1 Samuweli 9 - Mazu Otchena a Mulungu

Gumana wa Samuweli na Sawuli

¹ Ohokalawo mulombwana mmohi wa nlogo na Benjami, wenno aitaniwa Kixi. Kixi ule babaye ali Abiyeli, Abiyeli ali mwana Zerori, Zerori ali mwana Bekorati, Bekorati ali mwana Afiya. Mulombwana Kixi ule ali orayela eto ovweya.

² Liye ohomukana mwanaye mmohi oriya aitaniwa Sawuli. Muwari mwa Ana Izarayeli atene kaalimo mutu oriya olingana na muzombwe Sawuli. Liye eto ali muzombwe olapetchetcha akwaranya atu atene. Liye aimela vari va atu atenene, atu atene kamugomela mmafudini.

³ Siku nimohi, aburu amohiwa a mulombwana Kixi, Sawuli babaye ule, kohodimelaga. Evale Kixi ohomuwandela mwanaye Sawuli, liye ira: <<Mwanaga, uvenye na namalaba mmohi ira mudowe mwaasayele aburu anno kadimenle.>>

⁴ Evale aliwa kohogundeya kadowaga ilambo ya mmwangoni ya Efarayimi na ilambo ya Salisa, aliwa sayelaga, mbwenye tchaonne. Eto kohodowaga kasakaga ilambo ya Salimi, aliwa vira ante dowa vilambo da nlogo na Benjami kasakagave, mbwenye tchaonilegeve.

⁵ Kagafiyile ilambo ya Zufe, Sawuli ohowongaga na namalaba wenno aligi na liye, ira: <<Ndowe niwele, nidowege vande. Tchoira nahadowe vande, babaga unohiya akukumuwela aburu kadimenle, anikukumuwelege hiyo.>>

⁶ Mbwenye namalabole ohomuwakulaga, liye ira: <<Kadediha. Tchoira musidadi mu muhukala mutu mmohi wa Mulugu wenno unarihediwa na atu atene, tchoira jatene jinawonga liye jinoireya. Ndowemo nawonge na liye, kalekale awande nitonyiheda wewo unafwanyeya aburu.>>

⁷ Evale Sawuli ohonfuka, liye ira: <<Kodi nadowaga nnafuna nitukule nni ira nanvahe? Tchoira yodja yanna hiyo mutumbani mwihu ihimala eto kaninna yengo imohiwa inafuna hiyo nvaha mutu wa Mulugu ule. Kodi hiyo nihikana inafuna hiyo nvaha?>>

⁸ Namalabole ohowakulaga, liye ira: <<Miyo dihikana kobiri ing'ining'inive ya parata. Nadowa, nnotukula yenno dinvahe mutu wa Mulugu ule ira awande niwandela wewo unafwanyeya aburu.>>

⁹ (Wanle, mutu afunaga nfuka Mulugu yengo, awongetcha ira: <<Nnafuna didowe dawonge na namaona.>> Tchoira atu anno nnaaira hiyo anamafiyiheda malambwala, tempu yenno kaitaniwetcha anamaona.)

¹⁰ Evale Sawuli ohorumelaga, liye ira: <<Yapama tchenno, ndowenimo.>> Noira enne kohodowaga sidadi yenno wafwanyeya mutu wa Mulugu ule wenno kamuira atu namaona.

¹¹ Evale kagwelaga ikumakuma ira kavolowe musidadi mule, kohagumanana anamwali kakumaga musidadi mule kadowaga iko ira karunge mahindje. Aliwa afuka ira: <<Kodi namaona uli musidadi mwemu?>>

¹² Aliwa kohowakulaga, aliwa ira: <<He, uli musidadi mwemuno. Eto munonfwanya sogolro munadowa nyo wo. Mwasiwa liye uvolowile tchineneva musidadi mo. Mwabaranya, munonfwanya. Mbwenye mwahambaranyele, kamunanfwanya mwasiwa liye uzile musidadi mu peno na mwasa oira atu anafuna kadowe nimburo notama novelela mikuto, kavelele mukuto.

¹³ Nyo mwabaranya volowa musidadi, munonfwanya ahanagwele nimburo notama ira adowe adje. Mwasiwa kalivo mutu unafuna roma dja liye ahanafiye. Liye mbwenye gunababiha reliha mukutole, era eno, aliba itaniwa ale aliwa djaga pama. Dowani tchineneva eni. Mwadowa munonfwanya.>>

¹⁴ Evale aliwa kohodowa, aliwa fiya musidadi mule. Kavolowaga wene musidadi mule, kohongumanana Samuweli akumaga ira adowe agwele nimburo notama na mikuto.

¹⁵ Fwanyeya ira munziloni muwa Sawuli ahanagumane na Samuweli, Yehova ohowongaga na Samuweli ira:

¹⁶ <<Metchelo ora yokala nnga ha yenna, miyo nnomuruma wa weyo mulombwana mmohi wa nlogo na Benjami. Mwagumana, weyo umuhambihe ira akale mwene wa atwaga aIzarayeli. Liye unoavunela atu mmandani mwa aFilistewu. Tchoira miyo dihiona goyi inna atwaga eto dihivwa yovepa yewa ira dakamihede.>>

¹⁷ Evale Samuweli agamuonne Sawuli, Yehova ohomuwandela, liye ira: <<Wenno gu mulombwana wenne dauwandenle miyo. Liye gunafuna asogolrelraga atwaga.>>

¹⁸ Noira enne, Sawuli ohodowaga gumana na Samuweli wandamelana va mulango vale, liye muwongana ira: <<Nnouvepani ira mudiwandele vande va namaona.>>

¹⁹ Evale Samuweli ohomuwandela eraga: <<Namaona gu miyene. Kasogolra, udowe nimburo notama na mukuto. Miyo nnerege za mundulri. Peno unodowa wajantari na miyo. Metchelo na mabebehene, miyo nnowakula jofuka jawo jatene jazana we, amala eno munerege dowa.

²⁰ Eto kukukumuwe zela aburu kamanle malambo mararu kagadimenle, tchoira kohooneya. Eni aIzarayeli yofuna yewa yokana mwene, mutuwa unafuna akale weyo vamohi na abali a babawo.>>

²¹ Evale Sawuli ohomuwakula Samuweli eraga: <<Miyo dili wa nlogo na Benjami, nlogo noyevetchetcha na aIzarayeli eto abalaga ba atu olramwiseya muwari mwa nlogo nihu. Nnga mwasiwa gwa nni diwandelaga mazu owopiha okala ha anno?>>

²² Evale Samuweli ohomutukulaga Sawuli na namalabaye ule, liye adowana, avolowana nyumba mwemo mwali pwando ile. Agaafiyilena wewule ohodowaga, liye ahela mamburo oroma apama oakwaranya aliba itaniwa atene. Vevale vafwanyeyaga aliba itaniwa okwakwana 30.

²³ Noira eno, Samuweli ohowonga na maliba piya, liye ira: <<Kazana pindula ya nyama yenne dauvahile miyo ira udowe wakoye!>>

²⁴ Evale namapiya ule ohotukulaga pindula ilukulu yapama ya vamwendoni na jinyenyeri jatene jahanlemo, dowana wa Sawuli. Evale Samuweli ohowonga na Sawuli eraga: <<Kaing'anani! Ila tchi pindula daukoyenleni miyo. Mudje, tchoira nyama yenna yakoyiwe ira nyo mudje veva vaaitanne miyo atu atene anafwanyeya veva.>> Mwa enne siku nenne, Sawuli ohojantarigi na Samuweli.

²⁵ Kagamanle jantari, ambinlene kohokumaga nimburo notama na mukuto, aliwa dowa musidadi mwakoka mwene. Kagafiyile musidadi mule, Samuweli na Sawuli kohotapanya vazulu va nyumba.

Samuweli ohomuhambiha Sawuli imwene

²⁶ Unde wagatchile, na mabebehene mulombwana Samuweli ohomuitanaga Sawuli vazulu va nyumba vale, liye ira: <<Kavenya ira dulanye!>> Evale Sawuli ohovenyaga, ambinlene aliwa kuma musidadi mule, aliwa haraga ndila.

²⁷ Evale kadowaga, kafunaga hiya sidadile, Samuweli ohowongaga na Sawuli, liye ira: <<Umuwandele namalabawo ule ira asogolrege. Weyo ubabihe hala vang'onove.>> Evale namalabole agasogonlre, Samuweli ohomuwandelaga Sawuli, liye ira: <<Miyo dihikana mazu dilanyediwe miyo na Mulugu ira duwandele.>>