2 Samuweli 21 - Mazu Otchena a Mulungu

Muselu wa aJibeyawu na ahima a mwene Sawuli

¹ Tempu ya mwene Davi wohooneya ndala yamanle yaka taru doharana dene. Muwari mwa enne mwene Davi ohonfukaga Yehova na mwasa wa ndala yenne. Evale Yehova ohomuwakulaga, liye ira: <<Ndalela ikalelewo na mwasa wa Sawuli vamohi na atu a vande vaye. Mwasiwa Sawuli ohapa akuda Jibeyawu.>>

² Fwanyeya ira akuda Jibeyawu ale tchali a nlogo na Ana Izarayeli. Mbwenye kali atu a vang'ono ohala a aAmore. So Ana Izarayeli kere sakanya yopangana yowandana na aliwa. Mwa enne aliwa kagamanle sakanya nipangano nne, mwene Sawuli ohovenya, dowa roma wanaga na aAmore ale ira aape ira ilambo yatene yewa ikale ya aIzarayeli na aJuda. Na mwasa wenno, Yehova ohotakaleliwa, liye ziha ndala mwilamboni. Mwa enne mwene Davi agavwile mazu anne, ohaitanihaga aJibeyawu, liye mala awandelamo jatene.

³ Evale Davi ohafukaga, liye ira: <<Nnga vireyile atu eno, nyo munafuna ira miyo duireleni nni? Tchoira miyo nnafuna duireleni upama uli watene munafune nyo ira mulando wehu amalihiwe, nyo muwande nireliha hiyo atu a Yehova!>>

⁴ Evale aJibeyawu ale kohowakulaga, aliwa ira: <<Hiyo mulandu unna hiyo na mwene Sawuli vamohi na abalaye ira umale, inafuna hiyo kahi parata nne oru nari. Eto hiyo kannafuna mpa nne mutu mmohi wa Izarayeli, nari.>> Evale mwene Davi ohafukaga eraga: <<Nnga munafuna ira nuireleni nni?>>

^5-6 Evale aliwa kohowakulaga keraga: <<So mbwenye nnafuna mwaatukule alombwana atanu na ambinli muwari mwa ahima a mulombwana Sawuli wenno avendetcha jonitolotcha ira nahawande fwanyeya mwilamboni mwa aIzarayeli, ira hiyo nidowe naamangelele, aliwa kakwe vamentoni va Yehova Jibeya wewo wakala Sawuli, wenno asakulriwe na Yehova!>> Evale mwene Davi ohowakulaga eraga: <<Kavali makani, miyo nnouvahedani!>>

⁷ Davi mbwenye ohomuhiya mulombwana Mefibozeti, mwana Jonata, Sawuli muzuliye na mwasa wa yolumbela yasakanyile Jonata mwana Sawuli na Davi vamentoni va Yehova.

⁸ Mwa enne mwene Davi ohovenyaga, liye dowa atukula ahima a anapongwe ambinlene a mwana muhiyana Rizipa mwana Ayiya, anno aabanle liye na Sawuli, anno kaitaniwa Arimoni na Mefibozeti, vamohi na ahima a anapongwe atanu a Merabe mwana Sawuli, anno aabanle liye na Adiriyeli mwana Barizilayi, wenno ali nkuda Meyola.

⁹ Ohatukulaga ahima atanu na ambinli ale, liye dowa avaheda akuda Jibeyawu. Akuda Jibeyawu ale kagaatukunle, kohadowagana mwangoni, aliwa amangelela vamentoni va Yehova. Mwa enne atene atanu na ambinli ale kohokwaga vamohi mwangoni wewule. Jejo jaireyaga maromelo ohanda jengo, ku wonga sevada aromaga wene rendiwa.

¹⁰ Noira enne, muhiyana Rizipa mwana Ayiya ule, ohotukulaga sakwi, liye dowana tandela vanibweni wewule wakwile ahimaye ambinli na alombwana amohiwa atanu ale, roma gonelaga wewule, romela tempu ya mahandelo fiyeda siku narumbweliwege muzongwe atu atanu na ambinli kakwile ale. Eto liye na ntana kahiya ira mbalrame dovava zulu dingovolege maningo a atwale, nne na mahiyu kahiya ira anavinyama kazevo katakunege.

¹¹ Mwa enne Davi ohowandeliwaga jejile jaira muhiyana Rizipa, mwana Ayiya, wenno ali Sawuli mwendaye.

¹² Davi agavwile enne, oharumaga atu ira kadowe sidadi ya Jabeji-Jileyadi ira katukule makuva a Sawuli na makuva a mwanaye Jonata. Tchoira Sawuli na Jonata kagapiwile na aFilistewu ilambo ya Jilibowa, akuda Jabeji-Jileyadi badowile sidadi ya Bete-Seya, aliwa dowa mozemba, tukulavo mitembo diwa varampani vevo vaatomeyile aFilistewu.

¹³ Evale Davi ohotukulaga makuva a Sawuli na makuva a mwanaye Jonata eto agudela makuva a ana Sawuli atanu na ambinli kamangeleliwe ale.

¹⁴ Mwa enne kohotimbelaga makuva a Sawuli ale na makuva a Jonata mwilamboni mwa Benjami, tatamo ya Zela wewo wakoyiwe mulombwana Kixi Sawuli babaye. Fwanyeya ira aliba rumiwa ale kohoirana jatene nnga mwawongele mwene Davi. Jagamanle ireya enne Mulugu ohorumelaga jolobela ja atu zela ndala yafwanyeya mwilamboni mule.

Kondo da aIzarayeli na aFilistewu

¹⁵ AFilistewu kohowelelagave kana kondo na aIzarayeli. Evale mwene Davi ohovenyaga vamohi na anyakondo aye, aliwa dowa wana na aFilistewu. Evale kagawanile tempu ilukulu, mwene Davi ohowaheyaga.

¹⁶ Eto ohokalawo nFilistewu mmohi aitaniwa Isbi-Benobe. Mulombwana Isbi-Benobe ule abaliwe muibalini mwa atu alukulu olapa. Liye ohokana mwanango wa mukuwa anyemela kilu taru eto ohokana supada nixa. Liye ohovenyaga, liye za ira awane na mwene Davi.

¹⁷ Mbwenye mulombwana Abizayi mwana Zeruwiya, ohomukamihedaga mwene Davi, liye mulata Isbi-Benobe ule, fiyeda liye mpa. Noira enne, anyakondo atene a Izarayeli koholumbelaga zela mwene Davi keraga: <<Eni kuma peno dowa sogolro hiyo nadowaga kondoni, nyo kamuniharege. Tawiha ira munatimihe wareya wa Izarayeli!>>

¹⁸ Jagaireyile enne, wohooneya eto kondo imohiwa sidadi ya Gobe, aIzarayeli na aFilistewu. Muwari mowana, mulombwana Sibekayi, wenno ali nkuda Husati, ohompaga nFilistewu mmohi eriwa Safe, mulombwana abaliwe muibalini mwa atu alukulu olapa ale.

¹⁹ Noira enne, wohokala eto kondo imohiwa aIzarayeli na aFilistewu ilambo ya Gobe yenne. Evale mulombwana Eliyanani, mwana Jare-Orejimi wenno ali nkuda Beleme ohotukula mwanango mulukulu eto onyemela, liye mpana nFilistewu mmohi eriwa Goliya, nkuda Gate.

²⁰ Noira enne, wohooneya eto kondo imohiwa ilambo ya Gate. Wewule wohokala nFilistewu olapetchetcha anna jibuno tanu na imohi va kada ndanda eto tanu na imohi va kada nnyalo. Gumaniha jibuno jatene, kalaga jibuno 24. Liye eto abaliwe muibalini mwa atu alukulu olapa ale.

²¹ Evale liye ohozaga, roma apokihaga aIzarayeli. Mbwenye mwene Davi mbalaye Simeya mwanayiwa eriwa Jonata, ohodowaga liye mpa.

²² Atu annayi ale kakumile muibalini mwa atu alukulu olapa a Gate. Davi vamohi na anyakondwaye kohapa alombwana olapa ale.