2 Korinto 4 - Mazu Otchena a Mulungu

Mulugu gunamuoniha mutu ibaribari

¹ Nona voira mabasihu nivahiwe muwari mwa tangaranga da Mulugu, hiyo kannakukumuwa mmirimani mwehu.

² Hiyo mbwenye nnokonda laba na makalelo ohofwanela, oxangaxanga. Nnokonda eto irana ja ungongomwa, nari jotchindja mazu a Mulugu. Mbwenye nnalaleya ibaribari vatando, hiyo awandelaga atu atene ibaribari ira kaiziwe mmirimani mwewa viimenle hiyo vamentoni va Mulugu.

³ Eto masiki Muselu Wapama nnalaleya hiyo akale okuneleyene, uli okuneleyene zela atu anno anatolowa bahi.

⁴ Tchoira aliwa mulugu wewa wa ilambo ya vati ila umala timiha zelru dewa ira kahawande ona moneya wokumela Muselu Wapama ozela undimuwa wa Kiristu wenno unafwanyeya agali nlandaniho na Mulugu.

⁵ Tchoira hiyo kannavilaleya oka, mbwenye nnamulaleya Yesu Kiristu ira liye gu Nabwiya. Eto hiyo nili anamalabinyu ira Yesu ateteliwe.

⁶ Tchoira Mulugu wenno awongile ira: <<Moneya uoneye muisini>>, unimoneyela mmirimani mwehu ira anivahe moneya ozela iziwa undimuwa wa Mulugu wewo unafwanyeya vakoveni va Yesu Kiristu.

Anamalaleya anakala nnga jombwe munafwanyeya rayela

⁷ Mbwenye hiyo nihikana rayela wa Mulugu muwari mwa maningo ovuta nnga jombwe ja ulongo ira iwande oniha ira kopolo dilukulu dokwaranya jatene, mwinnya gu Mulugu, kahi hiyo.

⁸ Hiyo ninnana zuzumihiwa mwa jatene mbwenye kannafoka. Nnofiyeda gomeliwa zelru mbwenye kannafiyeda mwezo ohokana yodediha.

⁹ Ninnana harahariwa mbwenye Mulugu kananihiya. Hiyo ninnana porotchiwa mbwenye kannatolowa.

¹⁰ Hiyo ninnana tukula ukwa wa Yesu mmaningoni mwehu ira ingumi ya Yesu ioneye muwari mwa maningo ehu.

¹¹ Tchoira hiyo niliwo, ninnana vahediwa ira nikwe na mwasa wa Yesu ira ingumi ya Yesu iwande oneya muwari mwa maningo ehu okwa.

¹² Ku wonga ukwa unalaba muwari mwa hiyo mbwenye ingumi ili na nyo.

¹³ Hiyo nroromelo nehu nili nnga ilrembiwe mMazuni ira: <<Miyo dihiroromela eto mororomela dihiwonga.>> Mwa eno, voira hiyo nihikana nroromelo, na hiyene muwari mwa nroromelo nnalaleya.

¹⁴ Mwasiwa nihiiziwa ira wenno unvenyihile Nabwiya Yesu mokwani unoza anivenyihe hiyo ira nikale na Yesu eto unonitukula hiyo na nyo ira nikale vamohi vamentoni vaye.

¹⁵ Jatene ejo jili ira nyo mukale pama eto sayi da Mulugu didowegeve sogolro, daafwanyegeve atu amohiwa ira aliwa kamutamalelegena Mulugu zela joira jaye ira Mulugu atitimihiwege.

¹⁶ Nona hiyo kannakukumuwa mmirimani mwehu. Masiki kalawo wehu wa unde uvundege vang'ono vang'ono, kalawo wehu wa muwari unnanave sandutchiwa ira ukale uxa siku na siku.

¹⁷ Tchoira zuzumihiwa unna hiyo wa vang'ono eto wahanadibeliwa, unanilabela ira nikayena undimuwa ulukulu wohomala, wohowanda fwalrafwanihiwa na yengo imohiwa.

¹⁸ Tchoira hiyo kannakukumuwela jengo jooneya na meso, mbwenye nnakukumuwela johooneya na meso bahi. Mwasiwa jengo jooneya ti jengo johodibeliwa vira mbwenye jengo johooneya ti jengo ja mukalakala.