2 Korinto 11 - Mazu Otchena a Mulungu

Pawulo ovihiyaniha na anamarumiwa onama

¹ Miyo nnafuna muvilele zela mazu a uzimora a vang'ono anafuna miyo wonga. Nnouvepani ira muvilele.

² Tchoira miyo dihikana sandje yokumela wa Mulugu zela nyo mwasiwa miyo guubanyelrihileni na mamuninyu mmohi wenno unafwanyeya agali Kiristu ira diwande uvelelani mmandani mwaye nnga muhiyana wapama aharomile gona na mulombwana uli watene.

³ Mbwenye nnaova ira sawasawa nnga nyowele yamunyengile atu Eva muwari mwa joxangaxanga jaye eto na nyenne joumbuwela jenyu jinaze jiholowe ira muhara wenyu Kiristu wahakale wa ibaribari eto wahakale wokwakwanela.

⁴ Tchoira aza mutu mmohiwa awongaga zela Yesu mmohiwene muhiya wenno nimulaleyile hiyo, nari akalawo munemba mmohiwa ahali Munemba Otchena wenno mmuwatchenle nyo, nari mwavwa muselu mmohiwa muxa ahali Muselu Wapama muvwile nyo na hiyo, nyo munorumela vuruwana jatene ejo.

⁵ Na ibaribari miyo kannaviona ira dili vati va ale anaviona nnga anamarumiwa okwaranya.

⁶ Masiki dahawande wonga na uyesa, kahi ira miyo kadiiziwile yengo. Na ibaribari hiyo nihimala uonihani na makalelo matene ira nili atu oiziwa jengo.

⁷ Miyo dohoviyeviha ira nyo muulukulihiwe dulaleyagani Muselu Wapama okumela wa Mulugu dahaupagalrihileni. Kodi nyo munaona nnga miyo dohosakanya yabure muwari mohoupagalrihani yengo?

⁸ Miyo dohadjelra makuru a atu omuroromela Yesu amohiwa muwari mowatchela jadivaha atu ira diwande ulabelani nyo.

⁹ Eto dagali na nyo, tempu yasimenle miyo kadamukukumunle mutu muwari mwa nyo, tchoira abalihu a Masedoniya bazile divaha jadihalenle. Ku wonga kadaukukumunleni eto miyo kadiza dusimelihani na makalelo ali matene.

¹⁰ Voira ibaribari zela Kiristu ili muwari mwa miyo, nnowanda eto kana ibaribari ira porovinsiya ya Akaya watene kalivo mutu unafuna miyaliha vititimiha waga zela hawatchela kobiri dokumela wa nyo.

¹¹ Mwasiwa gwa nni para miyo wongaga eno? Kodi nnawongela eno mwasiwa kannauzivelani? Nari. Tchoira Mulugu uhuiziwa ira miyo nnouzivelani!

¹² Eto makalelo anaira miyo ala, labaga eno mohowatchela kobiri, nnerege iranave ira diwande agwiha anamarumiwa onama ale anavenda jowonga ira mabasa analaba hiyo anolingana na mabasa analaba aPawulo.

¹³ Tchoira aliwa anavikaliha nnga anamarumiwa a Kiristu, agali aliwa ba anamarumiwa onama na anamalaba onyenga.

¹⁴ Yeniyo mbwenye kahi yengo yotikina mwasiwa masiki mwinnyiwene Satana unovisandutcha liye kalaga mungelro omoneya.

¹⁵ Nona kanitikiniheye naaona anamalabaye na aliwene kavikalihaga nnga atu olaba ja upama. Goma wewa unoza ukwakwanele na joira jewa.

Pawulo ohowonga ira aKorinto kakayena ibaribari zela liye

¹⁶ Miyo nnowelela uwandelani akoka. Kakalevo unafuna diona miyo nnga dili zimora. Mbwenye mwadiona nnga dili zimora, inafwanela muwande vuruwana jowonga jaga nnga zimora, mwasiwa miyo nnafuna divitukulele vang'ono.

¹⁷ Inafuna miyo wonga movitukulela, kannawonga na mawongelo a Nabwiya mbwenye nnawonga na mawongelo a zimora.

^18-19 Tchoira kohokalawo adjindjene anavitukulela zela jengo ja maningo kawongaga ja uzimora. Eto kawongaga nyo mwagalive atu oiziwetchetcha, munoziveliwa vuruwana jowonga jiwa. Nona voira nyo munowanda ziveliwa kala na aliwa, nyo vuruwanaga jinawonga atu, na miyene nnafuna disazihe mawongelo ewa, diwonge ja uzimora ira muziveliwe.

²⁰ Tchoira aza mutu aukalihani azari, owu autakunani, owu audjelrani, owu avikaliha nnga kahi wa masika, owu auvahani makofi mbartuni, jatene ejo munorumela ireliwa.

²¹ Miyo dihikana manyazo mwasiwa kopolo douirelani jabure jatene jejo hiyo kaninna. Nnafuna diwongegeve nnga dili zimora. Yengo ili yatene inafuna mutu mmohiwa vitetelana, na miyene nnafuna divitetelena.

²² Kodi aliwa anafwanyeya kagali aEberewu? Na miyene dili muEberewu. Kodi aliwa ba aIzarayeli? Na miyene dili muIzarayeli. Kodi aliwa kabaliwe muzizani mwa Abarahamu? Na miyene dibaliwe emo.

²³ Kodi aliwa ba anamalaba a Kiristu? Miyo dili namalaba wa Kiristu wapama akwaranya aliwa. (Dawongaga eno, nnawonga nnga dihikana mihala.) Ira dikale namalaba wa Kiristu wapama kwaranya, tchoira dihilaba mabasa malukulu akwaranya aliwa, diheliwa mukadeya fendo didjindji akwaranya aliwa, dihibubudiwa fendo dohokontareya, fendo didjindji halaga vang'ono ira dikwe.

²⁴ AJudewu kohodiwaxula fendo tanu dene. Kada fendo aliwa kadiwaxula fendo 39.

²⁵ Dihibubudiwa na jimiri fendo taru. Fendo imohi miyo dohokomiwa na mabwe. Muwari mwa mwadeya dagwela miyo, ihidiireyela fendo taru mwadeya dagwela miyo abwinaga. Dohomala siku nompumbula roma mahiyu ante mmetcheloni muwa ntana watene dagali mwiko.

²⁶ Muwari mowenda maulrendo madjindji dihiona wopihiwa muwari molambuwa mihindje no wopihiwa wa ambava, dihiona wopihiwa na atwaga na atu ohokala aJudewu, dihiona wopihiwa musidadi nari muisalesaleni nari mwiko, dihiona wopihiwa wa atu onama kaviitana abalihu,

²⁷ dohokana mabasa malukulu na makatamiho, mamahiyu madjindji hakana tempu yogona, kagana ndala, kagana ntona, fendo didjindji domaleliwa udja, dihizuzumana didila nari usiwa.

²⁸ Hiya jatene jeji, malambo matene dihikana eto kumbanya muwari moakukumuwela makuru matene a atu omuroromela Yesu.

²⁹ Damuona mutu ovuta, na miyene nnokumbanya vuta waye. Damuona mutu ugwele motegani, na miyene nnokumbanya valukulu.

³⁰ Akala inafwanela divititimihe, miyo nnavititimiha zela jengo jooniheda ira miyo kadinna kopolo.

³¹ Mulugu, Baba wa Nabwiya Yesu, Mulugu otamaleliwa kala no kala guiziwile ira miyo kannanama.

³² Dagali Damaxiku, governadore atonga na nzina na mwene Aretaji ohahela agwarda mmamilangoni mwa sidadile ira kadihinde.

³³ Miyo mbwenye dohogwela mungogodani vajanelani, afwaga aliwa dititiheda vati na ngohi, miyo vuneleya mmandani mwaye.