2 Korinto 12 - Mazu Otchena a Mulungu

Pawulo ohowanda hagalala zela jovuta jaye

¹ Masiki muwari movititimiha mwahakaleve mpindu, inafwanela diwongegeve mazu ovititimiha. Miyo nnafuna diwongege zela jengo jionne miyo mmuruni na jengo jionihiwe miyo na Nabwiya.

² Miyo dihimuiziwa mutu mmohi muwari mwa Kiristu, atukuliwe adowiwana fiyeda zulu waneraru yaka 14 da mundulrimu. Akala mutule atukuliwe muwari mwa maningo owu hehi, kadiiziwile. Uiziwile ejo gu Mulugu.

³ Miyo mbwenye iiziwile miyo tchoira ohotukuliwa fiyeda ilambo ya ibaribari ya zulu. Akala ali muwari mwa maningo owu hehi, kadiiziwile. Uiziwile ejo gu Mulugu.

⁴ Agadowile wewule, ohovwa jengo jaharumelihiwe wongiwa eto johowanda wongeya.

⁵ Miyo mbwenye nnowanda titimiha zela jengo jejo jamuireyele mutule. Mbwenye kannawanda vititimiha zela miyo meka. So dafuna vititimiha, nnavititimiha zela jovuta jaga.

⁶ Dahafune vititimiha, kadakala zimora mwasiwa dawongege ibaribari. Mbwenye miyo kannafuna vitukulela, tawiha ira unakalevo mutu unasimbwe diona na makalelo okwaranya nnga mukalele miyo owu eto nnga mwemo munadivuruwanela liye.

⁷ Ira dahasimbwe vitukulela na mwasa wa jengo johiyana hiyana japama Nabwiya jidionihile liye, dihivahiwa urenda ohokala wa masika kalaga nnga mwinga mmaningoni mwaga. Mwinga wenno ali namarumiwa okumela wa Satana azile divaha makofi ira dahasimbwege vitukulela.

⁸ Miyo dohonvepa Nabwiya fendo taru ira akumihemo goyi dile.

⁹ Liye mbwenye karumenle yovepa yaga. So wakula waye, kwi: <<Sayi daga dihikwakwana para weyo. Tchoira kopolo daga nnakwakwanela muwari movuta mwawo.>> Nona miyo nnovititimiha mohagalala zela johokana kopolo jaga ira kopolo da Kiristu dikale na miyo.

¹⁰ Eto nona muwari molaba ja Kiristu miyo kadinna makani ozela johokana kopolo, ruwaniwa, segedeya, harahariwa na jodiireyela jabure. Tchoira ora inavuta miyo, tchi ora inalimba miyo.

Kukumuwa wa Pawulo zela aKorinto

¹¹ Miyo ira diwongege nnga zimora, nyo gudikanyihedile ira diwonge eno. Tchoira yali yofwanela ira nyo mudihidedele umboni miyo vano, mbwenye kamuirilena. Mwasiwa masiki miyo dahalive yengo, dahaakwaranya atu anno anaoneya nnga ba anamarumiwa okwaranyetchetcha.

¹² Jihikalawo jengo jiireyile vamentoni venyu jorumelela ira miyo dili namarumiwa wa ibaribari. Miyo dohokana vilela wohokala wa masika. Dohoirana eto jionihedo na jotikiniha vamohi na joira ja kopolo vamentoni venyu. Jatene jejo ti jengo jaoniheda ira miyo dili namarumiwa wa ibaribari.

¹³ Kodi yengo tchivi yairile miyo dagali muwari mwa makuru matene a atu omuroromela Yesu eto dahawandile miyo irana dagali na nyo? So mbwenye yohiyana inaonavo miyo tchoira kadukukumunleni zela watchela kobiri yenyu nnga virile miyo na atu amohiwa. Mwaona ira dihiviringaniha evo muwari mohowatchela kobiri, nnauvepani ira mudikurumuwele.

¹⁴ Miyo eni dihimala kozeya, nnafuna dize wa nyo fendo yaneraru. Dazaga kannavenda jengo jinna nyo, mbwenye nnaufunani nyo bahi. Nona, miyo daza kannaukukumulani zela watchela kobiri yenyu. Tchoira kahi ahima anaakoyela jengo ababiwa. So mbwenye ababi banakoya jengo ira kaavahe ahimiwa.

¹⁵ Miyo dinnana nonga jaga eto dinnana nongiwa mohagalala na mwasa wa minemba dinyu. Kodi miyo dasimbwaga uzivelani, inafwanela nyo muvungule dizivela wenyu?

¹⁶ Na ibaribari nyo muhumala iziwa ira miyo kadukukumunleni. Mbwenye nyo munawonga iraga duhunyengani eto duhudjelrani na malrango.

¹⁷ Kodi miyo duhudjelrani muwari mwa mutu uli watene damurumile miyo?

¹⁸ Miyo dohomukokomeza Titu ira aze wa nyo eto azaga dohomuruma mbalihu ira adowe vamohi na liye. Kodi Titu agazile ohoudjelrani? Kodi hiyo kanilabile na makalelo amohive? Kodi hiyo kananna mawendelo amohive?

¹⁹ Nyo afwase podi umbuwelaga ira hiyo nnafuna nivikalihe apama vamentoni venyu. So ilukuluwa hiyo nnawongetcha vamentoni va Mulugu eto nnawonga muwari mwa Kiristu ira nyo atu anaaziveliwa hiyo mulimbihiwe.

²⁰ Tchoira miyo nnaova ira daza, nnaufwanyeni na makalelo dahanafuna miyo eto nyo munadionena makalelo mwahanafuna nyo. Nnaova ira daza nnafwanye kangana, kalelana nrima, uwali, idana, nukedana, wambana, petana na madugudugu.

²¹ Miyo nnaova ira daza wa nyo, Mulugu waga unaze adiyevihe akoka vamentoni venyu. Diyeviha uwa, nyo munodiona dinlaga vamentoni venyu na mwasa wa atu oindjiva kategile malambo a mundulri anafwanyeya kahanatwaruwe zela jotakala jewa no rarutchana, na ja unyambi jinera atu.