2 Samuweli 17 - Mazu Otchena a Mulungu

Huzayi ohoruniha zelru da Ayitofeli

¹ Mulombwana Ayitofeli ohowongaga eto na Abisalawu eraga: <<Miyo nnafuna daasakulre alombwana 12.000, divenyihane mahiyu vano ira dirome muhara mwene Davi.

² Miyo nnonfwanya agamanle waheya eto agamanle kukumuwa. Damurendjetcha, unoroma wenda zagi zagi ante atwaye kafiyede mutawa. Era eno nnompa liyene ve bahi.

³ Evale nnoagumaniha atu atene, daazena wa nyo so mwene nnga namateliwa azaga vande va mamunaye. Eto voira nyo munafuna mumpe mutu mmohi bahi, liye agapiwe, atu atene anogarati mwa murendele!>>

⁴ Evale mulombwana Abisalawu na andimuwa atene a Izarayeli kagavwile mazu a Ayitofeli kaonne nnga ohowonga pama.

⁵ Noira enne, eto mulombwana Abisalawu ohowongaga eraga: <<Kamuitaneni eto mulombwana Huzayi nkuda Ariki ira nivwe tambe inafuna liye wonga!>>

⁶ Evale mulombwana Huzayi agazile, Abisalawu ohomuwandelaga eraga: <<Mulombwana Ayitofeli uniwandenle mazu ala, ala, ala. Kodi inafwanela niirena nnga mwemo muniwandelele liye? Akala kinakala, uwonge inafuna hiyo ira?>>

⁷ Mwa enne Huzayi ohomuwandelaga Abisalawu eraga: <<Iwongile mulombwana Ayitofeli fendo yenna kikanle!

⁸ Tchoira nyo muhuiziwa pama ira babinyu vamohi na alombwana unna liye ba atu a kopolo kwaranya nyo eto aliwa kali otakaleliwene nnga urusu wa muhiyana abeliwa ahimaye! Eto hiya yennove bahi, nyo muhuiziwa ira babinyu gu mutu oxangetchetcha zela ja kondo. Liye kaza avireliwa umahiyu watene vamohi na atu atene.

⁹ Eni vano liye uhumala vitala mmulihani, owu hehi nimburo nimohi niwa nene. Eto alombwana enyu kadowa, kapiwa angasi angasi kondo yoromene, atu kavwa, anerege wonga ira: <Eni ale kamuhara mulombwana Abisalawu kohomala gondjihiwa!>

¹⁰ Eto jaireya eno masiki mulombwana wenne ali olimba murima nnga podogoma, avwa mazu oira: <Anyakondo a Abisalawu kohogondjihiwa na mwene Davi>, liye mmirimani mwaye kanakana kopolo doira unodowa awane na Davi akoka. Tchoira aIzarayeli atene kohomala iziwa ira babawo vamohi na anyakondo aye anna liye ba a kopolo!

¹¹ Miyo nnouxangihani nyo so mwene. Mwafunaga ira mudowe mwawane na Davi, muvenye nyenne mwaagumanihe aIzarayeli atene romela ilambo ya Dani ante ilambo ya Beriseba, muwande agumaniha atu oindjiva nnga miseva da mutcherelani mwa bara eto na nyenne mudowe kondoni.

¹² Era eno mbwenye hiyo nnowanda muhara mwene Davi nimburo nili natene nnafwanyeya liye, nnomutwanyuwela liye ahanavwe yengo zela hiyo, nnga jinaira ningame nazaga mwilamboni. Nnowanda mpa liye vamohi na atu atene, nne mmohi kalivo unafuna hala!

¹³ Eto navwa ira Davi utawele sidadi imohiwene, atwinyu atene anomaruwa na mingohi diwa dene kadowe kawerewerihe ngohi sidadi yatene yenne, kaimange, amala kaitchikule sidadi yatene yenne, imorele mwana muhindje. Era eno nne nibwe nimohi ning'onong'ono kannahalavo!>>

¹⁴ Mwa enne mulombwana Abisalawu vamohi na aIzarayeli atene kagavwile mazu awongilege mulombwana Huzayi, kohoziveliwaga keraga: <<Peno mbwenye, mulombwana Huzayi muAriki uhuwonga pama hiyaniha na Ayitofeli.>> Para aliwa ziveliwa jejo jawongilege mulombwana Huzayi, kahiyaga zelru dapama da Ayitofeli, Yehova gwasakanyile ira mulombwana Huzayi awonge enne eto Yehova gwasakanyile ira agawongile, atu atene kaziveliwe ira amuzelena Abisalawu ubure.

Davi oholambuwa muhindje Jordawu

¹⁵ Mulombwana Huzayi agamanle wonga mazu anne, ohomaruwaga, liye dowa muwandela mulombwana Zadoki na Abiyatare anno kali anamakuta, eraga: <<Mulombwana Ayitofeli amuwandenle Abisalawu vamohi na andimuwaye atene zelru ila ila ila. Eto miyo kagadivepile ira diwonge, daawandenle zelru ila ila ila!

¹⁶ Mwa eno, inafwanela mwaarume atu mobaranya, kadowe kamuwandele mwene Davi ira mahiyu anna aliwa kigone mukokolani kombela ya uno vanalambuwetcha atu, mbwenye kalambuwe muhindje Jordawu tawiha ira mwene vamohi na atu atene anakala na liye anapiwe.>>

¹⁷ Evale Zadoki na Abiyatare kohomuwandela namalaba mmohi wa muhiyana, wenno kanvahile atu mabasa ira atamangegena joireya amuwandelege Jonata na Ayimazi, anno kali aliba fiyiha jowonga jatene wa mwene Davi. Tchoira Jonata na Ayimazi, kamudediha namwali ule wandamelana isime ya Rojeli, tawiha ira kera kavolowe musidadi mule, tempu inakumege atu ira kadowe kamuwandele mwene Davi, anaoniwe na atu.

¹⁸ Mwa enne namalabole agaafwannye azombwale, aawandelaga, ohokalagavo muzombwe mmohi eni aaonnege. Muzombole agaonne ira: <<Aa, ala anafuna katukule mazu kamuwandele mwene Davi!>>, liye ohomaruwaga, liye dowa muwandela mulombwana Abisalawu. Mbwenye mulombwana Ayimazi na Jonata kadowilege mobaranya Bawurimi, vande va mulombwana mmohi eni. Vande va mulombwanole vohokalaga isime ya wanle. Aliwa kagafiyile evale, kohodowaga, aliwa morela muisimeni mule, aliwa vitala mwemule.

¹⁹ Noira enne, muhiyana wa vande vale ohotukulaga tampa, liye kunelana vazulu va isime vale, nomala liye waneyavo sese. Mwa enne kalivo awandile iziwa ira muisimeni mule ukala uvitanlemo.

²⁰ Noira eno, anamalaba a Abisalawu kohofiyaga vande vevale vavitanlege mulombwana Jonata na Ayimazi, aliwa nfuka muhiyanole ira: <<Kodi Ayimazi na Jonata kali waani?>> Liye ohawandelaga eraga: <<Eni vano aliwa koholambuwa, kali kombela ya ule.>> Liye mala alanyeda ndila yohokala yenno. Noira enne, alombwanale kohomaruwaga, aliwa dowa roma asayelaga, mbwenye tchaaonnege. Evale kagaagomilena asaka, kohowelelaga Jeruzalemu wakoka wene.

²¹ Evale aliba asaka ale vawenle atu, mulombwana Ayimazi na Jonata kohokumagamo muisimeni mule, aliwa maruwa, dowa muwandela mwene Davi, keraga: <<Inafwanela muvenye mobaranya mulambuwe muhindje, mwasiwa mulombwana Ayitofeli uwongile na Abisalawu mazu ala, ala, ala ira augondjiheni.>>

²² Evale Davi vamohi na atu atene kafwanyeya na liye, koholambuwa muhindje Jordawu mobaranya. Ante para fiyeda unde utchaga, atene kafwanyeya kombela ya ule. Kalivo ahanle mundulri.

Kwa wa mulombwana Ayitofeli

²³ Mwa enne mulombwana Ayitofeli agaonne ira zelru dawongile liye kadahariwe, ohela yogaratela vaburuni vaye, liye gwelavo, dowa vande vaye sidadi ya waniwa. Agafiyile wewule, ohagawela atu johala jejo jafuna liye hiya. Nomala enne, ohovimangelelaga, liye kwa. Agakwile ohokoyiwa masiyeni wewo wakoyiwe babaye.

Davi ohofiya Mahanayimi

²⁴ Davi ohodowave sogolro ante liye fiya sidadi ya Mahanayimi. Mwa enne mulombwana Abisalawu oholambuwa muhindje Jordawu vamohi na alombwana atene a Izarayeli.

²⁵ Abisalawu eto ohomuhambiha mulombwana Amasa, liye kala musogolrelri mundimuwa wa anyakondo aye vamalroni va Jowabe. Amasa babaye ali mulombwana mmohi eni aitaniwa Jeteri, nkuda Jomayili, wenno amutenle Abigayeli mwana Nasi. Abigayeli eto ali Zeruwiya mbalaye eto Zeruwiya ali Jowabe mmaye.

²⁶ Abisalawu vamohi na aIzarayeli kohodowaga, aliwa kunga misasa diwa mwilamboni mwa Jileyadi.

²⁷ Mwene Davi agafiyile Mahanayimi, mulombwana Sobi, mwana Nasi wa sidadi ya Raba mwilamboni mwa Aminoni, vamohi na Makiri mwana Amiyeli wa sidadi ya Lo-Debari, na Barizilayi nkuda Jileyadi wa sidadi ya Rojelimi,

²⁸ kohozaga kaganna kama, mabasiya na jombwe, tirigu, sevada, utu, tirigu owaringa, mbweri, bwanda,

²⁹ nuwi, mukaka osakanyediwa wa ng'ombe, mabila, vamohi na leti na ng'ombe. Kohonvaha jatene ejile mwene Davi vamohi na atu atene annaga liye ira kadje. Aliwa kaavahaga, kohowongaga keraga: <<Hiyo nazela uvahani jeji ira atu kadje mwasiwa kohokana ndala eto kohowaheya eto kohokana ntona na mwasa owenda mukokolani.>>