2 Korinto 6 - Mazu Otchena a Mulungu

¹ Nona hiyo muwari molaba vamohi na Mulugu, nnoukokomezani ira mwahawatchele sayi da Mulugu vasayi vene.

² Tchoira Mulugu unawonga ira: <<Muwari mwa tempu yapama, miyo dohovwa jawonga nyo. Eto siku nofuna vulusiwa nagazile, miyo dohoukamihedani.>> Fwanyeya ira nnga Mulugu mwawongele liye, tempu yenna tchi tempu yapama eto peno ti siku novulusiwa.

³ Hiyo nnowanda laba na makalelo matene ira nahawande mugwagwadutcha mutu mwasiwa hiyo kannafuna ira ioneye yoviringaniha muwari mwa mabasihu.

⁴ Voira hiyo nili anamalaba a Mulugu, mwa jatene jinalaba hiyo ninnana venda ira nilabe na makalelo ofwanela. Nnowanda vilela mwa jabure jidjindji, nnorumela onihiwa makatamiho, nnozuzuma, nnosegedeya,

⁵ nnobubudiwa, nnoheliwa kadeya, nnolaba muwari mwa madugudugu atu funaga jonipa, nnokana mabasa malukulu, nnomala mahiyu ompumbula hakagana tempu yogona, nnokana ndala,

⁶ nnoirana jotchenave, nnolaba mwa zelru, nnovilela, nnoairela atu upama, nnolaba muwari mwa Munemba Otchena, nnokana zivelana wa ibaribari,

⁷ nnowonga ja ibaribari, nnolaba muwari mwa kopolo da Mulugu, nihitukula jowanana japama na manda amenlene.

⁸ Nnolaba muwari moteteliwa nari mohoteteliwa, muwari monukediwa nari tamaleliwa. Atu ananiwesa nnga nili onyenga nagali eto a ibaribari.

⁹ Ananiwesa nnga atu ohoiziweya nagali oiziweya pama. Ananiwesa nnga nnakwa eto kaing'anani, nihikalawove. Ananiwesa nnga atu otongiwa eto hiyo kannapiwa.

¹⁰ Ananiwesa nnga atu okumbanya eto ora ili yatene nihikana hagalala. Ananiwesa nnga osimela eto nnoarayeliha atu adjindji. Ananiwesa nnga atu ohokana yengo eto nihikana jatene. Hiyo nnorumela ireliwa jatene ejo mwasiwa nili anamalaba a Mulugu.

¹¹ Hiyo nnawongetcha na nyo aKorinto mohowanganyeda. Mmirimani mwehu nili omasuwene wa nyo.

¹² Hiyo mmirimani mwehu kaninna makani zela nyo. Mbwenye nyo gufungile mirima denyu zela hiyo.

¹³ Miyo nnafuna diwonge na nyo nnga baba awongaga na anaye ira makalelo amohive nnga vili hiyo, na nyenne mukale omasuwene mmirimani mwenyu zela hiyo.

Atu omuroromela Yesu kisimbwe wandana na atu a unde

¹⁴ Kamurumele mangeleliwa vamohi na atu ohomuroromela Yesu, mwasiwa mangeleliwa wewo ku mangeleliwa wohokala pama. Kodi irana upama no irana ubure unowenda vamohi? Kodi moneya unowandana na isi?

¹⁵ Eto kodi vwanana kuvi unafwanyeya muwari mwa Kiristu na Satana? Nnga yengo tchivi inafuna kana mutu omuroromela Yesu vamohi na nfwaye ohomuroromela Yesu?

¹⁶ Kodi harana kuvi unafwanyeya muwari mwa Nyumba ya Yehova na vikwamutu josema? Tchoira hiyo nili Nyumba ya Mulugu Okalawo. Kalaga nnga mazu Mulugu awongile liye oira: <<Miyo nnosakanya vande vaga muwari mwa aliwa eto nnowenda muwari mwa aliwa. Miyo nnokala Mulugu wewa. Aliwa anokala atwaga.

¹⁷ Nona inafwanela mukume muwari mwa aliwa, mukale venyu vene hiya kala vamohi na aliwa. Unawonga gu miyo Nabwiya. Kamuhinde yengo yatene ili yotakala. Mwera eno, miyo nnouwatchelani.

¹⁸ Miyo nnokala Babinyu. Nyo munokala anaga a anapongwe na anavihiyana. Unawonga gu miyo Nabwiya wa Kopolo Datene.>>