Jenesesi 16 - Mazu Otchena a Mulungu

Muselu wa Agari muzari wa Sarayi

¹ Mwa tempu yenno Sarayi ali ahanakayena mwana na Abaramu. Mbwenye vande vale Sarayi ohomukana muzari mmohi wa muhiyana eriwa Agari, wenno ali nkuda Ijipitu.

² Mwa enne Sarayi ohomuwongana mamunaye Abaramu ira: <<Voira Yehova unadikameliha bala, inafwanela weyo umutukule muzari waga Agari, umugonegena, dione akala miyo nnowanda kana ahima muwari mwa liye.>> Evale Abaramu ohorumela yowonga ya muhiyanaye Sarayi.

³ Mwa enne Sarayi mwadi Abaramu ohomutukula muzaraye Agari wenno afwanyeya agali nkuda Ijipitu, liye nvaheda mamunaye Abaramu ira akale muhiyanaye wanembinli. Jejo jaireyile Abaramu agatamenle Kana, vagamanle yaka kumi.

⁴ Evale Abaramu ohoroma mugonana Agari fiyeda liye kana vambani. Evale Agari agaonne ira: <<Dihikana vambani>>, ohoroma mulramwisa sinyoraye Sarayi.

⁵ Mwa enne Sarayi ohowongaga na mamunaye Abaramu eraga: <<Jabure jatene jidiireyele jikale na weyo! Tchoira miyo duhuvaha muzaraga Agari ira weyo umugonena eto vire liye akana vambani uhuroma dilramwisa. Mbwenye Yehova gunanitonge muwari mwa weyo na miyo.>>

⁶ Evale Abaramu agavwile mazu anne ohomuwakulaga muhiyanaye Sarayi eraga: <<Umuirena inafuna we. Mwasiwa Agari gu muzarawo wenno unafwanyeya mmandani mwawo.>> Evale Sarayi agavwile yowakula ya mamunaye, ohoroma muirela jabure muzaraye Agari ule. Mwa enne Agari ohofiyeda tawa na mwasa wa ubure aireliwa liye.

Mungelro ohomuwandela Agari ira awelele vande va sinyoraye

⁷ Agari agali muwari motawa, Mungelro wa Yehova ohomutwanyuwela mukokolani emule wandamelana isime yowenda, ndila yodowa Suri.

⁸ Evale mungelrole ohonfukaga Agari ira: <<Agari muzari wa Sarayi! Unakumela waani eto unaya waani?>> Agari ohomuwakulaga eraga: <<Miyo nnamutawa sinyoraga Sarayi!>>

⁹ Evale Mungelro wa Yehova ohomuwandelaga eraga: <<Uwelele wa sinyorawo wakoka wene, mbwenye wadowa, waviyevihe, unvwelelege.>>

¹⁰ Mungelro wa Yehova ohomuwandelagave Agari eraga: <<Miyo nnoaindjiviha ahimawo a musogolro fiyeda aliwa kahawandege kontareya na mwasa oindjiva.>>

¹¹ Mungelro wa Yehova ohomuwandela eto ira: <<Weyo vambani unna we, unombala mwanapongwe. Wagambanle, unvahe nzina na Jomayili, mwasiwa Yehova uhuvwa kuwa wawo muwari mwa goyi. [Nzina na Jomayili ku wonga Mulugu unovwa].

¹² Liye unakalege nnga buru wa mukokolani. Unerege wana na atu atene eto atu atene anerege wana na liye. Eto liye kanakana vwanana na abalaye.>>

¹³ Noira enne, Agari ohomuitana Yehova wenno awonga na liye na nzina noira: <<Nyo muli Mulugu odiona.>> Liye awongele eno mwasiwa liye aumbuwela ira: <<Na ibaribari miyo dihimuona wenno unadiona malambo matene.>>

¹⁴ Na mwasa wenne, isimele yaitaniwa Isime ya Beri-Layi-Royi. [Ku wonga Isime ya Wenno Unna Ingumi eto Unadiona]. Isimele inafwanyeya vari va Kadeji na Beredi.

¹⁵ Evale Agari ohombala mwanapongwe na Abaramu. Evale Abaramu ohonvaha mwanole nzina na Jomayili.

¹⁶ Abaramu tempu ambala liye Jomayili na muzari waye Agari, anna yaka 86.