Jenesesi 27 - Mazu Otchena a Mulungu

Izaki ohomureliha Jako

¹ Mulombwana Izaki ohomala ulula, fiyeda haonaga. Siku nimohi ohomuitanaga Ezawu, wenno ali mwanaye murandji, liye ira: <<Mwanaga!>> Ezawu ohomurumelaga, liye ira: <<Miyo vano.>>

² Evale babaye ule ohomuwandela, liye ira: <<Weyo unodiona eni, miyo dihimala ulula. Siku nnafuna miyo kwa kadizi.

³ Inafwanela utukule josayana jawo, utukule urwawo na mafumwiwa, udowe kokolani wasaye, udizelena nyama.

⁴ Wamala udisakanyele yodja yapama yoziva yenno inaziveliwetcha miyo, uzena didje ira durelihe dahanakwe.>>

⁵ Izaki amuwandelaga liye mwanaye mazu anne, muhiyanaye Rebeka ovwaga.

⁶ Mwa enne Rebeka ohomuwandela mwanaye Jako ira: <<Miyo tchineneva dihivwa yowonga ya babawo amuwandelaga mbalawo Ezawu ira:

⁷ <Udowe kokolani wasaye, udizelena nyama, udisakanyele yodja yapama yoziva yenno inaziveliwetcha miyo, uzena didje ira durelihe vamentoni va Yehova dahanakwe.>

⁸ Mwanaga uvuruwane pama eto uirena yenno inafuna miyo uruma.

⁹ Utamange tchineneva udowe nimburo nnafwanyeya anavinyama ehu, watukule mbuzi mbinli ding'onong'ono dapama. Wazana, miyo nnosakanya yodja yoziva nnga yenno inaziveliwetcha babawo.

¹⁰ Damala sakanya, weyo udowena, liye adje ira aurelihe, ahanakwe.>>

¹¹ Evale Jako ohonfukaga mmaye, liye ira: <<Mbalaga Ezawu uhukana mawoya eto miyo kadinna.

¹² Papa adiwambaselra adihinda, aona ira gu miyo, unoiziwa ira nnafuna dimunyenge. Era eno, hiya ira adirelihe, unoditembelrelra.>>

¹³ Evale mmaye ohomuwakulaga, liye ira: <<Nari, mwanaga. Akala liye unoutembelrelra, otembelrelreya akale miyo. Weyo uirena yenno yurumile miyo. Udowe watukule mbuzi, uzena.>>

¹⁴ Evale Jako ohodowaga tukula mbuzi mbinli dile, liye dowa nvaheda mmaye. Mmayele ohosakanya yodja yoziva nnga yenno yaziveliwetcha Izaki.

¹⁵ Nomala eno, Rebeka ohotukulaga yowara yapama ya mwanaye Ezawu murandji baliwa, yenno yakoyile liye mmba, liye muwariha Jako, mwanaye wa ng'onong'ono ule.

¹⁶ Eto mmayele ohotukulaga matembe a mbuzi dile, liye mukunelana mwanaye ule miwono na nikohi mwasiwa liye kaanna mawoya.

¹⁷ Evale ohotukulaga jodja joziva jasakanyile liye jile, vamohi na pawu yasakanyile liye, nvaheda mwanaye Jako.

¹⁸ Evale Jako ohodowagana vafwanyeya babaye, liye ira: <<Babani!>> Izaki muwakula ira: <<Gu miyo vano! Kodi weyo uli mwanaga Ezawu?>>

¹⁹ Jako ohorumela, liye ira: <<Gu miyo vano Ezawu, mwaninyu murandji. Dihisakanya yenno yadirumile nyo. Venyani mugarati, mudje nyama yenno isayile miyo ira mudirelihe.>>

²⁰ Evale Izaki ohomuwakulaga eraga: <<Kodi uwandile avi saya mobaranya, mwanaga?>> Jako ohomuwakulaga, liye ira: <<Yehova, Mulugu wenyu gudikamihedile.>>

²¹ Noira enne, Izaki ohomuwongana Jako eraga: <<Mwanaga kadisusele uno, duwambasele, duhinde ira dikayena ibaribari akala uli mwanaga Ezawu owu hehi.>>

²² Evale Jako ohomuwandamelaga, Izaki liye muwambaselra, liye ira: <<Nizu nawo nnakala nnga nizu na Jako, mbwenye eto mandawo anakala nnga a Ezawu.>>

²³ Mwa enne Izaki kawandile muiziwa ira ali Jako, mwasiwa mandaye kohokana mawoya nnga Ezawu. Evale afunaga mureliha,

²⁴ ohonfuka akoka eraga: <<Kodi weyo na ibaribari uli mwanaga Ezawu?>> Jako ohomuwakulaga, liye ira: <<He, gu miyene.>>

²⁵ Evale babaye ule ohomuwandelaga eraga: <<Kadisusihede jodja jisakanyile we ira didje yosaya ya mwanaga, damala durelihe.>> Evale Jako ohonvahaga jodja jile, liye dja. Eto ohonvaha vinyu, liye ng'wa.

²⁶ Nomala enne, Izaki ohomuwongana mwanaye ule eraga: <<Mwanaga kadiwandamele uno, udivahe beju.>>

²⁷ Jako ohomuwandamelaga, liye nvaha beju babaye ule. Izaki agaonne nukela wa jowara ja Ezawu jejo jawarile Jako jile, ohomurelihaga eraga: <<Mwanaga weyo unonukela pama nnga kokola yorelihiwa na Yehova.

²⁸ Mulugu auvahe muzongwe wapama okumela zulu, na johanda jidjindji mmundani, vamohi na tirigu na vinyu oindjivetchetcha.

²⁹ Atu kaulabege eto malogo oindjiva kakokorege vamentoni vawo. Weyo ukale namatonga wa abalawo eto ahima a mmawo kaukokorelege. Katembelrelreyege atu anno anautembelrelrege eto atu anno anaurelihege, karelihiwege.>>

Ezawu ohopuzeya mareliho

³⁰ Izaki agamanle mureliha Jako, avenyagavo wene tchi tempu yazaga Ezawu akumaga masayelo.

³¹ Evale Ezawu ohopiyaga yodja yoziva, liye zana wali babaye eraga: <<Babani, venyani mudje yosaya ya mwaninyu ira mudirelihe!>>

³² Evale Izaki ohonfuka eraga: <<Kodi weyo uli ani?!>> Liye ohomuwakula eraga: <<Gu miyo vano Ezawu, mwaninyu murandji.>>

³³ Evale Izaki agavwile enne ohoroma ngurumela na makalelo ohokala a masika, liye ira: <<Nnga wenne adowile masayelo, apa mwanainyama aza adivaha bani? Ukala azilena jodja weyo wahanaze, miyo dja jatene, nomala miyo mureliha. Eni liye gunafuna kala orelihiwa.>>

³⁴ Evale Ezawu agavwile mazu awongilege babaye ale, ohokuwaga valukulu motakaleliwa, liye nvepaga babaye eraga: <<Babani, direliheni na miyene!>>

³⁵ Izaki mbwenye ohomuwakulaga, liye ira: <<Mbalawo guzile muwari monyenga, liye ubela mareliho anno dafuna miyo uvaha.>>

³⁶ Evale Ezawu ohowongaga, liye ira: <<Na ibaribari nzina na Jako kanaitaniwelana vasayi vene nari, nihinfwanela pama. Mwasiwa fendo ila eni tchi fendo yanembinli adinyengaga. Fendo yoroma ohodiwaka undimuwa waga ozela kala murandji baliwa eto peno uhudiwaka mareliho aga!>> Noira eno, Ezawu ohowongagave ira: <<Nnga babani nne kamuhanlena nreliho nimohi ira mudivahe?>>

³⁷ Izaki ohomuwakula Ezawu eraga: <<Miyo eni dihinvaha ira autongege weyo eto dihinvaha ira nyo abalaye atene mukale anamalabaye. Eto dihimureliha zela tirigu na vinyu, jatene dihimala nvaha. Nnga miyo nnauirela nni mwanaga?!>>

³⁸ Evale Ezawu ohokalelagave nvepa babaye ule eraga: <<Babani kodi mareliho mwanna nyo banno bahi? Babani, direliheni na miyene!>> Evale Ezawu ohotomolaga kuto anlaga.

³⁹ Mwa enne Izaki ohomuwandelaga Ezawu eraga: <<Weyo unakalege olapela wene na wewo unafwanyeya minda dapama eto unakalege olapela wene na muzongwe orumbwa zulu.

⁴⁰ Weyo kalawo wawo unakumelege mowana eto unerege mulaba mbalawo. Mbwenye wawaheyana jotongiwa na mbalawo, unorula tongiwa waukapatchihile liye.>>

Jako ohomutawa mbalaye Ezawu

⁴¹ Noira enne, mulombwana Ezawu ali mwidani wa mbalaye Jako na mwasa wa mareliho anno Jako arelihiwe liye na babaye. Evale mulombwana Ezawu ohoumbuwela mmirimani mwaye eraga: <<Eni babaga uhanle vang'ono ira akwe. Akwa, malambo onla kamala, miyo nnompa Jako.>>

⁴² Mwa enne Rebeka agawandeliwe jaumbuwela Ezawu mwanaye murandji ule, ohomuitanaga Jako mwanaye wa ng'onong'ono, liye muwandela ira: <<Mbalawo Ezawu unaumbuwela joupa ira murimaye amudidile.

⁴³ Mwa eno, mwanaga uvuruwane yowonga yaga. Uvenye utawele vande va murongolaga Labawu, ilambo ya Arani.

⁴⁴ Wakalege wewo fiyeda uwali unna liye ummalele.

⁴⁵ Era eno, mbalawo takaleliwa waye wamala, adiwala yenno imuirele we, miyo nnouwandela ira uwelewo. Tchoira miyo kannafuna upuzeyani nyo ahimaga ambinlene siku nimohive.>>

⁴⁶ Evale Rebeka ohodowaga wonga na mamunaye Izaki, liye ira: <<Miyo dahagomana ahiyana aEti anna Ezawu waatenle liye ala. Jako amutela muEti, namurala wa mwilamboni muno, nnga jiirile mbalaye Ezawu ji, era eno, tchapama miyo dikwe wene.>>