2 Samuweli 10 - Mazu Otchena a Mulungu

Davi ohagondjiha akuda Amoni na akuda Siriya

¹ Ohokalawo mwene mmohi wa aAmoni wenno aitaniwa Nasi. Vagamanle malambo, mwene Nasi ule ohokwa. Evale mwanaye mmohi aitaniwa Anumi gwahambile umwene vamalroni vaye.

² Evale mwanaye ule agahambihiwe, atongaga, mwene Davi ohowongaga eraga: <<Nasi ahanakwe ohodiirela upama. Mwa eno, na miyene nnafuna dimuirele upama mulombwana Anumi mwana Nasi na mwasa wa upama wadiirele babaye!>> Mwa enne oharumaga anamalabaye, liye ira: <<Muvenye mudowe mwamutondole mulombwana Anumi na mwasa oira babaye uhukwa!>> Evale anamalabaye ale kohomaruwaga, aliwa dowa mwilamboni mwa aAmoni.

³ Mbwenye aliwa kagafiyile vande va mulombwana Anumi vale, asogolrelri a akuda Aminoni kohomuwelruza mwene Anumi keraga: <<So mwene, mulombwana Davi aarumaga anamalabaye ale ira kaze katondole, kodi nyo munaumbuwela ira aliwa kazela muriheda babinyu? Hiyo mbwenye nionnemo ira eni za uzile atu ule, kazela ira kawendelele sidadila, kaiziwe pama makalelo a sidadila ira kaze kabwanyule!>>

⁴ Evale mulombwana Anumi agavwile mazu otuja kamuwandela andimuwaye ale, ohahindaga anamalaba a Davi ale, liye asata pandi imohi ya ndevu diwa, nomala enne liye gwada jowara jiwa gomediha mmwinini, fiyeda matawo oneyaga. Evale ohagunya, liye kwi: <<Tchiyegeni!>>

⁵ Noira eno, kohokalawo atu amohiwa kavirilege, aliwa dowa muwandela mwene Davi zela jejile. Evale mwene Davi agawandeliwe zela nyaswa undimuwa wanna atwale, oharumaga atu eraga: <<Mudowe mwaawandele aliwa ira musidadi muno kifiyemo. Kakale Jeriko fiyeda ndevu diwa difiyede ulukula akoka. Dagamanle ulukula nyo podi welela uno.>>

⁶ Evale aAmoni na aliwene kagaonne ira: <<Eni Davi uhunitakaleliwa na makalelo abure zela jejo jaairilena hiyo atwaye>>, kohodowaga agula anyakondo owenda na mendo okwakwana 20.000 a akuda Siriya a ilambo ya Bete-Reyobe na akuda Siriya a Zoba. Eto kohagula alombwana a mwene Maka okwakwana 1.000 na alombwana 12.000 a akuda Tobe.

⁷ Evale mwene Davi agavwile ira: <<Atu kohomala gumanela ira kawanege na weyo!>>, na liyene ohomurumaga mulombwana Jowabe vamohi na anyakondo aye atene a kopolo ira kadowe kawane sidadi ya akuda Aminoni.

⁸ Evale aAmoni kohokumaga, aliwa atanda anyakondo ewa va mulango wa sidadi yewa vale. Mbwenye anyakondo a akuda Siriya anno kakumile ilambo ya Zoba na Reyobe, vamohi na anyakondo a akuda Tobe, na anyakondo a Maka, kohodowaga vokala nnga ha vale vaheno vene, aliwa atanda anyakondo ewa.

⁹ Mwa enne mulombwana Jowabe, agaonne ira: <<Eni anyakondo anafuna hiyo wanana kohovitanda amohiwa sogolro, amohiwa mundulri!>>, ohopiyaga zelru. Zelru yapiyilege liye evale, aatukunlege alombwana angasi angasi oiziwa wana pama a Izarayeli, liye atanda ira kadowe wafwanyeya akuda Siriya anno kafwanyeya vaheno vene.

¹⁰ Mbwenye anyakondo amohiwa ohala ale, ohonvaheda mbalaye Abizayi. Evale ohatanda ira kadowe kawanege na aAmoni anno kafwanyeya va mulango va sidadi.

¹¹ Eto Jowabe ohomuwandelaga Abizayi ule eraga: <<Miyo nnafuna didowe dawane na akuda Siriya. Aliwa kakala a kopolo kwaranya miyo, weyo uze udikamihede! Eto weyo wawanaga na aAmoni, aliwa kakala a kopolo kwaranya weyo, miyo nnoza dukamihede.>>

¹² Ohowongagave eraga: <<Nilimbihe kopolo eto nikale atu olimba murima zela nlogo nihu eto zela sidadi da Mulugu wehu eto Yehova asakanye nnga mwemo munaonela liye!>>

¹³ Evale mulombwana Jowabe vamohi na anyakondo aye kohodowaga, aliwa roma wana na akuda Siriya. Muwari mowana mule, akuda Siriya kohofiyedaga imwanana, aliwa fiyeda tawa.

¹⁴ Eto aAmoni anno kawana na Abizayi kagaonne ira afwihu a Siriya kohotawa, na aliwene kohomutawaga mulombwana Abizayi, aliwa dowa volowa musidadi. Evale kagatawile, mulombwana Jowabe ohiya wana na aAmoni, liye welelaga Jeruzalemu na anyakondo aye.

¹⁵ Evale akuda Siriya kagaonne ira: <<Eni hiyo nihimala gondjihiwa na akuda Izarayeli>>, kohagumanihaga anyakondo ewa akoka.

¹⁶ Mwa enne mwene Hadadezeri ohorumihaga milanyo wa akuda Siriya anno kafwanyeya pandi ya makumelo wa nzuwa wa muhindje Eufarati ira kaze kamukamihede. Evale aliwa kohomaruwaga, aliwa za. Kagazile, mulombwana Sobaki wenno afwanyeya agali musogolrelri mundimuwa wa anyakondo a mulombwana Hadadezeri, ohatukulaga, akumana wewule, liye avirana ante liye adowana sidadi ya Hela.

¹⁷ Eto mwene Davi agavwile ira: <<Eni akuda Siriya ale kohogumana akoka ira kawane na nyo>>, ohagumanihaga anyakondo aye atene kafwanyeya mwilamboni mwa Izarayeli. Aliwa maruwa, lambuwa muhindje Jordawu, roma dowaga wali afwiwale sidadi ya Hela. Evale akuda Siriya kagaaonne afwiwale kazaga, kohovitandaga, aliwa tatamula kondo, roma wana.

¹⁸ Muwari mowana mule mwene Davi ohapa anyakondo a akuda Siriya okwakwana 700 owenda na aterelado, vamohi eto na alombwana amohiwa owenda na kavalo okwakwana 40.000. Eto Davi ohomporotcha mundimuwa wa anyakondo wenno aitaniwa Sobaki. Evale mulombwana Sobaki agaporotchiwe, ohofiyedaga kwa kondoni wewule.

¹⁹ Noira enne, amwene atene a Siriya anno katongiwa na mulombwana Hadadezeri kagaonne ira: <<Hiyo eni nihigondjihiwa na aIzarayeli>>, kohodowaga sakanya yopangana yowandana na aIzarayeli, aliwa roma alabaga aIzarayeli. Mwa enne akuda Siriya ale tchawelenle akoka akamiheda aAmoni mwasiwa koaova aIzarayeli.