2 Korinto 7 - Mazu Otchena a Mulungu

¹ Muwari moira nihikana mapangano anna, afwaga anaazivela miyo inafwanela nivihuwe zela yotakala ili yatene ya maningo nari ya munemba nikwakwanelihedaga tchena wehu muwari momuova Mulugu.

APawulo kohagalala zela gumana na Titu

² Musakanyede malro mmirimani mwenyu ira muwande niwatchela. Mwasiwa hiyo kanimpudjile mutu uli watene. Kanimuholotchile mutu. Kanimudjenlre mutu.

³ Miyo kannawongela eji ira dumangeni mulandu. Tchoira miyo dohowonga wanle ira hiyo nauumbuwelani nyo, mmirimani mwehu nihikana uzivelani. Masiki nikwe, masiki nahakwe, nilive vamohi na nyo.

⁴ Miyo nnawonga na nyo molimbiha murima. Eto dihikana teyela ulukulu ozela nyo. Miyo dihikana limbihiwa ulukulu, eto dihikana hagalala wohokala wa masika muwari mwa makatamiho matene ninna hiyo.

⁵ Tchoira masiki nagazile Masedoniya, maningo ehu tchavumile nne vang'ono. Nohokana zuzumihiwa mwatene mwawenda hiyo. Unde, nohokana wanawana. Eto mmirimani mwehu, nofwanyeyana ova ulukulu.

⁶ Mbwenye Mulugu wenno unaalimbiha atu okukumuwa ohowanda nilimbiha muwari mwa Titu za nifwanya.

⁷ Eto hiya limbihiwa muwari moza wa Titu bahi, nihiwanda eto limbihiwa nagavwile makalelo mwamulimbihile nyo Titu tempu yali liye na nyo. Titu ule ohoniwandela makalelo mwadisauwela nyo eto nla wenyu no difuna wenyu wolimba. Evale hagalala waga wohodowave sogolro.

⁸ Tchoira dagaonne ira karta naulrembenleni miyo nohoukumbanyihani, miyo dohoroma kana yowanganyeda ira: <<Kodi mwasiwa gwa nni vale diza daalrembelaga?>> Mbwenye peno kadinna yowanganyeda ili yatene mwasiwa nnaona ira karta naga naukukumunleni ora ya vang'ono bahi.

⁹ Peno va miyo so nnahagalala bahi. Kannahagalalela na mwasa oira dohoukumbanyihani nari. So miyo nnahagalalela mwasiwa muwari mokumbanya wenyu, muhufiyeda twaruwa. Tchoira kumbanya wenyu wakumenle wa Mulugu. Nona ukumbanyihani wehu kuuzenlenani yabure.

¹⁰ Tchoira kumbanya okumela wa Mulugu kunazana wanganyeda mbwenye unozana twaruwa wewo unamudowana mutu mavulusiwelo. Mbwenye kumbanya wa ilambo ya vati kunazana twaruwa eto unamudowana mutu makwelo.

¹¹ Kumbanya okumela wa Mulugu ule uhuuzelanani upama oira peno muli atu osimbwa funa ja Mulugu eto nyo muhukana funafuna sakanyedavo jengo jinongiwe ira mwahakayena makani. Muwari mokumbanya wa Mulugu ule, muhufiyeda kala atu oida jabure jiireyile, nyo roma muovaga Mulugu, nyo disauwelaga eto funaga jotonga ubure. Muwari mwa jatene, nyo muhuwanda vioniha ira kamunna pandi na jabure jaireyile jile.

¹² Miyo eto dulrembelagani karta nne, ilukuluwa kaali na mwasa wa wenno aviringanile nne na mwasa wa wenno apudjiwe, nari. Mbwenye ali ira nisauwela unna nyo uoneye vamentoni va Mulugu.

¹³ Nona nagavwile makalelo muwatchenle nyo karta niwa, nihiwanda didilihiwa murima. Eto hagalala wehu wohosimbwave nagaonne hagalala wanna Titu, mwasiwa nyo mwatene mohomudidiliha murima.

¹⁴ Titu ahanaze wa nyo, miyo dohomuwandela ira: <<Wadowa Korinto, afwihu a Korinto anouwatchela pama.>> Eto fwanyeya ira agaufwanyileni, nyo kamudinyaswihile, mwasiwa jatene japama jamuwandenle miyo zela nyo, liye agafiyile ufwanyileve eno. Fwanyeya ira nnga jatene jauwandenleni hiyo jali ja ibaribari eto na mazwene outitimihani damuwandenle miyo Titu kohomala kwakwanela.

¹⁵ Eto uzivelani waye unnave ulukula aumbuwela zela makalelo anavwelela nyo mwatene eto zela makalelo mwamuwatchenle nyo muwari moova eto mongurumela.

¹⁶ Peno na miyene nnohagalala mwasiwa miyo dihikana ibaribari zela viimenle nyo. Malambo a mundulrimu Pawulo agali na aKorinto, ohawandela ira: <<Nihikana sokasoka ira niwande akamiheda afwihu otchenihiwa kasimenle ilambo ya Judeya.>> Mwa enne aKorinto kohorumela soka. Jagaireyile enne mulombwana Pawulo ohoroma awandela afwaye amohiwa ira: <<Eni akuda Korinto kali okozeyene ira kakumihe sokasoka yewa ira kawande akamiheda afwihu otchenihiwa.>> Pawulo alrembile mazu a kapitulu 8 ante 9 muwari moalimbiha aKorinto eto moawumbutcheda ira: <<Eni tempu ya sokasoka inafiya. Nnafuna daarume abalihu kaze wewo katukule ja sokasoka jile. Mbwenye aliwa kahanaze, miyo nnafuna duwumbutcheni tawiha ira aliwa kagazile anaufwanyeni mwahakozeyile.>>