Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Korinto 9 - Mazu Otchena a Mulungu


Jokokomeza jimohi zela sokasoka

1 Zela ja sokasoka jejo jinasokiwa para akamiheda atu otchenihiwa, kahi yengo yoira dulrembelegeni.

2 Mwasiwa dihiiziwa ira nyo muli okozeyene. Eto miyo dagumana na akuda Masedoniya, nnoutitimihetchani, miyo wongaga ira: <<Afwihu a porovinsiya ya Akaya anafwanyeya okozeyene roma yaka ile.>> Adjindji mwa aliwa kagavwile zela funafuna wenyu osoka kobiri, na aliwene kohowanda hara makalelo anno, aliwa volowagamo ira na aliwene kasokege kobiri.

3 So mbwenye miyo nnafuna daarume abalihu araru anno vasogolro vaga ira tempu yodowana kobiri yafiya, utetelani wehu ukwakwanele, mufwanyeye okozeyene nnga mwawongela miyo.

4 Nnatawa ira dera didemule moururumutchani vamohi na akuda Masedoniya angasi angasi, nnaze nufwanyeni mwahanakozeye. Era eno inokala manyazo para miyo eto simbwasimbwa para nyo, mwasiwa hiyo nihiwonga mohokayikela ira nyo muli okozeyene.

5 Tcheniyo idivahile zelru ira daakokomeze abalihu ira kadowe sogolro waga ira kavayele gumaniha yovaha yenno yawongile nyo ira muvahe. Tchoira hiyo nnafuna ira nagafiyile, yovaha inafuna nyo vaha munivahede na mmirimani mwenyu mwatene hiya kalaga nnga nnaukosani muwari moziveliwa jokana jidjindji.

6 So ilukuluwa, muumbuwele ira wenno unazala vang'ono, gwenno unafuna handa vang'ono. Ule unazala mbewu idjindji gwenno unafuna handa jidjindji.

7 Kada mutu inafwanela avahe na makalelo nnga muumbuwenle liye mmirimani mwaye, hiya mowanganyeda, hiya mokanyihediwa. Mwasiwa Mulugu unamuziveliwa mutu unavaha mohagalala.

8 Mulugu unowanda uirelani sayi datene ira ora ili yatene muwande kana mokwakwanela jatene jinafuneya ira muiregena makalelo matene apama.

9 Kalaga nnga ilrembiwe mMazuni ira: <<Liye uhugawa na manda menli, liye avaha jorayela atu osimela. Upama waye gwa mukalakala.>>

10 Mulugu wenno unanvaha mutu mbewu ira azalege na pawu ira adjege, liye unouvahani eto unouwendjedani mbewu munafuna nyo zala eto unoindjiviha handa wenyu ozela upama unafuna nyo irana.

11 Mulugu agaonne vaha watene unaira nyo, liye unourayelihani na makalelo matene ira muvahegeve na makalelo matene. Evale hiyo nadowana jovaha jenyu, atu anerege mutamalela Mulugu na mwasa wa nyo.

12 Tchoira mabasala oakamiheda afwihu kinalaba ira atu otchenihiwa kakayena jinaahalela bahi. Analaba eto ira Mulugu atamaleliwege valukulu zela jinaira liye.

13 Tchoira aliwa kagawatchenle mabasa analaba hiyo, anerege mutitimiha Mulugu ira: <<Nnoutitimihani zela vwelela unna afwihu wewo unakumela muwari morumela Muselu Wapama wa Kiristu. Eto nnoutitimihani na mwasa wa sokasoka uniirele afwihu na manda menli, kanivaha hiyo vamohi na atu amohiwa.>>

14 Evale aliwa anerege ulobelelani muwari mouzivelani ulukulu na mwasa wa sayi dilukulu da Mulugu duireleni liye.

15 Mulugu atamaleliwe zela yovaha yohowanda wongiwa, yenno inavaha liye!

© 2018 Visão Integral

Global Partners
ကြှနျုပျတို့နောကျလိုကျပါ:



ကြော်ငြာတွေ