2 Korinto 13 - Mazu Otchena a Mulungu

Mazu oalimbiha aKorinto ira katwaruwe

¹ Fendo ila tchi fendo yaneraru inafuna miyo za wa nyo. Ira mutu atongiwe, inafwanela ikalevo ibaribari mohokayikela muwari mwa amboni ambinli owu araru.

² Miyo dagali na nyo fendo yanembinli, dohatutcha ale kategile malambo a mundulrimu eto dohatutcha atu atene eto peno va dagali olapela wene na nyo, nnoatutcha aliba tega akoka. Daza wewo, daafwanya kagali na jotega jiwa jene, miyo kannaahiya eno.

³ Nnagomela atonga ira muwande iziwa ira Kiristu gunawonga muwari mwa miyo. Eto Kiristu alabaga muwari mwa nyo kahi mutu ovuta, gwa kopolo.

⁴ Mwa ibaribari liye ohokomeliwa movuta mbwenye peno liye ukalawo muwari mwa kopolo da Mulugu. Na hiyene nili ovuta nnga mwavutile liye, mbwenye nnerege wanda kalawo mwa liye, muwari mwa kopolo da Mulugu ira nulabegeni.

⁵ Inafwanela muvipime ira muone akala mulive olimbene mwa ibaribari inahara hiyo. Muviing'ane vili nyo. Mwavipima, mwaviona ira munafwanyeya muwari mwa ibaribari, muiziwe ira Yesu Kiristu uli muwari mwa nyo.

⁶ Miyo nnafuna ira nyo mwaniona, muwande iziwa ira hiyo mbwenye nagavipimile, nnafwanyeya nagali atu a ibaribari.

⁷ Mbwenye hiyo nnanvepa Mulugu ira nyo mwahairena yabure. Ilukuluwa inafuna hiyo kahi ira nioneye nnga atu a ibaribari. Hiyo podi oniwaga nnga atu oviringaniha, so inafuna hiyo ilukuluwa, nifunile ira nyo muiregena japama.

⁸ Tchoira kilivo yengo inawanda hiyo irana yononga ibaribari. So jatene jinera hiyo jinaoniha ibaribari.

⁹ Nona hiyo navuta, nyo mwakala a kopolo, hiyo nnowanda hagalala. Hiyo nnaulobelelani ira nyo mukale okwakwanela.

¹⁰ Na mwasa wenno miyo nnalremba jengo eji dagali olapela wene na nyo ira dagazile dahakale orutcha muwari mwa utongi Nabwiya udivahile liye ira duulukuliheni hiya ira dubwanyuleni.

Mazu ogomiheda

¹¹ Abalaga yengo yogomiheda inafuna miyo, nnafuna ira muhagalale. Muone akala munowanda kala okwakwanela. Inafwanela mulimbihanege eto muvwananege, muwendege pama vamohi na murendele. Mwaira eno, Mulugu ozivela eto wa murendele unousogolrelrani.

¹² Mwalondjelanege na beju dotchenihiwa. Atu atene otchenihiwa anoulondjelani.

¹³ Sayi da Nabwiya Yesu Kiristu no zivela wa Mulugu no vwanana okumela wa Munemba Otchena, jatene ejo jikale na nyo. Ame! Kukala mazu a karta nanembinli nalrembiwele atu omuroromela Yesu a Korinto.