Eberewu 3 - Mazu Otchena a Mulungu

Yesu gu mundimuwa omukwaranya Mozeji

¹ Nona nyo abalaga otchenihiwa, afwaga oitaniwa na Mulugu uli zulu, inafwanela muhele joumbuwela jenyu wa Yesu, wenno uli namarumiwa eto mundimuwa wa anamakuta unamurumela hiyo vatando.

² Sawasawa nnga Mozeji ali ororomeleya ahindaga mabasa matene vande va Mulugu, Yesu na liyene ali ororomeleya muwari mohinda mabasa a wenno amuhambihile.

³ Eto fwanyeya ira Yesu ali mutu wapama ofwanela vahiwa undimuwa mukwaranya Mozeji. Mukwaranya uwa unakala nnga undimuwa unakana maliba manga nyumba. Fwanyeya ira maliba manga nyumba unokana undimuwa kwaranya undimuwa wa nyumba imangile liye.

⁴ Tchoira nyumba ili yatene ihikana wenno umangile, mbwenye maliba manga jatene gu Mulugu.

⁵ Fwanyeya ira Mozeji ali ororomeleya mwa mabasa anna liye osogolrelra vande va Mulugu nnga namalaba. Liye mabasaye ali hidedela umboni zela jengo Mulugu afuna liye za irana sogolro.

⁶ Mbwenye Kiristu kahi namalaba bahi. Liye eto gu Mwana ororomeleya osogolrelra vande va Mulugu. Fwanyeya ira akala hiyo nnomuhideda pama wenno nnamuroromela hiyo, akala nnowanda titimiha zela inaing'anela hiyo, nyumba ya Mulugu gu hiyene.

Atu ohomuroromela Yesu kiza kavolowa muwari movuma Mulugu unavaha liye

⁷ Nona inafwanela niumbuwele pama yokokomeza Munemba Otchena unawonga liye ira: <<Peno mwavwa nizu naye,

^8-9 kamuummihe mirima denyu nnga jairile ababinyu ora yadiruniha atu, siku nadixixile atu muisalesaleni, kaonagave joira jaga jaira miyo yaka 40.

¹⁰ Na mwasa wenno miyo dohotakaleliwa na atu anne, fiyeda miyo wonga ira: <Aliwa annanave viringana mmirimani mwewa. Aliwa makalelo anafuna miyo kinawanda iziwa.>

¹¹ Eto muwari mwa uwali wanna miyo, miyo doholumbela ira: <Atu anne kiza eto kavolowa muwari movuma unaavaha miyo.> >>

¹² Polre polre abalaga tawiha ira muwari mwa nyo unakalemo mutu mmohi okana murima otakala, ohororomela wenno unafuna amubalrabanduwihe na Mulugu Okalawo.

¹³ Mbwenye yapamiwa inafwanela kada mutu amukokomezege nfwaye malambo matene na tempu yenno inaitaniwa peno ira muwari mwa nyo ahakalevo mutu okana murima oumma na mwasa wa jonyenga jinafwanyeya muwari mwa jotega.

¹⁴ Tchoira hiyo nihikana pandi na Kiristu nakala oimelene fiyeda makutulo na nroromelo nehu nanna hiyo voroma vene.

¹⁵ Mwasiwa gwenno mazu a Mulugu mMazuni kawongaga ira: <<Peno mwavwa nizu naye, kamuummihe mirima denyu nnga jairile makolo enyu tempu yamurunihile atu Mulugu.>>

¹⁶ Kodi ale kavwile eto karunihile kafwanyeya kagali ani? Ali anno kakumile muIjipitu muwari mosogolrelriwa na Mozeji.

¹⁷ Aliwa eto kamutakaleliwihile Mulugu yaka 40 muwari momutegela, liye fiyeda atolotcha, fiyeda maningo ewa fwanyeyaga kambwalra kambwalra muisalesaleni.

¹⁸ Vevale Mulugu ohalumbelela zela ale kahanvwelenle ira: <<Nyo kamunavolowa movuma mwaga.>>

¹⁹ Fwanyeya ira nnowanda ona ira aliwa tchawandile volowa movuma mwa Mulugu na mwasa ohomuroromela.