakeli mwana Labawu, mmaye murongoliye eto agaonne mabila a Labawu ale, ohotamangelaga vaisimeni vale, dowa kumihavo nibwe nne, liye ang'wiha mabila a Labawu, mmaye murongoliye.

¹¹ Noira enne, Jako ohombejarigi Rakeli anlaga no hagalala.

¹² Evale Jako ohomuwandelaga Rakeli ira: <<Miyo dili wa muibalini mwa babawo Labawu. Mmaga gu Rebeka.>> Rakeli agavwile enne ohodowaga vande liye muwandela babaye.

¹³ Labawu agavwile ira: <<Jako, mwana murongoliyo uhufiya>>, ohotamangaga amuharelaga. Aganfwanyile, ohomukumbarelaga, liye mbejari, nomala liye mudowagana waniwa. Evale Jako ohomuwandelaga Labawu jatene jamuireyele.

¹⁴ Labawu ohowongaga eraga: <<Na ibaribari weyo uli mutu wa muibalini mmohive na miyo.>> Evale Jako ohomala mwedi mmohi akalaga vande va Labawu.

Tela wa Jako

¹⁵ Evale Labawu ohomuwandelaga Jako, liye ira: <<Masiki ulive mutu wa muibalini mwaga, kahi ira weyo udilabege vasayi. Kadiwandele kodi weyo yotambilra yawo unafuna ikale nni?>>

¹⁶ Labawu ohakana anavihiyana ambinli, mulukuluwa aitaniwa Leya, ng'onong'onuwa aitaniwa Rakeli.

¹⁷ Leya ali namwali olrenga meso. Mbwenye Rakeli ali namwali oriya kove, vamohi na maningo aye matene.

¹⁸ Jako onfunetcha Rakeli. Mwa enne ohowakulaga, liye ira: <<Miyo nnoulabani fiyeda yaka tanu na mbinli ira dimutele Rakeli, mwaninyu wa ng'onong'ono.>>

¹⁹ Evale Labawu ohomuwakula, liye ira: <<Ihikala pama. Tchapama muteliha mwanaga na weyo hiyaniha na mutu mmohiwa mutela. Weyo ukalege eva na miyo.>>

²⁰ Mwa enne Jako oholaba yaka tanu na mbinli ira amutele Rakeli. Voira liye ohomuziveliwa Rakeli, muwari mwa yaka tanu na mbinli dile, Jako aonne nnga malambo mang'onong'onove.

²¹ Agakwakwanihile yaka dedile, Jako ohomuwongana Labawu, liye ira: <<Mudivahede muhiyanaga ira dimutele, mwasiwa tempu napanganne hiyo ihikwakwana.>>

²² Evale Labawu ohaitanihaga amwandamanaye atene, aliwa za dja pwando ya matelo a mwanaye.

^23-24 Mbwenye unde wagadibile, vamalroni va Rakeli, Labawu anvahile Jako mwanaye Leya. Eto ohomutukula namalabaye wa muhiyana eriwa Zilpa, liye nvaha mwanaye Leya ira amulabege. Evale Jako agavahiwe Leya, ohomugonana ahaiziwaga ira gu Leya.

²⁵ So mbwenye unde wagatchile, Jako paonne liye ira kanvahile Leya. Evale ohovenya, liye dowa nfuka Labawu ira: <<Kodi mudiirele nyo ji nni? Miyo dalabela ira mudivahe Rakeli. Mudinyengele nni?>>

²⁶ Labawu ohomuwakula, liye ira: <<Tchoira ilambwihu ila, kanilemenle muteliha mwana wa ng'onong'ono, mulukuluwa ahanateliwe!

²⁷ So niire eni. Weyo urome mala sumana imohi na muhiyana wenna, amala nnouvaha Rakeli wanfuna we. Malringana urumele ira dauvaha Rakeli, weyo unolaba yaka dimohi diwa tanu na mbinli.>>

²⁸ Evale Jako ohorumela. Sumana yenne ohogona na Leya fiyeda mala. Noira enne, Labawu ohomutukulaga mwanaye Rakeli liye nvaha, Jako liye mutela.

²⁹ Eto Labawu ohomutukula namalabaye wa muhiyana aitaniwa Bila, liye nvaheda mwanaye Rakeli ira akale namalabaye.

³⁰ Evale Jako ohoroma gona na Rakeli. Eto liye asimbwetcha muziveliwa Rakeli, hiyaniha na Leya. Evale ohoroma mulaba Labawu yaka dimohi diwa tanu na mbinli.

Ahima a Jako

³¹ Yehova agamuonne Leya aidiwaga, ohosakanya ira Leya abalege, mbwenye Rakeli kabala.

³² Mwa enne Leya ohokana vambani, liye mbala mwanapongwe. Agambalile, ohowonga eraga: <<Yehova uhuona sanyeya waga. Eni mamunaga unerege diziveliwa.>> Mwa enne ohonvaha nzina na Rubeni [ku wonga ona].

³³ Leya ohowelela kana vambani akoka, liye mbala mwana mmohiwa wa mwanapongwe. Agambalile, ohowonga eraga: <<Yehova ohovwa ira miyo doidiwa. Nona uhudivaha mwana mmohiwa ula.>> Mwa enne ohonvaha nzina na Simeyawu [ku wonga vwa].

³⁴ Evale Leya ohokana vambani akoka, liye mbala mwana mmohiwa wa mwanapongwe. Agambalile, ohowonga eraga: <<Kuma peno eni, mamunaga unamangeya na miyo, mwasiwa dihimbalela ahima araru, anapongwe ve.>> Mwa enne ohonvaha nzina na Levi [ku wonga mangeya].

³⁵ Noira eno, ohowelelave kana vambani akoka, liye mbala mwanapongwe mmohiwa. Agambalile, ohowonga eraga: <<Peno mbwenye nnomutamalela Yehova.>> Mwa enne ohonvaha mwanole nzina na Juda [ku wonga tamalela]. Evale liye ohoroma miyala bala.