2 Samuweli 18 - Mazu Otchena a Mulungu

Gondjihiwa wa anyakondo a Abisalawu

¹ Noira enne, mwene Davi ohagumaniha anyakondo atene annaga liye, roma helavo asogolrelri a anyakondo 1.000 na asogolrelri a anyakondo 100.

² Anyakondo atene aagawile makuru mararu. Nikuru nimohi musogolrelriwa ali mulombwana Jowabe. Nikuru nanembinli musogolrelriwa ali mulombwana Abizayi mwana Zeruwiya wenno eto ali Jowabe mbalaye. Nikuru nogomiheda, musogolrelriwa ali mulombwana Itayi, wenno ali nkuda Gate. Eto noira enne, Davi ohawandelaga atwaye atene eraga: <<Miyo nnafuna didowe vamohi na nyo kondoni!>>

³ Mbwenye aliwa kohowakulaga keraga: <<Nari, kavali wandeya ira nyo mudowe na hiyo kondoni. Tchoira masiki nitawe, amwidanihu kinafunege joira kanipe hiyo atu oindjiva nari. Masiki kanipe pwi, kinabalra. Mbwenye nyo mutu mmohi muli nnga anyakondo 10.000. So anafunege ira kaupeni nyo. Nona yapamiwa nyo muhale ira yanirutcha, nyo muwandege za aruma atu amohiwa kahanle musidadi muno ira kaze kanikamihede.>>

⁴ Evale mwene Davi ohowakulaga eraga: <<Miyo nnoirana nnga mwemo munaonela nyo.>> Noira enne, liye okalaga mmambalo mwa mulango. Evale atu atene kohokumaga makuru a 100 na 1.000.

⁵ Evale aliwa kadowaga, mwene Davi ohawandelaga asogolrelri a anyakondo ale Jowabe na Abizayi na Itayi, eraga: <<Nyo akala munodiziveliwa miyo, kamumuirele yotakala muzombwe waga Abisalawu!>> Davi awongaga enne na asogolrelri ale zela Abisalawu, anyakondo atene kohovwaga.

⁶ Noira enne, anyakondo ale kohomaruwaga, aliwa volowa mukokolani ira kagumane na aIzarayeli afwiwa anno kafwanyeya na mulombwana Abisalawu. Evale kohodowaga tatamula kondo guguru ya Efarayimi.

⁷ Evale kagatatamunle kondo kawanaga, aIzarayeli anno kasogolrelriwa na mulombwana Abisalawu, kohogondjihiwaga na makalelo ohokala a masika na anyakondo a Davi. Mwa enne kohokwaga alombwana 20.000.

⁸ Kondo yatatamuwilege ilambo yenne yaligi kondo yogomiha niso. Tchoira guguru yohapaga atu adjindji kwaranya atu anne kapiwe na supada.

Jowabe ohompa Abisalawu

⁹ Kondo yagali vari, Abisalawu agagwenle kavaru waye awendaga, ohagumanagana alombwana angasi angasi a Davi. Agaaonne anyakondo a Davi ale kazaga, ohomaruwaga atawaga. Mbwenye tempu yatawa liye ile, na mwasa oira liye otamangaga na makalelo ohokala a masika, kavaru agwenlege liye ule ohoviraga vati vali tambi pwi eni da mutengo mulukulu wa karvaliyo. Evale muru wa Abisalawu ohoparaga mpinyingalrani mwa tambi da mutengole, kavaru waye ule liye dowagave, nne kaimenle. Evale liye ohalaga evale lrelreya muzulu muzulu.

¹⁰ Evale ohokalagavo mulombwana mmohi amuonnege. Agamuonne, ohodowaga muwandela mulombwana Jowabe ira: <<Miyo dihimuona mulombwana Abisalawu agaparile mmutengoni mwa karvaliyo agali lrelreya muzulu muzulu!>>

¹¹ Evale mulombwana Jowabe agavwile enne, ohomuwelihedaga mulombwana amuwandela ule, liye ira: <<Nnga akala weyo uhumuona, mwasiwa gwa nni uza wahampaga ummoriheda vati? Mwasiwa ahakale uirana eno, miyo dogouvaha kobiri kumi da parata na sintu.>>

¹² Mulombwanole ohomuwakulaga Jowabe eraga: <<Masiki ahakale nyo muhela mmandani mwaga kobiri da parata 1.000, miyo kadawande muirela yabure mwana mwene. Tchoira hiyo nihivwa mwene auwandelagani nyo na Abizayi na Itayi airaga: <Mwadowa kamumuirele yabure muzombwaga Abisalawu!>

¹³ Eto ahakale miyo dimuirela yabure, yogovweya wa mwene, mwasiwa kilivo ili yokoyeya para mwene. Eto weyo kwadivunela.>>

¹⁴ Evale Jowabe ohowakulaga eraga: <<Miyo eto kadidibeliwege diwongaga na weyo eni!>> Evale ohotukulaga mwanango miraru, liye dowa nfwanya Abisalawu, liye mulatana mirimani agalive wa meswene zulu ule mmutengoni mwa karvaliyo mule.

¹⁵ Evale azombwe kumi anno katukula jowanana ja mulombwana Jowabe kohodowaga, aliwa murindja mulombwana Abisalawu, aliwa mala mporotcha, aliwa fiyeda mpela evale.

¹⁶ Mwa enne Jowabe ohoimbaga palraza, anyakondo atene aliwa hiya ahara aIzarayeli afwiwa, mwasiwa Jowabe gwaahiyihilege.

¹⁷ Evale kohodowaga, aliwa mutitihavo mulombwana Abisalawu, aliwa dowa mutatilela mmulihani afwanyeya muguguruni emule, nomala eno aliwa gudelavo mabwe ohokala a masika vazulu viwa vale. Noira enne, aIzarayeli atene kamuhara Abisalawu kohotawaga, kada mutu liye dowaga vande vaye.

¹⁸ Fwanyeya ira Abisalawu ahanakwe, ohodowa nimburo nnaitaniwa ndabo na Mwene, liye imeliha nimbozo evale. Amangaga enne aumbuwenle ira: <<Miyo kadinna mwana wa mwanapongwe wenno unafuna dowihagave nzina naga musogolro. Tchoira dahairena eni, dagakwile, nzina naga nnodimela!>> Mwa enne nimbozo nne ohovaha nzina naye. Ante fiyeda siku na peno, nimbozo nne nihikalawove eto nnaitaniwa Nimbozo na Abisalawu.

Davi ohowandeliwa ukwa wa mwanaye Abisalawu

¹⁹ Kondoni ule Ayimazi mwana Zadoki ohowongaga eraga: <<Miyo nnafuna ditamange, didowe wa mwene Davi damuwandele ira: <Peno Yehova uhaweliheda kunyakunya amwidaninyu!> >>

²⁰ Jowabe mbwenye ohomuhiyihaga, liye ira: <<Peno unafuna dowa muwandela mwene kahi weyo. Fendo ila unafuna dowa muwandela unakala mutu mmohiwene mwasiwa mwana mwene uhukwa.>>

²¹ Noira enne, mulombwana Jowabe ohomuwongana mulombwana mmohi nkuda Kusi, liye ira: <<Weyo mbwenye venya, udowe wamuwandele mwene Davi zela jatene jionne we kondoni uno!>> Nkuda Kusi ule ohokokoraga vamentoni va Jowabe, nomala liye maruwa roma tamanga adowaga ira amuwandele mwene Davi.

²² Noira eno, mulombwana Ayimazi mwana Zadoki ule ohowongaga akoka na Jowabe eraga: <<Andimuwa, dihiyeni na miyene dimuharege nkuda Kusi ule ira didowe damuwandele mwene Davi zela jatene jiireyile.>> Evale Jowabe ohomuwakulaga, liye ira: <<Mwanaga kodi mwasiwa gwa nni unafunela we ira udowe weyo? Tchoira weyo masiki udowe, kunatambilrave yengo!>>

²³ Mbwenye mulombwana Ayimazi ohokalelagave ntindi kwi: <<Nari, miyo nnafunave didowe bahi!>> Noira eno, Jowabe ohowongaga eraga: <<Tabo kadowaga!>> Evale liye ohovenyaga atamangaga aharaga ndila yapama yohokana mikuma eto ohodowaga mukwaranya nkuda Kusi ule, liye kala vasogolro.

²⁴ Fwanyeya ira mwene Davi tempu yadowilege atwale kondoni, liye agaratilege wu mulango ovolowela, wu mulango okumela unde, vari viwa. Evale eto namaing'anela ohogwelaga vazulu va nyumba wandamelana muru wa sidadile. Agali evale, funa ing'ana olapela wene, ohomuonaga mulombwana mmohi eni atamangaga ekave azaga.

²⁵ Evale liye ohomuwandela Davi ira: <<Dihimuona mutu mmohi eni unaza atamangaga!>> Evale mwene Davi ohomuwakula eraga: <<Akala umuonne mutu mmohi azaga ekave, afwase ikala inafuna liye niwandela.>> Mwa enne maliba tamanga ule ohoromaga kwivela.

²⁶ Noira eno, namaing'anela ule ohomuonaga mulombwana mmohiwa atamangaga ekave. Mwa enne ohomuitanaga maliba hula mulango eraga: <<Kaing'ana! Ukala mulombwana mmohiwa unaza atamangaga ekave!>> Davi eto agavwile mazu anne ohowakulaga awongaga eraga: <<Na liyene eto ukana inafuna liye za niwandela.>>

²⁷ Noira enne, namaing'anela ule ohowongagave eraga: <<Mulombwana oroma dimuonne miyo, atamangaga unakala nnga mulombwana Ayimazi mwana Zadoki!>> Evale mwene Davi ohomuwakulaga, liye ira: <<Liye gu mutu wapama. Eno unazana muselu wapama.>>

²⁸ Mulombwana Ayimazi ule agazile, aganfwanyile mwene Davi, ohomukuwelaga eraga: <<Jatene jili japama jene.>> Noira enne, ohozaga, liye mukokorela mwene Davi, aoramihaga kove yaye ante fiyiha vati, liye kwi: <<Otamaleliwa akale Yehova Mulugu wenyu, wenno waavelenle mmandani mwihu amwidaninyu anno kafuna joupani nyo mbwiyeni so mwene!>>

²⁹ Evale Davi ohonfukaga, liye ira: <<Nnga muzombwe Abisalawu uli wapamene?>> Mulombwana Ayimazi ohowakulaga, liye ira: <<Mulombwana Jowabe adirumaga miyo namalaba wenyu, so daonne wewule wagali madugudugu ohokala a masika. Mbwenye kadiiziwile iireyilewo.>>

³⁰ Evale mwene Davi ohomuwandelaga eraga: <<Kakala eva.>> Evale Ayimazi ohokalaga ha vevale oimelene, liye dedihaga.

³¹ Noira enne, nkuda Kusi ule ohofiyaga, liye kwi: <<Mbwiyeni so mwene miyo nnazana muselu wapama! Tchoira peno Yehova uhuuvunelani mmandani mwa amwidani atene kavenda jouirelani yabure!>>

³² Davi ohonfukaga, liye ira: <<Nnga muzombwe Abisalawu uli wapamene?>> Nkuda Kusi ule ohowakulaga eraga: <<Mbwiyeni so mwene, ili yapama imuireyele muzombole ikale inafuna aireyela amwidaninyu na atene anavenya ira kauireleni ubure!>>

³³ Evale mwene Davi agavwile enne ohokumbanyaga valukulu. Evale ohovenya, liye roma gwela sala yenno yafwanyeya vazulu va mulango vale. Adowaga onlaga eraga: <<Mwanaga Abisalawu! Mwanaga, mwanaga Abisalawu! Yali yapama miyo dahakwe vamalroni vawo mwanaga Abisalawu, mwanaga, hiya weyo kwa!>>