2 Samuweli 4 - Mazu Otchena a Mulungu

Piwa wa Isbozeti mwene wa Izarayeli

¹ Isbozeti mwana Sawuli agavwile ira: <<Eni Abineri uhukwa sidadi ya Eboroni!>>, kopolo daye dohommalela eto aIzarayeli atene kohokukumuwa valukulu.

² Mwa tempu yenne Isbozeti mwana Sawuli ule ohakana asogolrelri ambinli kasogolrelra ja umadjuba. Mmohi aitaniwa Bana, mmohiwa aitaniwa Rekabe. Aliwa ambinlene kali ahima a mulombwana Rimoni wa sidadi ya Beroti. (Sidadi ya Beroti yabalriwa nnga sidadi ya akuda Benjami.

³ Tchoira akuda Beroti annyiwene kere tawela sidadi ya Jitayimi, aliwa kalaga wewule nnga atu oza fiyeda siku na peno. Mwa enne akuda Benjami kohalana sidadi ya Beroti.)

⁴ Fwanyeya ira tempu yakwa mwene Sawuli na mwanaye Jonata, ohokalawo mutu akumile Jezereli wali anyakondo a aIzarayeli, dowa awandelaga atu zela makalelo aIzarayeli kagondjihiwe atu kondoni. Ora yenno Jonata ohomukana mwanaye aitaniwa Mefibozeti. Mefibozeti ule anna yaka tanu. Evale makayaya wenno amuleletcha Mefibozeti ule, agavwile zela ukwa wa Jonata na babaye Sawuli, ohomutukulaga mwanole, liye mutawagana. Muwari motawa mule, na mwasa obaranya, mwanole ohomoraga, liye fiyeda rangala kala mutu ohowanda wenda.

⁵ Siku nimohi Rekabe na Bana anno kali ahima a Rimoni nkuda Beroti, kohovenyaga ora ya ntana, aliwa dowa vande va mulombwana Isbozeti. Kagadowile, kanfwanyilege mmba agonaga nnga veretcha liye molemelela ora ya ntana yafiya.

^6-7 Evale kohodowaga volowa mmba mule nnga kafuna katukule tirigu. Kagavolowile, kohonfwanyaga Isbozeti agali kwartuni waye, agonaga vakamani vaye. Evale kohodowa, aliwa mulata mbani, liye kwa. Nomala eno, kohomugwadaga muru, aliwa mutukula murule, aliwa tawa. Mwa enne kohoromaga wenda mahiyu atene anne ndila yodowa Araba, kadowaga wa Davi.

⁸ Evale kohofiyaga sidadi ya Eboroni, aliwa dowana muru wa Isbozeti ule vamentoni va Davi, aliwa ira: <<Hiyo nihimuzana muru wa Isbozeti mwana Sawuli wenno ali mwidaninyu, wenno afunetcha joupani. Peno mbwenye Yehova uhuweliha kunyakunya ya Sawuli vamohi na ahimaye atene para nyo mbwiyeni so mwene!>>

⁹ Mbwenye Davi ohomuwakulaga Rekabe na mbalaye Bana, ana Rimoni, nkuda Beroti, liye awandela eraga: <<Miyo nnawonga vamentoni va Yehova okalawo wenno awandile diwombola mmakatamihoni mwaga mwatene ira nyo munokwa!

¹⁰ Malambo a mundulrimu ohokalawo muzombwe wenno azilege diwandela zela ukwa wa mwene Sawuli ira: <Ummarihile gu miyo>, aumbuwelaga ira azela diwandela yengo yapama. Mbwenye agadiwandenle, miyo dohompa sidadi ya Zikalagi. Yotambilra yaye zela mazu azilena liye diwandela ali yenno! Eto aligi nyo atu abure, mudowa mwanfwanya mutu mmba, kwartuni waye, mumpela vakamani vaye ahategileve yengo,

¹¹ kodi miyo nnafuna dutongeni avi? Miyo nnoutongani ira mupiwe ira mwahafwanyeye mwilamboni ya vati na mwasa ovuviha sangiri na mulombwana Isbozeti!>>

¹² Noira enne, Davi ohawandelaga anyakondwaye ira kampe mulombwana Rekabe na Bana. Anyakondo ale kohapaga, aliwa agwada manda na manyalo, aliwa adowana atomeya wandamelana vatankini yafwanyeya Eboroni wewule. Nomala eno, kohomutukula muru wa Isbozeti ule, aliwa dowa mukoya masiye wewo wakoyiwe Abineri, sidadi ya Eboroni yenne.