Jenesesi 19 - Mazu Otchena a Mulungu

Angelro ambinli kohofiya vande va Lroti

¹ Evale angelro ambinli ale kohofiya sidadi ya Sodoma ora ya tchiguwo. Tempu yenne mulombwana Lroti agaratilege va mulango va sidadile. Mwa enne liye agaaonne angelro ale kazaga, ohovenyaga, liye dowa afwanya, akokorela aoramihaga muru waye ante fiyiha vati.

² Ohavepaga eraga: <<Andimuwa, nnouvepani ira muperuwe, muhaye vande va namalaba wenyu. Muhuwe manyalo enyu, mugone. Unde watcha na mabebehene, nyo podi venya, dowaga ulrendwinyu.>> Aliwa mbwenye kohokonda, aliwa ira: <<Nari, hiyo nnadowa nagone varampani vale.>>

³ Mbwenye Lroti ohakanyiheda. Noira eno, kohorumela, aliwa muhara Lroti vande vaye. Mwa enne Lroti ohowotcha pawu dohosakanyiwana leverina na jodja jimohi joindjiva, japama, alendwale aliwa dja.

⁴ Mbwenye aliwa kahanadowe gona, alombwana atene a sidadi ya Sodoma, azombwe na andimuwa, nne mutu mmohi ohala, atene kohozaga irindja nyumba ya Lroti.

⁵ Kohoromaga muitana, keraga: <<Kali waani alendo kazile vaninyu mahiyu anna? Waakumihede vande va, hiyo nnafuna naagonena.>>

⁶ Lroti ohokumela unde wali atu vamulangoni vale, liye funga musuwo unduli waye,

⁷ liye roma wonga eraga: <<Abalaga, nnouvepani ira mwahasakanye yabure.

⁸ Muhuiziwa ira dihakana anamwali aga ambinli, kali kahanagone na mulombwana. Mwafuna, nnoakumiha aliwene ira mwaatukule, mwaairegena malringana inafuna nyo. Mbwenye alombwana ala kamwaairele yengo mwasiwa aliwa ba alendo, kazela haya vande vaga.>>

⁹ Atwale mbwenye kohomuwakula keraga: <<Kavenyavo va mulango vo! Weyo uli namaza! Peno unafuna unitongege hiyo vano? Nnouirela makalelo abure kwaranya makalelo nafuna hiyo airela alendwawo ayo!>> Evale kohomundunya Lroti, kadowaga va mulango ira katwe musuwo.

¹⁰ Evale alendo ale kohulaga musuwo, aliwa muhinda Lroti na mandiwa, muwetela mmba mule, aliwa fungawo.

¹¹ Eto kohatwaga meso alombwana a Sodoma anno karindjile nyumba ya Lroti ale, roma azombwe, fiyeda andimuwa ewa. Mwa enne kohoroma saka musuwo mbwenye tchawanda fwanya.

^12-13 Noira enne, alombwana ambinli ale kohowonga na Lroti keraga: <<Hiyo nazela gudjula sidadila. Tchoira kuwa ozela jabure jidjindji jinaira atu jihimala vweya na Mulugu. Eni Yehova gunirumile ira nize nigudjule. Kodi musidadi mu uhukanamo atwawo amohiwa? Inafwanela uvenyemo vamohi na atwawo atene, ahimawo, anapongwe nari anavihiyana, na akamwenawo, nari mutu wawo uli watene.>>

¹⁴ Lroti ohovenya, dowa awandela akamwenaye anno kafuna atela ahimaye, ira: <<Muvenyemo musidadi mu mwasiwa Yehova tchineneva unoigudjula.>> Mbwenye aliwa kaonne nnga Lroti awonga ipale.

¹⁵ Unde utchaga, angelro ale kohowonga na Lroti, keraga: <<Kavenya mobaranya, unkumihemo musidadi mu muhiyanawo na ahimawo ambinli unna we, tawiha ira munatolotchiwe vamohi na sidadila yatongiwaga.>>

¹⁶ Lroti agawandeliwe, ohoromaga dodoma. Mbwenye na tangaranga da Yehova alombwanale kohomuweta ndanda, vamohi na muhiyanaye, na anaye ambinlene, aliwa adowana unde wa sidadile.

¹⁷ Kagavenyilemo musidadi mule, mungelro mmohi ohawandelaga, liye ira: <<Inafwanela mutawe ira muwombole vingumi dinyu! Kamuing'ane mundulri nne kamuimele ilambo yatene yotandeleya ila. Inafwanela mudowe mwatawele mmwangoni ira muwombowe eto mwahafwanyiwe.>>

¹⁸ Evale Lroti ohawakula angelro ale eraga: <<Andimuwa nnouvepani ira yahakale eno.

¹⁹ Nyo muhudifwewela murima miyo dagali namalaba wenyu, muhuvulusa ingumi yaga na zivela wenyu wororomeleya. Miyo mbwenye ira ditawele mwangoni kavili jowandeya mwasiwa nnatawa ira dera ditawele mwangoni, ubure unadifwanye wewule, dikwe.

²⁰ Kaing'anani, imwana sidadi ile iwandamenle na vili hiyo va. Kahi inene. Nnauvepani ira ditawele wewule ira divuluwe.>>

²¹ Evale mungelrole ohomuwakula eraga: <<Tabo. Miyo dihirumela yovepa yawo, kannatumeya mwana sidadi iwongile we ile.

²² So ubaranye ira utawele wewule, mwasiwa miyo nnaudedihege weyo ufiye para dirome laba mabasaga.>> Na mwasa wenne, sidadile inaitaniwa Zowari [ku wonga ing'onong'ono].

²³ Mulombwana Lroti ohofiyaga ilambo ya Zowari nzuwa nikumaga wene.

Tolotchiwa wa Sodoma na Gomora

²⁴ Evale Yehova ohorumbwiha zulu mabwe onuka otanganiha na munlo, roma morihedaga sidadi ya Sodoma na Gomora.

²⁵ Mwa enne Yehova ohobwanyula sidadi dile na ndabo natene nawandamannena wewule. Ohapa atu atene kafwanyeya mwemule eto ohotolotcha jomela jatene.

²⁶ Mbwenye mwadi Lroti, ohoing'ana mundulri. Againg'anne mundulri, ohosanduwaga kala iruwa ya mwinnyu.

²⁷ Mabebehi amohive anne, unde utchaga Abarahamu ohomaruwa adowaga nimburo nenne natapanya liye na Yehova.

²⁸ Againg'anne pandi ya Sodoma na Gomora na ilambo yatene yenne, ohoonaga mirambo da utchi digwelaga nnga utchi wa muhofuni.

²⁹ Mbwenye Mulugu agudjulaga sidadi da ilambo yenne, ohomuumbuwela Abarahamu, nona ohonvulumutcha muzuliye Lroti amukumihagamo musidadi mwemo mwakaletcha liye ahanatolotche sidadi dile.

Muselu wa ahima a Lroti

³⁰ Lroti na mwasa oova kala sidadi ya Zowari, ohovenyaga vamohi na ahimaye ambinli, aliwa dowa kala mwangoni. Evale ohodowaga liye roma kala munifukweni vamohi na ahimaye ambinli anavihiyana ale.

³¹ Siku nimohi mwana Lroti wa mulukuluwa ohowongaga na mbalaye wa ng'onong'ono ule, liye ira: <<Babihu eni uhumala ulula eto mwilamboni muli hiyo muno kamuli mulombwana nne mmohi ira anitele nnga jinaireya mwilamboni mwatene.

³² Ndowe ninvahe babihu vinyu ira alrezelre. Amala lrezelra, hiyo nidowe namugonena. Nera eno, nnowanda akana ahima, nikoye nlogo na papa ira nahadimele.>>

³³ Kagawongile enne, isi imohive yenne kohonvaha babiwa vinyu, liye fiyeda mwezo olrezelra. Agalrezenlre mwana wa mulukulu ule ohodowa gona na babaye. Mulombwana Lroti na mwasa olrezelra bure, kaonnewo jatene jejile jiireyaga.

³⁴ Mmetcheloni muwa mwana wa mulukulu ule ohowongaga na mung'onong'ono waye eraga: <<Miyo mahiyu dihigona na papa. Inafwanela peno nimulrezelrihe ira na wenne udowe wagone na liye mahiyu vano ira niwande abala ahimihu, niwande koya nlogo na papa ira nahadimele.>>

³⁵ Mahiyu anne kohomulrezelriha mulombwana Lroti akoka na vinyu, nomala eno mwana wa ng'onong'ono ule na liyene ohodowa gona na babaye. Na fendo yanembinli yenne mulombwana Lroti kaonnewo jatene jejile jiireyaga.

³⁶ Mwa enne ahima ambinlene kohokana vambani muwari mogona na babiwa.

³⁷ Mulukuluwa ohombala mwana wa mwanapongwe, liye nvaha nzina na Mowabe. Mowabe gu nikolo na akuda Mowabe anno kaliwove fiyeda siku na peno.

³⁸ Mwana wa ng'onong'ono ule eto na liyene ohombala mwanaye wa mwanapongwe, liye nvaha nzina na Beni-Ami. Beni-Ami gu babi wa nlogo na aAmoni, anno kaliwove fiyeda siku na peno.