Jenesesi 1 - Mazu Otchena a Mulungu

Pandutchiwa wa jatene

¹ Voroma vene, Mulugu ohopandutcha ilambo ya zulu na ilambo ya vati.

² Mbwenye Mulugu agapandutchile, ilambo ya vati yali yahanasakanyedeye eto kamwalive yengo. Tchoira ilambo ya vati yohozala mahindje odiha. Eto ilambo yatene yohokana isi ilukulu. Mwa ora yenno, Munemba wa Mulugu oviravira vazulu va mahindje.

³ Evale Mulugu ohowonga ira: <<Wareya ukalewo!>> Evale wareya wohokalawo.

⁴ Noira enne, Mulugu ohoona ira: <<Wareya kwa pama.>> Muwari mowareya mule, ohogawamo wareya na isi.

⁵ Mulugu ohovaha wareya nzina na ntana, isi ohovaha nzina na mahiyu. Noira eno, yohozawo isi, unde tcha. No nali siku noroma.

Siku nanembinli

⁶ [Siku nanembinli] Mulugu ohowonga ira: <<Vikale madilre zela mahindje ira mahindje amohi kakale zulu, mahindje amohi kakale vati.>>

⁷ Mulugu ohosakanya ira pandi imohi ikale mahindje a zulu, mahindje amohiwa kakale mwilamboni ya vati ira vihale nimburo eno vari viwa. Mwa enne yohoireya nnga mwafunele liye.

⁸ Nimburo nali vari va mahindje a zulu na mahindje a vati, Mulugu ohovaha nzina na zulu. Noira eno, yohozawo isi, unde tcha. No nali siku nanembinli.

Siku naneraru

⁹ [Siku naneraru] Mulugu ohowonga ira: <<Mahindje a ilambo ya vati kagumanele nimburo nimohive ira nioneyege nimburo noumma.>> Evale yohoireya nnga mwawongele liye.

¹⁰ Nimburo noumma nne, Mulugu ohovaha nzina na teya. Nimburo na mahindje kagumanne nne, ohovaha nzina na bara. Agairile eno, Mulugu ohoona ira tchapama.

¹¹ Evale Mulugu ohowonga ira: <<Mwilamboni ya vati nnafuna teya imelege jomela. Muwari mwa jomela jile, jikalemo jalo jovaha mbewu eto dikalemo mitengo dokana jovaha eto jovaha jiwa jikayegena kongolo diwa ira kada yomela imelege na ikalelo yaye yaye.>> Mwa enne yohoireya nnga mwawongele liye.

¹² Teya yohomela jomela. Muwari mwa jomela jile johooneya jalo jovaha mbewu na mitengo dovaha jalo jokana kongolo diwa. Kada yomela yohokana yovaha ya ikalelo yaye yaye. Agairile eno, Mulugu ohoona ira tchapama.

¹³ Noira eno, yohozawo isi, unde tcha. No nali siku naneraru.

Siku nanennayi

¹⁴ [Siku nanennayi] Mulugu ohowonga ira: <<Jikalewo jomoneya nimburo na zulu ira jigawe ntana na mahiyu. Jomoneya jile jitonyihedege matempu na malambwiwa na yaka diwa.

¹⁵ Jomoneya jile jikalege nimburo na zulu ira jimoneyege ilambo ya vati.>> Mwa enne yohoireya nnga mwawongele liye.

¹⁶ Eto Mulugu ohosakanya jomoneya mbinli jilukulu. Yomoneya imohi ilukulu inairiwa nzuwa ira imoneyege na ntana. Yomoneya imohiwa ing'onong'ono inairiwa mwedi ira imoneyege na mahiyu. Eto Mulugu ohosakanya nyenyedi.

¹⁷ Jatene jejo Mulugu ohela nimburo na zulu ira jimoneyege ilambo ya vati,

¹⁸ eto ira jikalegewo ntana na mahiyu ira jigawege moneya na isi. Agairile eno, Mulugu ohoona ira tchapama.

¹⁹ Noira eno, yohozawo isi, unde tcha. No nali siku nanennayi.

Siku nanetanu

^20-21 [Siku nanetanu] Mulugu ohowonga ira: <<Mwiko mukale somba dohiyana-hiyana na jatene jene johiyana hiyana jinafuna wendaga emo. Jikale pwi pwi.>> Vevale na ibaribari dohooneya somba da mbara dile, dilukulu, ding'onong'ono na jatene jene jinawenda mwiko, kada yengo na ikalelo yaye yaye. Tempu imohive, Mulugu ohowonga eto ira: <<Nimburo na zulu ukale mbalrame dohiyana-hiyana na jatene jene johiyana hiyana jovava zulu. Jikale pwi pwi.>> Vevale na ibaribari dohooneya mbalrame dile, dilukulu, ding'onong'ono na jatene jene nnavava zulu, kada yengo na ikalelo yaye yaye. Agairile eno, Mulugu ohoona ira tchapama.

²² Evale Mulugu ohoreliha jatene ejile eraga: <<Somba direlane eto diindjivihane mmahindjeni a bara. Eto mbalrame diindjivihane mwilamboni.>>

²³ Noira eno, yohozawo isi, unde tcha. No nali siku nanetanu.

Siku nanetanu na nimohi

²⁴ [Siku nanetanu na nimohi] Mulugu ohowonga ira: <<Mwilamboni mukale anavinyama ohiyana-hiyana, kada mwanainyama na ikalelo yaye yaye. Mukale anavinyama a vande eto mukale anavinyama a mukokolani. Mukale anavinyama alukulu na ang'ining'ini, jomburunuwa, na anavinyama atene anno anafwanyeya mwilamboni ya vati, kada mwanainyama na ikalelo yaye yaye.>> Mwa enne yohoireya nnga mwawongele liye.

²⁵ Mulugu ohosakanya anavinyama a mukokolani na a vande, kada mwanainyama na ikalelo yaye yaye. Mulugu eto ohosakanya jomburunuwa jatene ja vati, kada yomburunuwa na ikalelo yaye yaye. Agairile eno, Mulugu ohoona ira tchapama.

Pandutchiwa wa atu

²⁶ Eto Mulugu ohowonga ira: <<Ndoweni nimusakanye mutu olingana na hiyo, ofwalrafwana na hiyo, ira atongege somba da mbara, mbalrame da zulu, vinyama, na jatene ja ilambo ya vati na jomburunuwa jatene jinamburunuwa mwilamboni ya vati.>>

²⁷ Mwa eno, Mulugu ohompandutcha mutu olingana na liye. Mwa ibaribari Mulugu ohompandutcha mutu olingana na liye. Ohompandutcha mulombwana na muhiyana.

²⁸ Evale Mulugu ohareliha aawongagana eraga: <<Mubalihane, muindjivihane, muzale ilambo ya vati. Mukalege ambwiye a jatene. Mutongege somba da mbara, na mbalrame da zulu, na vinyama datene dokana ingumi nnawenda mwilamboni ya vati.>>

²⁹ Eto Mulugu ohawandela atwale eraga: <<Kaing'anani miyo nnouvahani udja watene unadjege nyo. Munerege dja jalo jatene jinafwanyeyana mbewu na jovaha jatene ja mitengo dili datene.>>

³⁰ Eto Mulugu ohawandela atwale zela jodja jafuna djaga vinyama, liye ira: <<Zela anavinyama ali atene, roma anavinyama a mukokolani, nari mbalrame datene dovava zulu, nari jowambaza, malringana mwanainyama uli watene ovuma, okana ingumi, jodja jiwa miyo nnaavaha jengo jomela jititi ira kadjege.>> Mwa enne yohoireya nnga mwawongele liye.

³¹ Evale Mulugu ohoona jengo jatene japandutchile liye. Agaonne, Mulugu ohowonga ira: <<Jatene jene jipandutchile miyo, jihikala pama mayiji.>> Noira eno, yohozawo isi, unde tcha. No nali siku nanetanu na nimohi.