2 Samuweli 20 - Mazu Otchena a Mulungu

Seba ohomutatamulela Davi madugudugu

¹ Mwa tempu yairaga atu enne, vevale vohokalaga mulombwana mmohi ohokana mabasa, mwana Bikiri wenno aitaniwa Seba, wa nlogo na Benjami. Mulombwana Seba ule ohoimbaga palraza awongaga eraga: <<Alombwana hiyo kaninna pandi na mwene Davi nne hiyo kannavahiwa jorayela vamohi na mwana Jese. Eni kada muIzarayeli avenye, adowege vande vaye!>>

² Mwa enne alombwana atene a Izarayeli kohovenyagavo vafwanyeya mwene Davi, aliwa muhara mulombwana Seba mwana Bikiri. Mbwenye alombwana a nlogo na Juda komuhara molimba murima mwene wewa Davi romela Jordawu ante Jeruzalemu.

³ Mwa enne mwene Davi agafiyile vande vaye Jeruzalemu, ohatukulaga ahiyanaye ang'ono kumi aahiyile liye ira kaing'anelege vande vale, liye dowa afungela mmba, aliwa kalagave mwemule. Liye eto nne mmba mule kavolowamo, so aavaha jodja bahi. Mwa enne ahiyanale kokalave ofungeliwene mmba mwemule nnga amakwele fiyeda siku nakwile atu.

Jowabe ohompa mulombwana Amasa

⁴ Jagaireyile enne, mwene Davi ohowongaga na mulombwana Amasa eraga: <<Udowe waagumanihe alombwana atene a nlogo na Juda muwari mwa malambo mararu, kaze wa miyo eto na wenne uze vamentoni vaga.>>

⁵ Evale mulombwana Amasa ohovenyaga, liye dowa awandela atu atene a nlogo na Juda. Eto muwari moawandela mule, ohodibeliwaga, liye kwaranyiha malambo mararu anno amuwandenle mwene Davi.

⁶ Evale mwene Davi ohomuwandelaga mulombwana Abizayi eraga: <<Peno Seba mwana Bikiri unafuna aniirele ubure hiyaniha na mulombwana Abisalawu. Uvenye tchineneva na anyakondo aga atene, murome muhara, tawiha ira liye unabaranye ira adowe sidadi yowerewerihiwa na muru ira anitawe.>>

⁷ Evale mulombwana Abizayi ohovenyaga vamohi na Jowabe na anyakondo aye, vamohi na aKereti, aPeleti, vamohi na alombwana atene a kopolo. Kohovenyaga muJeruzalemu mule ira kamuhare mulombwana Seba mwana Bikiri.

⁸ Evale aliwa kadowagave, kagafiyile vanibweni nlukulu nafwanyeya Jibeyawu, mulombwana Amasa ohozaga, liye gumana na aliwa. Mwa tempu yagumana atu ile, mulombwana Jowabe awarilege kamizaye ya kondoni na sintu eto ohokagana supada naye nasoledilege liye mmwinini mwaye. Kagumanaga, Jowabe ohotuxulaga supada nne, liye moriheda vati.

⁹ Mwa enne Jowabe ohowongaga na Amasa ule eraga: <<Kodi uli wapamene mbalaga?>> Eto ohindaga igabwa ya mulombwana Amasa na muwono waye odjana ira ambejari.

¹⁰ Mbwenye mulombwana Amasa kaonilege ira Jowabe ohidedaga supada na ndanda nimohi niwa nne. Evale mulombwana Jowabe ohomulataga Amasa mbani, mirimbo daye aliwa vayela kuma, fendo imohive yenne, liye vayela kwa. Evale Jowabe agampile mulombwana Amasa, ohomaruwaga na mbalaye Abizayi, aliwa dowagave musogolrove kamuharaga mulombwana Seba mwana Bikiri.

Goma wa mulombwana Seba

¹¹ Mbwenye mulombwana mmohi wenno afwanyeya muwari mwa anamalaba a mulombwana Jowabe ohodowaga imela vevale vakwile mulombwana Amasa eraga: <<Mutu wenne unaona ira: <Miyo nnamuhara Davi eto nnamuhara Jowabe, ifwanele amuhare mulombwana Jowabe kondoni!> >>

¹² Mwa enne mulombwana Amasa ohokalaga vandila evale, mutu watene wenne agali sangirive. Mwa enne munyakondo uli watene aviraga evale okana imela vevale ira amuing'ane mulombwana Amasa. Mbwenye muzombole agaonne ira: <<Atu atene kafiya eva anoimela na mwasa wa mulombwana Amasa ula>>, ohomutukulavo Amasa, liye mburulela mmambalo mwa ndila. Noira eno, liye tukula nguwo nkunelana.

¹³ Evale Amasa agakumihiwemo mundila mule atu atene kodowaga, kamuharaga mulombwana Jowabe kondoni ira kamuhinde mulombwana Seba mwana Bikiri.

¹⁴ Fwanyeya ira Seba ohoviraviraga muwari mwa malogo matene a Izarayeli afunaga nnga kamuhare liye, ante liye fiya sidadi ya Abeli-Bete-Maka. So mbwenye amuharile Seba ali akuda Bikiri bahi, aliwa volowa musidadi mule.

¹⁵ Jowabe na atwaye kagafiyile sidadi ya Abeli-Bete-Maka ile, kohoirindjaga sidadi yatene yenne na mwasa oira sidadile yawerewerihiwe na muru mulukulu. Mwa enne aliwa kohogudelaga teya pwi mmambalo mwa muru ule, aliwa gwelavo, roma bubudaga muru ule ira kawande bwanyula.

¹⁶ Evale kairaga enne, fwanyeya ira muwari mwa sidadi mule mohokalaga muhiyana mmohi eni wa toto. Evale muhiyanole ohoromaga akuwela eraga: <<Kavuruwanani, kavuruwanani! Mudowe mwamuwandele mulombwana Jowabe aze uno ira dimuwongena!>>

¹⁷ Noira enne, mulombwana Jowabe ohodowaga wa muhiyanole. Agadowile, muhiyanole ohonfuka ira: <<Kodi weyo uli mulombwana Jowabe?>> Liye ohowongaga eraga: <<He, gu miyene!>> Evale muhiyanole ohowongaga eraga: <<Muvuruwane yenno inafuna wonga miyo namalaba wenyu.>> Evale Jowabe ohowakulaga eraga: <<Kawongaga miyo nnavuruwana.>>

¹⁸ Evale muhiyanole ohoromaga wonga eraga: <<Wanle kawongetcha ira: <Mwafunaga zelru, mudowe mwavepe sidadi ya Abeli!> Evale kaza fuka zelru uno, makaniwa komala!

¹⁹ Eto miyo dili mutu ofuna murendele eto dili mutu ororomeleya munlogoni mwa Izarayeli! Nyo munafuna mutolotche sidadi imohi yororomeleya inafwanyeya muwari mwa Izarayeli. Nnga kodi mwasiwa gwa nni nyo funaga jogudjula ilambo ya Yehova?>>

²⁰ Evale mulombwana Jowabe ohowongaga na muhiyanole eraga: <<Nari. Ejo kajinawandeya! Miyo kadiza digudjula eto kadiza ditolotcha sidadila.

²¹ Inavenda miyo kahi jejo. So mbwenye nnanvenda mulombwana unaitaniwa Seba mwana Bikiri, wa ilambo ya mmwangoni da Efarayimi. Liye umurungunuwenle mwene Davi, liye tawa, za vitala musidadi mwemu. Hiyo nnafuna ira nyo munivahede liyene bahi. Mwaira eno nnowelela mundulri.>> Noira eno, muhiyanole ohowongaga eraga: <<Ukale unde wo, tchineneva hiyo nnompa mulombwana Seba, nivokele muru waye vazulu va muru uwerewerile sidadila!>>

²² Evale muhiyanole agamanle wonga mazu anne, ohodowaga roma awandelaga alombwana atene a musidadi mule na zelru daye. Noira enne, kohodowaga, aliwa mpa mulombwana Seba mwana Bikiri, aliwa ngwada muru waye, aliwa tukula murule, vokeda vazulu va muru wa sidadile, dowa morela unde wali Jowabe. Mwa enne mulombwana Jowabe agaonne muru wa Seba, ohoimbaga palraza. Agaimbile palraza anyakondo atene kohomwadeyaga, aliwa ihiya sidadile, kada mutu liye dowaga vande vaye. Eto mulombwana Jowabe ohorungunuwaga, awelelaga wa mwene Davi muJeruzalemu.

Mazina a atu kanna undimuwa kamulabaga mwene Davi

²³ Musogolrelri mundimuwa wa anyakondo atene a Izarayeli ali mulombwana Jowabe. Eto musogolrelri mundimuwa wa anyakondo atene a aKereti, vamohi na aPeleti ali mulombwana Benaya mwana Joyada.

²⁴ Eto musogolrelri wa mabasa okanyihediwa ali mulombwana Adorawu. Eto namalremba wa joireya ja umwene ali mulombwana Jozafa mwana Ailude.

²⁵ Namalremba madugumento ali mulombwana Seva eto mulombwana Zadoki na Abiyatare kali anamakuta.

²⁶ Eto namakuta mmohiwa wa mwene Davi ali mulombwana Ira nkuda Jarita.