2 Samuweli 2 - Mazu Otchena a Mulungu

Davi ohambihiwa ira akale mwene wa Juda

¹ Evale Davi agamanle nla zela ukwa wa Sawuli na Jonata, ohonfukaga Yehova eraga: <<Yehova, miyo podi wela ira didowe sidadi imohi ya Juda dakalege wewo?>> Evale Yehova ohomuwakulaga, liye ira: <<He, kavenya udowe!>> Liye ohonfukagave Yehova eraga: <<Nnga didowe sidadi tchivi?>> Yehova ohomuwakulaga, liye ira: <<Udowe sidadi ya Eboroni!>>

² Mwa enne Davi ohomaruwaga, liye dowaga Eboroni. Liye adowaga wewule, ohatukulaga ahiyanaye ambinlene, mmohi wenno aitaniwa Ainowa, nkuda Jezereli na Abigayeli, wenno ali mwadi marafula Nabali nkuda Karimele.

³ Eto ohatukulaga alombwanaye atene kawendetcha na liye, vamohi na ahiyaniwene na ahimiwene. Alombwanale ohadowana, aliwa kalaga tatamo dowandamelana Eboroni ule.

⁴ Noira enne, alombwana a Juda kagavwile ira: <<Eni mulombwana Davi uhuwelela mwilamboni mwa Juda mwakoka mwene emuno>>, kohomaruwaga, aliwa dowa muhambiha ira akale mwene wa Juda. Evale andimuwale kohomuwandela Davi ira: <<Mwene Sawuli agakwile, atu a sidadi ya Jabeji-Jileyadi bamutukunle Sawuli, aliwa dowa mukoya.>>

⁵ Mwa enne mulombwana Davi agaiziwile ejo, oharumaga alombwanaye angasi angasi, liye awandela ira: <<Mudowe sidadi ya Jabeji-Jileyadi mwaawandele atu anafwanyeya wewo muire: <Davi gunawonga ira: <<Yehova aureliheni na mwasa wa upama muirile nyo vosakanyeda maningo a mwene wenyu Sawuli!

⁶ Yehova auoniheni zivela waye ororomeleya! Voira muhusakanya upama mmukoyaga mwene Sawuli, na miyene nnafuna duireleni upama.

⁷ Eto yengo imohiwa inauwandelani miyo tchi ila. Eni mwene wenyu Sawuli uhukwa. Vire liye akwa, akuda Juda kadihambihile miyo ira dikale mwene wewa. Nona miyo dafuna ira na nyenne mukale a kopolo eto olimba murima muwari modihara miyo, dikale mwene wenyu!>> > >>

Isbozeti ohambihiwa ira akale mwene wa aIzarayeli

⁸ Fwanyeya ira Sawuli agakwile, Abineri mwana Neri wenno ali musogolrelri mundimuwa wa anyakondo a mwene Sawuli, ohomutukula Isbozeti mwana Sawuli, liye mudowana sidadi ya Mahanayimi, kombela ya muhindje Jordawu.

⁹ Kagali wewule Abineri ule omuhambiha Isbozeti ira akale mwene wa akuda Jileyadi, Asuri, Jezereli, Efarayimi, nlogo na Benjami, na ilambo yatene ya Izarayeli.

¹⁰ Tempu yenne Isbozeti mwana Sawuli ahambihiwaga umwene anna yaka 40. Evale liye agahambihiwe, ohoroma atonga aIzarayeli fiyeda yaka mbinli agalive mwilamboni mwa Mahanayimi mule. Mbwenye Isbozeti tempu yaatonga liye aIzarayeli, mwa tempu yenne atu a muibalini mwa Juda katongiwa na Davi.

¹¹ Davi ohatonga akuda Juda sidadi ya Eboroni yaka tanu na mbinli na medi mitanu na mmohi.

Kondo zela malogo a Izarayeli na nlogo na Juda

¹² Siku nimohi mulombwana Abineri mwana Neri ohovenyaga vamohi na anyakondo a mulombwana Isbozeti, aliwa kuma sidadi ya Mahanayimi ule, aliwa dowa Jibeyawu.

¹³ Eto tempu imohive yenne Jowabe wenno mmaye ali Zeruwiya vamohi na anyakondo a Davi, kohomaruwaga, aliwa dowa gumana na anyakondo afwiwa ale, wandamelana tanki ya mahindje ya Jibeyawu. Kagagumanne, anyakondo ala kohokalaga pandi ya wu, anyakondo ala aliwa kala pandi ya wu, tankile aliwa ihela vari.

¹⁴ Mwa enne Abineri ohomuwongana Jowabe ule, liye ira: <<Ndowemo naasakulre azombwe agasi angasi muwari mwa anyakondo awo na anyakondo aga, naawanihe ira naaone analimba!>> Evale Jowabe ohowakula, liye ira: <<Kambe.>>

¹⁵ Evale kohasakulra anyakondo kumi na ambinli a nlogo na Benjami anno katongiwa na mwene Isbozeti mwana Sawuli eto kohasakulraga anyakondo amohiwa kumi na ambinli a Davi.

¹⁶ Evale aliwa kohoromaga wana. Fwanyeya ira wana uwa, kada mutu amuhindilege muru wa nfwaye eto na nfwaye wenne liye muhinda muru wa nfwaye, atenene aliwa latana na masupadiwa. Nfwaye amulataga nfwaye eto na nfwaye wenne amulataga nfwaye. Mwa enne atenene kohokwa ora imohive. Na mwasa wenno nimburo nne kohovaha nzina na Helikati-Hazurimi. [Ku wonga munda wa mimbene doirwa]. Nimburo neno nnafwanyeya wandamelana ilambo ya Jibeyawu.

¹⁷ Jagaireyile enne yohotatamuwaga kondo yohokala ya masika. Evale anyakondo a Davi kohomugondjiha mulombwana Abineri na anyakondo a Izarayeli aasogolrelra liye.

¹⁸ Mwa tempu yawanaga atu ile, vohokalaga ana Zeruwiya araru a anapongwe anna liye: Jowabe, Abizayi na Azayeli. Aliwa atene kali anyakondo a Davi. Eto mulombwana Azayeli ali mutu otamanga bure nnga nase atamangaga mukokolani.

¹⁹ Mwa enne mulombwana Abineri na anyakondo atene a mulombwana Isbozeti katawaga, Azayeli ule ohoromaga mutamangiha mulombwana Abineri ira ampe. Liye mutamangihagave, mutamangihagave, mutamangihagave.

²⁰ Mwa enne Abineri ohoing'anaga mundulri, liye nfuka ira: <<Weyo unaditamangiha kuli Azayeli?>> Liye ohowakulaga, liye ira: <<He, gu miyo Azayeli!>>

²¹ Evale Abineri ohomuwongana Azayeli akoka, liye ira: <<Kuditamangihege miyo. Udowe wamutamangihege muzombwe mmohiwa. Tchoira wampa, unowanda muwaka jengo jinna liye.>> Azayeli mbwenye kafunnege vwa. Ohokalelagave ntindi amutamangihagave.

²² Evale Abineri ohomuwandelagave Azayeli ira: <<Azayeli, miyo duhuwandela ira kudiharege miyo! Tchoira wera udiharegeve miyo nnoupa! Kodi miyo daupa weyo, dangumanana mbalawo Jowabe, wonga uwa nnafuna dire avi?>>

²³ Mbwenye Azayeli kafunnege vwa yenno yawongaga Abineri. Ohokalelagave ntindi amutamangihagave. Mwa enne Abineri omuwambaga Azayeli mbani na mundulri mwa mwanango waye. Mwanangole agamulatile ohokumelelaga unduli waye. Mwa enne Azayeli ohogwaga vevale, liye vayela kwa nimburo nimohive nenne. Evale Azayeli afwaye amohiwa kazaga mundulri, kafiya nimburo nakwilege liye nne, koimelaga evale. Eto mulombwana Abineri ohodowagave musogolrove atawaga.

²⁴ Mbwenye Jowabe na Abizayi komutamangihagave Abineri, kadowaga musogolrove. Ante nzuwa naviraga atu, kohofiyihagana nkuma wa Ama, unafwanyeya sogolro wa Jiya, wandamelana ndila yodowa isalesale ya Jibeyawu.

²⁵ Evale Abineri na anyakondo a nlogo na Benjami anna liye, kohogumanelaga, aliwa dowa vazulu va nkuma mmohiwa. Aliwa vikoza ira kawanege na afwiwa, anyakondo a Davi.

²⁶ Evale anyakondo a Davi kagafiyile vakwikwive, Abineri ohomukuwelaga Jowabe amuwandelaga eraga: <<Kodi panana unera hiyo wu kunakana goma uwa? Kunawanda iziwa ira wana unera hiyo wu unerege tatamula idana ira udowege musogolrove? Kodi weyo unaza waawandele alini anyakondo awo ira kahiye ahara abaliwa aIzarayeli?>>

²⁷ Evale Jowabe ohowakulaga, liye ira: <<Miyo nnolumbela na nzina na Mulugu ira ahakala udikuwela eno miyo anyakondo aga keregeve ahara abaliwa fiyeda metchelo.>>

²⁸ Evale Jowabe ohoimbaga palraza, noira enne anyakondwaye ale kohiya ahara aIzarayeli, kondo yawana atu gomela evale.

²⁹ Evale Abineri vamohi na alombwana annaga liye kohoromaga wenda mahiyu atene anne mwilamboni mwa Araba. Noira enne, koholambuwaga muhindje Jordawu, aliwa roma wendagave roma mabebehi ante aliwa fiya Mahanayimi iwandamelaga ora ya midiya.

³⁰ Fwanyeya ira mulombwana Jowabe agahiyile muhara mulombwana Abineri, ohagumanihaga anyakondo atene. Evale agaakontarile, atu 19 tchafwanyeyagavo, muhiya Azayeli wenno apiwe na Abineri.

³¹ Mbwenye anyakondo a mwene Davi kaapilege alombwana okwakwana 360 a nlogo na Benjami anno kasogolrelriwa na Abineri.

³² Noira enne, mulombwana Jowabe vamohi na anyakondo aye kohomutukulaga Azayeli, aliwa mudowana Beleme, aliwa mukoya masiye wewo wakoyiwe babaye. Eto noira enne mulombwana Jowabe vamohi na anyakondwaye atene kohoromaga wenda mahiyu atene anne. Ante unde utchaga pafiyaga atu sidadi ya Eboroni.