2 Korinto 5 - Mazu Otchena a Mulungu

Atu omuroromela Yesu anoza kavahiwe maningo maxa ira kakale nyumba yewa

¹ Maningo ehu ala nnakalamo hiyo mwilamboni muno anafwanyeya nnga musasa. Muwari mobalra jengo johooneya, hiyo nihiiziwa ira musasa wehu ula atolowa, nihikana nyumba imohiwa yokumela wa Mulugu, yohomangiwa na manda, ya mukalakala inafwanyeya ilambo ya zulu.

² Tchoira muwari mwa musasa ula, nihikana dumbela, nifunaga nnga niware nyumba ya zulu.

³ Nawara nyumba ya zulu, kannakalave eno mandave nahanna nyumba, nari.

⁴ Tchoira na ibaribari hiyo nagalive muwari mwa musasola, ninnana dumbela vamohi no ona nyemela. Kannadumbela ira niwunguliwe nikaleve eno mandave nahanna nyumba nari, mbwenye nnadumbela ira nivolowe nyumba yapama kwaranya yenno inna hiyo ira maningo anna hiyo owanda kwa katchindjiwe na maningo a ingumi ohowanda kwa.

⁵ Unisakanyedile ira nikayena tchindjiwa wewo gu Mulugu wenno univahile Munemba ira akale ipanda ira nikayena ibaribari zela ja sogolro.

⁶ Nona hiyo ora ili yatene nilive olimbene kopolo, masiki niiziwagave ira tempu inna hiyo maningo anna, nili olapela wene na Nabwiya.

⁷ Tchoira ora ila hiyo nnawenda muwari mwa nroromelo bahi hiya muwari moona jengo jiwa.

⁸ Na ibaribari hiyo nili olimbene kopolo eto yofuna yehu ili ira nihiye maningwihu ala ira nikale vande vamohi na Nabwiya.

⁹ Eto fwanyeya ira masiki nikale vande vamohi na Nabwiya, masiki nikale olapela wene, yofuna yehu tchoira nimuzivelihe Nabwiya.

¹⁰ Tchoira hiyo atene nnoza nifiye mpando otonga wa Kiristu ira kada mutu awatchele yotambilra yaye zela joira jaye jaira liye ora yawenda liye mmaningoni mwaye, akala jali japama nari akala jali jabure.

Mabasa oawandaniha atu na Mulugu

¹¹ Nona muwari mokala atu omuova Nabwiya, nnalaba ira naagondjihe atu amohiwa ira kakayena ibaribari. Mbwenye makalelo ehu kohomala iziweya na Mulugu. Miyo eto dafuna nnga na nyenne, mwaniona hiyo, mmirimani mwenyu mukayena ibaribari zela hiyo.

¹² Hiyo kannawonga eji malro ovitetela vamentoni venyu. So nnerela ira muwande nitetela mwagumana na ale anatetela jengo jooneya na meso bahi hiya ja mmirimani.

¹³ Tchoira akala munaniona ira nihikana mihala, nikayelena muwari molaba mabasa a Mulugu. Akala munaniona ira nili apamene, upama wehu unaulabani nyo.

¹⁴ Tchoira nnalaba muwari mosogolrelriwa no zivela wa Kiristu. Makalelo anawanda hiyo iziwa zivela waye ba ala. Liye gu mutu mmohi uzile akwela atu atene. Nona atu atene kohokwa.

¹⁵ Wenno aakwenle atene akwele ira ale kaliwo kahakalewo ira kairegenave jofuna jewa mbwenye kakalewo para kairegena jofuna ja wenno aakwenle nomala avenyihiwa mokwani.

¹⁶ Nona kuma peno dowa sogolro hiyo namuona mutu, kannamuona muwari mwa zelru da ilambo ya vati. Agali wanle hiyo namuonetcha Kiristu muwari mwa zelru da ilambo ya vati, peno mbwenye kannamuonave akoka na makalelo anno.

¹⁷ Nona akala ukala mutu uli muwari mwa Kiristu, liye gu yopandutchiwa ixa. Ja wanle jihivira. Jatene jihisanduwa, jinafwanyeya jagali jixa.

¹⁸ Jatene eji jikumile mwa Mulugu wenno aniwandanihile, avigumanihaga liye na hiyo muwari mwa Kiristu eto univaha mabasa oawandela atu makalelo owandanihiwa na Mulugu.

¹⁹ Ku wonga Mulugu muwari mwa Kiristu uhawandaniha atu a ilambo ya vati vamohi na liye, ahaagwihilena mulandu zela joviringaniha jiwa eto anivahedaga mabasa oawandela atu makalelo owandana na Mulugu.

²⁰ Nona hiyo nili atu orumiwa na Kiristu. Mulugu unaaitana atu muwari mwa hiyo. Hiyo nnouguzelani mendo na nzina na Kiristu ira inafwanela muwandane na Mulugu.

²¹ Ira nikale pama, Mulugu amukalihile wenno ahaiziwile yotega ira akale mutu otega ira muwari mwa liye, hiyo niwande kana upama wa Mulugu.